ރާއްޖޭގައި މި ވަގުތު ހުރި އެންމެ ހުނަރުވެރި އަންހެން ދުވުންތެރިޔަކީ އައިޝަތު ހިމްނާ ހަސަން، ކަން އޭނާ މި ވަނީ މި ފަހަރުގެ ގައުމީ އެތުލެޓިކްސް މުބާރާތުގައި އެންމެ މޮޅު އަންހެން އެތުލީޓުގެ ޓްރޮފީ ދިފާއުކުރުމަށް ފަހު ސާބިތުކޮށްދީފަ އެވެ.
ފަހަަކަށް އައިސް ގައުމީ ރެކޯޑް މުގުރާލުމުގައި ވެސް ރަނގަޅު ޓްރެކެއް ގައި އޮތް ހިމްނާ ވަނީ މި ފަހަރުގެ ގައުމީ މުބާރާތުގައި 100 މީޓަރާއި 200 މީޓަރު އަދި 400 މީޓަރު އިވެންޓުން ރަން މެޑަލް ހޯދައިފަ އެވެ. ހިމްނާ ވާދަކުރާ ކްލަބް ރާވެރިޔާ ވަނީ ހަތަރެއް ގުނަ 100 މީޓަރުގެ ރިލޭ އިން ރިހި މެޑަލް ހޯދައިފަ އެވެ. އެންމެ މޮޅު އެތުލީޓު ހޮވުމުގައި ބޮޑަށް ބަލާނީ އިންޑިވިޖުއަލް ކާމިޔާބީ އަށެވެ.
ޓްރެކް އެންޑް ފީލްޑް އެސޯސިއޭޝަނުގެ ޓީމުގައި ހިމެނިގެން 2019 ވަނަ އަހަރު ހިމްނާ ވަނީ އުުމުރުން އެންމެ 17 އަހަރުގައި އެންމެ މޮޅު އެތުލީޓުގެ މަގާމު ފުރަތަމަ ފަހަރަށް ހޯދައިފަ އެވެ. ކޮވިޑް-19ގެ މެދުކެނޑުމަށް ފަހު ހިމްނާ އެންމެ ފުރަތަމަ ވާދަކުރި މުބާރާތަކީ ކެންޔާގެ ނައިރޯބީގައި މި އަހަރު ކުރިއަށްދިޔަ ދުނިޔޭގެ 20 އަހަރުން ދަށުގެ މުބާރާތުގަ އެވެ. އެ މުބާރާތުގައި އޭނާ ވަނީ ރާއްޖޭގެ 400 މީޓަރު ދުވުމުގެ ރެކޯޑް ތިން ވަނަ ފަހަރަށް މުގުރާލައިފަ އެވެ.
ހިމްނާ ވަނީ މީގެ ކުރިން 2019 ވަނަ އަހަރު އެސޯސިއޭޝަން ޗެމްޕިއަންޝިޕު އެންމެ މޮޅު އަންހެން އެތުލީޓުގެ މަގާމަށް ވެސް ހާސިލްކޮށްފަ އެވެ. އޭގެ ފަހުން ބައިނަލްއަގުވާމީ މުބާރާތްތަކުގައި ފަަހަރަކަށް ވުރެ ފަހަރެއް އޭނާ ހޯދަމުން އަންނަ ކުރިއެރުންތައް ބޮޑެވެ.
މި ފަހަރުގެ ގައުމީ މުބާރާތުގެ އިވެންޓެއްގެ ތެރެއިން ޖާއިޝާ ދުވަނީ.-- ފޮޓޯ: ހުސެއިން ޝަޔާހު/ އަދަދު
ޖާއިޝާ އަށް ވެސް ކާމިޔާބު ފަހަރެއް
މި ފަަހަރުގެ ގައުމީ މުބާރާތުގައި ހިމްނާއާ އެންމެ ގާތުން ވާދަކުރީ ގައުމީ އެތުލެޓިކްސް މުބާރާތްތަކުގައި ފަަހަކަށް އައިސް ވިދުން ގަދަވަމުން އަންނަ ދުވުންތެރިޔާ އައިމިނަތު ޖާއިޝާ ޖުނީޒް އެވެ. ޓްރެކް އެންޑް ފީލްޑް އެސޯސިއޭޝަން ތަމްސީލްކުރާ ޖާއިޝާ ވަނީ މި ފަހަރުގެ މުބާރާތުގައި ވެސް އޭނާގެ ތަފާތު ދައްކައިފަ އެވެ. މި ފަހަރުގެ މުބާރާތުގައި ތިން ރަން މެޑަލް ހޯދި އެވެ.
ޖާއިޝާ 800 މީޓަރުގެ ދުވުމުގެ މެޑަލް ދިފާއުކުރީ ދެ މިނިޓް 30.95 ސިކުންތުން ރޭސް ނިންމައިގެންނެވެ. ދެ ވަނަ އަށް ދިޔަ ސާއިދު ސްޕޯޓްސްގެ އައިޝަތު ސަމްހާ ޝަރީފްގެ ޓައިމިން އަކީ ދެ މިނިޓް 43.66 ސިކުންތެވެ. ތިން ވަނަ ހޯދި އައިޝަތު ރާނިޔާ ރޭސް ނިންމީ ދެ މިނިޓް 46.53 ސިކުންތުންނެވެ.
ފަސްހާސް މީޓަރުގެ ދުވުމުގައި ޖާއިޝާ ވަނީ ކުޑަހުސެން ސްޕޯޓްސް އެސޯސިއޭޝަނުގެ މަރިޔަމް އަބްދުލްކަރީމް (މަރީ) ފަހަތަށް ޖައްސާލައިފަ އެވެ. ޖާއިޝާ ރޭސް ނިންމީ 21 މިނިޓް 22.61 ސިކުންތުންނެވެ. މަރީގެ ޓައިމިން އަކީ 21 މިނިޓް 30.71 ސިކުންތެވެ. އަދި ތިން ވަނަ އަށް ދިޔަ މެރަތަން ރަނާސް މޯލްޑިވްސްގެ އައިޝަތު ރާނިޔާ ރޭސް ނިންމީ 22 މިނިޓް 05.36 ސިކުންތުންނެވެ.
އިއްޔެ، ޖާއިޝާ އޭނާގެ ތިން ވަނަ ރަން މެޑަލް ހޯދީ 1500 މީޓަރުގެ ދުވުން ކާމިޔާބު ކޮށްގެންނެވެ. ޖާއިޝާ އެ އިވެންޓް ފުރިހަަމަކުރީ ފަސް މިނިޓް 10.67 ސިކުންތުންނެވެ. ދެ ވަނަ އަށް ދިޔަ މަރީގެ ޓައިމިން އަކީ ފަސް މިނިޓް 27.29 ސިކުންތުންނެވެ. އަދި ތިން ވަނަ އަށް ދިޔަ ރާނިޔާގެ ޓައިިމިން އަކީ ފަސް މިނިޓް 45.71 ސިކުންތެވެ.
އަންހެން ބައިން އެންމެ މޮޅު ކްލަަބަކަށް ހޮވިފައިވަނީ ޓްރެކް އެންޑް ފީލްޑް އެސޯސިއޭޝަން އެވެ.
