ލަންޑަން (ނޮވެމްބަރު 20) - އިނގިރޭސި ޕްރިމިއާ ލީގުގައި މިރޭ ލިވަޕޫލުން އަމިއްލަ ދަނޑުގައި 4-0 އިން ރަނގަޅު ފޯމެއް ދަމަހައްޓަމުން އައި އާސެނަލް ބަލިކޮށްފި އެވެ.
މިއީ އެންމެ ފަހުން ކުޅުނު 10 މެޗުގެ ތެރެއިން އާސެނަލް ބަލިވި ފުރަތަމަ ފަހަރެވެ. ފާއިތުވި ހަ ސީޒަނުގައި ވެސް ލިވަޕޫލުން ވަނީ އަމިއްލަ ދަނޑުގައި އާސެނަލް މަދުވެގެން ދެ ގޯލުގެ ތަފާތުން ބަލިކޮށްފަ އެވެ. ލިވަޕޫލް ވަނީ މިރޭ ހޯދި މޮޅާ އެކު ލީގުގެ ދެ ވަނަ އަށް ޖެހިލައިފަ އެވެ.
ލީގުގެ އެއް ވަނައިގައި ޗެލްސީ އޮތީ 12 މެޗުން 29 ޕޮއިންޓް ހޯދައިގެންނެވެ. ދެ ވަނައިގައި އޮތް ލިވަޕޫލަށް ވަނީ 12 މެޗުން 25 ޕޮއިންޓް ލިބިފަ އެވެ. ތިން ވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީ އަށް ވަނީ 11 މެޗުން 23 ޕޮއިންޓް ލިބިފަ އެވެ. ސިޓީ މާދަމާރޭ އެވަޓަން ބަލިކޮށްފިނަމަ ލީގުގެ ދެ ވަނަ އަށް އެރޭނެ އެވެ.
ލިވަޕޫލްގެ އެންފީލްޑް ސްޓޭޑިއަމްގައި މިރޭ ކުޅުނު މެޗު ފަށައިގެން އާސެނަލްގެ ވިސްނުން ހުރީ ޑިފެންސްކުރުމަށް ފަހު ކައުންޓަ އެޓޭކް ސިސްޓަމަކަށް ކުޅުމަށެވެ. ލިވަޕޫލުން ގޯލެއް ޖަހަން ފޮނުވާލި ހަމަލާތައް އާސެނަލްގެ ކީޕަރު އާރޮން ރަމްސްޑޭލް މަތަކުރިއިރު، އާސެނަލްގެ އަލެކްސަންޑަ ލަކަޒޭޓް ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ.
އާސެނަލްގެ ކޯޗު މިކޭލް އާޓެޓާ އާއި ލިވަޕޫލްގެ ކޯޗު ޔާގެން ކްލޮޕް އަށް ވަނީ ޓެކްނިކަލް އޭރިއާގައި ކުރި ޒުވާބެއްގެ ސަބަބުން ރީނދޫ ކާޑެއް ދައްކައިފަ އެވެ. ކްލޮޕާއި އާޓެޓާއާ ދެމެދު ބަހުގެ ހަމަލާ ބަދަލުކުރީ ލިވަޕޫލްގެ ސަޑިއޯ މާނޭ ބޮލުން ޖަހަން އަރައި އާސެނަލްގެ ޓޮމިޔާސޫ އަށް ނުރައްކާތެރި ފައުލެއް ކުރިކަަމަށް ބުނެ ކާޑު ދައްކަން އާޓެޓާ ވަރަށް ބޮޑަށް އެޕީލްކުރުމުންނެވެ.
ފުރަތަމަ ހާފު ނިމުމުގެ ކުރިން ލިވަޕޫލުން ލީޑުނެގީ މާނޭ ޖެހި ގޯލަކުންނެވެ. މިއީ މެޗުގެ 39 ވަނަ މިނިޓްގައި ޓްރެންޓް އަލެކްސަންޑަ އާނޯލްޑް ނެގި ހިލޭ ޖެހުމަކުން މާނޭ ޖެހި ގޯލެކެވެ. މިއީ އާސެނަލް ކޮޅަށް މާނޭ ޖެހި އަށް ވަނަ ގޯލެވެ.
ދެ ވަނަ ހާފްގެ ކުޅުން ފެށިގެން ހަތް މިނިޓް ތެރޭ ޑިއޯގޯ ޖޮޓާ ވަނީ ލިވަޕޫލްގެ ލީޑުފުޅާކޮށްދީފަ އެވެ. އާސެނަލްގެ ނޫނޯ ޓަވާރޭސް ހެދި ގޯހެއްގެ ފައިދާނަގައި ޖޮޓާ މި ގޯލު ޖެހީ އާސެނަލްގެ ޑިފެންޑަރު ބެން ވައިޓާއި ކީޕަރު ރާމްސްޑޭލް ނައްޓާފައި ގޮހެެވެ. މިއީ ޖޮޓާ އާސެނަލް ކޮޅަށް ޖެހި ފަސް ވަނަ ގޯލެވެ. ކުރިން ވުލްވްސް އަށް ކުޅުނު ޖޮޓާ އެންމެ ގިނަ ގޯލު ލީގުގައި ޖެހީ އާސެނަލް ކޮޅަށެވެ.
ލިވަޕޫލްގެ ތިން ވަނަ ގޯލު ޖެހީ ޕްރިމިއާ ލީގުގެ މިިދިޔަ މަހުގެ އެންމެ މޮޅު ކުޅުންތެރިޔާގެ މަގާމު ހޯދި މުހައްމަދު ސަލާހު އެވެ. މެޗުގެ 73 ވަނަ މިނިޓްގައި ސަލާހު މި ގޯލު ޖެހީ މާނޭ ހުސްކޮށްލާފައި ދިން ބޯޅައަކުންނެވެ. މިއީ ޕްރިމިއާ ލީގުގައި އާސެނަލް ކޮޅަށް ލިވަޕޫލުން ޖެހި 100 ވަނަ ގޯލެވެ. ލިވަޕޫލުން އެންމެ ގިނަ ގޯލު ޖެހީ ނިއުކާސަލް ކޮޅަށެވެ. އެއީ 105 ގޯލެވެ.
ބަދަލު ކުޅުންތެރިއެއްގެ ގޮތުގައި ކުޅެން އަރައި ލިވަޕޫލަށް ކުޅޭ ޖަޕާންގެ ފޯވާޑް ޓަކޫމީ މިނަމީނޯ ވަނީ ފައިގައި ޖެހުނު ފުރަތަމަ ބޯޅައިން ކަހަލަ ގޮތަކަށް ގޯލު ޖަހައިފަ އެވެ. މިއީ އާނޯލްޑް ހުސްކޮށްލާފައި ދިން ބޯޅައަކުން މެޗުގެ 77 ވަނަ މިނިޓްގައި މިނަމީނޯ ޖެހި ގޯލެކެވެ. މިއީ މި ފަހަރު ލީގުގައި މިނަމީނޯ ޖެހި ފުރަތަމަ ގޯލެވެ.
