ލަންޑަން (ނޮވެމްބަރު 20) - އިނގިރޭސި ޕްރިމިއާ ލީގުގައި މިރޭ ވޮޓްފޯޑާ ދެކޮޅަށް ނުކުންނައިރު، ޕްރެޝަރު ބޮޑުވެފައިވާ މެންޗެސްޓާ ޔުނައިޓަޑްގެ ޓީމުގެ ފަރާތުން ސަޕޯޓަރުންނަށް ތަފާތު ދައްކާނެ ކަމަށް އެ ޓީމުގެ ކޯޗު އޮލޭ ގުނަ ސޯލްޝެއާ ބުނެފި އެވެ.
ކުޅުނު 12 މެޗުން އެންމެ ހަތަރު މެޗުން މޮޅުވެ، ޔުނައިޓަޑް އޮތީ ޕޮއިންޓް ތާވަލްގެ ހަ ވަނައިގަ އެވެ. މީގެ ތެރޭގައި އަމިއްލަ ދަނޑުގައި ލިވަޕޫލް އަތުން 5-0 އިން ބަލިވި މެޗާއި ވާދަވެރި މެންޗެސްޓާ ސިޓީ އަތުން 2-0 އިން ބަލިވި މެޗު ހިމެނެ އެވެ.
ސޯލްޝެއާ ބުނީ އިންޓަނޭޝަލް ބްރޭކަށް ފަހު، ޓީމުގެ ކުޅުންތެރިންނާއި އޮފިޝަލުން ވެސް މަސައްކަތް ކުރަމުންދަނީ ޔުނައިޓަޑްގެ ފޯމު ރަނގަޅު ކުރަން ކަމަށެވެ.
"ކުޅުންތެރިންނާއި އޮފިޝަލުން މި މަސައްކަތްކުރަނީ އެއް އަަމާޒަކަށް. އެއީ އަހަރެމެންގެ ކުޅުން ރަނގަޅުކޮށް، ނަތީޖަޓައް ރަނގަޅުކުރުން،" ސޯލްޝެއާ ބުންޏެވެ.
"އަހަރަމެންގެ ސިކުނޑި ތާޒާކޮށްލަން ވަގުތުކޮޅެއް މި ލިބުނީ. އަހަރަމެން ރަނގަޅު ކުރަންޖެހޭ ބައެއް ކަންތައްތަކަށް އިތުރު ސަމާލުކަމެއް ދީގެން މި ކުރިއަށް ގެންދަނީ. ކުރިއަށް އޮތް މެޗުގައި ތަފާތެއް ފެންނާނެ."
ޔުނައިޓަޑްގެ ނަތީޖާތައް ދަށްވެގެންދިޔަ އިރު ވެސް، އެ ޓީމުގެ ކޯޗުގެ މަގާމުގައި ސޯލްޝެއާ ބެހެއްޓުމަކީ ގިނަ ބައެއް ފާޑުކިއުން އެ ކްލަބަށް އަމާޒުވަމުންދާ ކަމެކެވެ. ސޯލްޝެއާ ބުނީ ސަޕޯޓަރުން ތިބީ ޓީމުގެ ފަހަތުގައި ކަމަށާއި މެޗަކުން ބަލިވާއިރަށް ޕްރެޝަރު ބޮޑުވުމަކީ މައްސަލައެއް ނޫން ކަމަށެވެ.
ޔުނައިޓެޑްގެ ވައިސް އެގްޒެކްޓިވް އެޑް ވުޑްވާޑާ އެކު ކްލަބްގެ ނަތީޖާތައް ހަމަމަގަށް އެޅުވުމާ ބެހޭގޮތުން މަޝްވަރާތަކެއް ކުރި ކަމަށް ސޯލްޝެއާ ވަނީ ބުނެފަ އެވެ.
މިރޭ ޔުނައިޓެޑާ ދެކޮޅަށް ނުކުންނަ ވަޓްފޯޑުން ވަނީ މި ސީޒަނުގައި ކޯޗު ބަދަލުކޮށްފަ އެވެ. ވަޓްފޯޑުން ސީޒަން ފެށީ ސްޕެއިނުގެ ކޯޗު ޒިސްކޯ ނޫނޭޒްއާ އެކު އެވެ. އެކަމަކު އޭނާ މަގާމުން ދުރުކޮށް ވަޓްފޯޑުން ވަނީ ކުރިން ލެސްޓާ ސިޓީ އަށް އިނގިރޭސި ޕްރިމިއާ ލީގު ކާމިޔާބު ކޮށްދިން ކޯޗު ކްލައުޑިއޯ ރަނިއޭރީއާ ޓީމު ހަވާލުކޮށްފަ އެވެ.
ވަޓްފޯޑް ދަނޑުގައި ޔުނައިޓެޑާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 8 ޖަހާއިރު އެވެ.
