މޭ ހަ ވަނަ ދުވަހު ގ. ނީލޯފަރު މަގުގައި ހުރި ސައިކަލެއްގައި އައިއީޑީއެއް ހަރުކޮށްގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން އެމަނިކުފާނުގެ ބަޔާނެއް ފުލުހަށް ދެއްވައިފި އެވެ.
ރައީސް ނަޝީދުގެ ވަކީލު އަދި އެމަނިކުފާނުގެ ކޮއްކޮ އަހުމަދު ނާޒިމް އަބްދުއްސައްތާރު ވިދާޅުވީ އެ ހަމަލާއާ ގުޅިގެން ރައީސް ނަޝީދުގެ ބަޔާނެއް މީގެ އިރުކޮޅެއް ކުރިން ފުލުހުންނަށް ލިޔުމުން ދެއްވާފައިވާ ކަމަށެވެ.
މޭ ހަ ވަނަ ދުވަހު ދިން ހަމަލާއަށް ފަހު ފުލުހުން ވަނީ މީގެ ކުރިން އެ ހަމަލާއާ ގުޅިގެން ގިނަ ދުވަސްތަކެއްވީއިރު ވެސް ރައީސް ނަޝީދުގެ ބަޔާނެއް ލިބިފައި ނުވާކަމަށް ބުނެފަ އެވެ.
ހަމަލާގައި ކަން ހިނގައިދިޔަ ގޮތާ ގުޅޭ ގޮތުން ނަޝީދުގެ ބަޔާނެއް ތަހުގީގަށް ހޯދަން މަސައްކަތް ކުރާ ކަމަށް ފުލުހުން ބުނެފައިވެ އެވެ. އަދި އޭގެ ފަހުން އިތުރު ފަރުވާއަށް ނަޝީދު ރާއްޖޭން ބޭރަށް ފުރާވަޑައިގެންނެވުމުން ސިޓީއަކުން ނޫނީ އީމެއިލް މެދުވެރިކޮށް ވެސް އެ ބަޔާން ހޯދަން މަސައްކަތް ކުރި ކަމަށް ބުނެފައިވެ އެވެ.
ފުލުހުންގެ އެ ވާހަކަތަކާ ގުޅިގެން ކުރެއްވި ޓުވީޓެއްގައި ނަޝީދު ވިދާޅުވީ "ބަހަކަށް ވެސް ބަޔާނަކަށް ވެސް ދައްކަން އޮތީ" އެމަނިކުފާނުގެ ޖާނާއި، ހިތް އަދި މޭ ކަމަށެވެ.
ނަމަވެސް ފަހުން ނަޝީދު ވަނީ ވަކީލަކަށް ނާޒިމް ހަމަޖައްސަވައި ބަޔާން ދެއްވާނެ ކަމަށް ވިދާޅުވެފަ އެވެ.
