ޓެނިސް ތަރި ޕެންގް ޝުއާއީގެ އީމެއިލެއް ކަމަށް ބުނެ ޗައިނާގެ ދައުލަތުގެ މީޑިއާ އިން އާއްމުކުރި އީމެއިލަކާ ގުޅޭ ގޮތުން ވިމެންސް ޓެނިސް އެސޯސިއޭޝަން (ޑަބްލިއުޓީއޭ) ގެ ރައީސް ޝައްކު އުފައްދަވައިފި އެވެ.
ޑަބްލިއުޓީއޭގެ ޗެއާމަން ސްޓީވް ސައިމަން ނެރުނު ބަޔާނެއްގައި ވިދާޅުވީ އެއީ ޕެންގް ލިޔެފައިވާ ނުވަތަ ޕެންގްގެ ފަރާތުން އެހެން މީހަކު ލިޔެފައިވާ އީމެއިލެއް ކަމަށް ގަބޫލުކުރަން ދަތި ކަމަށެވެ.
ޗައިނާގެ އިސް އޮފިޝަލަކު ޕެންގްއަށް ޖިންސީ ގޯނާކުރި ކަމަށް ތުހުމަތު ކުރި ފަހުން ޕެންގްގެ ހަބަރެއް ނުވެ އެވެ. އޭނާގެ އީމެއިލެއް ކަމަށް ބުނާ އީމެއިލް އާއްމުކުރީ ބުދަ ދުވަހު އެވެ.
ސީޖީޓީއެން އިން އާޢްމުކުރި އީމެއިލްގައި ޕެންގް ބުނެފައި ވަނީ އޭނާ ގެއްލިގެން ނޫޅޭ ކަމަށާއި މި ހުރީ ގޭގައި މަޑުކޮށްގެން ކަމަށެވެ. އަދި ހުރިހާ ކަމެއް ވެސް ރަނގަޅު ކަމަށް ބުނެފައި ވެ އެވެ.
ޕެންގް އަށް ޖިންސީ ގޯނާ ކުރި ކަމަށް ބުނެ ފަތުރަނީ ދޮގު ވާހަކައެއް ކަމަށް ވެސް އީމެއިލްގައި ވެ އެވެ. އީމެއިލްގެ ސައްހަ ކަމާ މެދު ޝައްކު އުފައްދާ ގިނަ މީހުންނަށް ފާހަގަވި އެއް ކަމަކީ ޓައިޕް ކުރާ ކާސާ އީމެއިލްގެ ސްކްރީންޝޮޓުން ފެންނަ ހުރުމެވެ.
ނޮވެމްބަރު މަހުގެ ކުރީކޮޅުން ފެށިގެން ޕެންގް ގެއްލުނީ ޗައިނާގެ ކުރީގެ ވައިސް ޕްރިމިއާ ޒަންގް ގައޮލީއާ ގުޅޭ ތުހުމަތުތަކެއް ޗައިނާގެ ސޯޝަލް މީޑިއާ ވެއިބޯގައި ޕޯސްޓު ކުރި ފަހުންނެވެ.
ޕެންގް ބުނީ 2013 އިން 2018 އަށް ވައިސް ޕްރިމިއާކަން ކުރެއްވި ޒާންގްއާ އެކު ޖިންސީ ގުޅުމެއް ބާއްވަން އޭނާ އަށް މަޖުބޫރު ކުރުވި ކަމަށެވެ. ފަހުން އެ ޕޯސްޓު ވަނީ ރިމޫވްކޮށްފަ އެވެ. އަދި އޭގެ ފަހުން ޕެންގްގެ ހަބަރެއް ނުވެ އެވެ.
ކުރީގެ ވައިސް ޕްރިމިއާ ޒާންގް އަކީ ޗައިނާގެ ރައީސް ޝީ ޖިންޕިން އާ ގާތް ގުޅުމެއް އޮންނަ ބޭފުޅެކެވެ.
އެ ޕޯސްޓަށް ފަހު ޕެންގްގެ ހަބަރެއް ނުވުމުން ޑަބްލިއުޓީއޭ އިން ކަންބޮޑުވުން ފާޅުކުރަން ފެށި އެވެ. އޭގެ އިތުރުން މަޝްހޫރު ޓެނިސް ތަރިން ވެސް ޕެންގްއާ މެދު ކަންބޮޑުވުން ފާޅުކުރި އެވެ.
ޕެންގްގެ އީމެއިލެއް ކަމަށް ބުނާ އީމެއިލްއާ މެދު ޑަބްލިއުޓީއޭގެ ޗެއާމަން ސްޓީވް ސައިމަން ވިދާޅުވީ އެ އީމެއިލް ފެނުމުން ކަންބޮޑުވުންތައް އިތުރުވެއްޖެ ކަމަށެވެ. ޕެންގް ދިރިހުރިކަން ސާބިތުވާ ސާފު ހެކި ދެއްކުމަށް އޭނާ ގޮވާލެއްވި އެވެ.
