ކެނެޑާ އަށް އެރި ތޫފާނެއްގައި މަގުތަކާއި ރޭލު ދަގަނޑުތައް ބަންދުވެ، ހުޅަނގު ބްރިޓިޝް ކޮލަމްބިއާ ޕްރޮވިންސްގައި ކުއްލި ނުރައްކަލުގެ ހާލަތު އިއުލާނުކޮށްފި އެވެ.
މިދިޔަ އާދީއްތަ ދުވަހު އެރި ތޫފާނުގެ ސަބަބުން ހާލުގައި ޖެހިފައިވާ އެތައް ހާސް އާއްމުންނަށް އެހީވާން ސިފައިން ދަނީ މަސައްކަތް ކުރަމުންނެވެ.
ވޮޝިންޓަނަށް ކުރައްވަމުންދާ ދަތުރުފުޅެއްގައި ބޮޑު ވަޒީރު ޖަސްޓިން ޓްރޫޑާ ވަނީ އާއްމުންނަށް އެހީވާން ވައުދުވެވަޑައިގެންފަ އެވެ. އަދި އަލުން ބިނާކުރުމުގެ މަސައްކަތް ސިފައިން ކުރާނެ ކަމަށް ވިދާޅުވި އެވެ.
ބިންގަނޑު ކަނޑައިގެން ދިޔުމުގެ ހާދިސާއެއްގައި އެކަކު މަރުވެފައި ވާއިރު، އިތުރު ދެ މީހަކު ގެއްލިގެން ދަނީ ހޯދަމުންނެވެ.
ބްރިޓިޝް ކޮލަމްބިއާ ސަރަހައްދަށް އެއް މަސް ތެރޭގައި ވާރޭ ވެހޭ މިންވަރަށް 24 ގަޑިއިރުގެ ތެރޭގައި ވާރޭ ވެހުނު ކަމަށް ރިޕޯޓުތައް ބުނެ އެވެ. އެހެންވެ، އެތައް ހާސް ބަޔަކު ތިބީ ވަގުތީ ހިޔާތަކަށް ބަދަލުކޮށްފަ އެވެ.
އެ ސަރަހައްދުގެ އޮފިޝަލުން ބުނީ މިއީ މޫސުމީ ބަދަލުގެ ސަބަބުން ކުރިމަތިވި ކާރިސާއެއް ކަމަށެވެ.
ތޫފާނުތަކުގެ ބާރުގަދަވުމާއި ތޫފާން އަރާ މިންވަރު އިތުރުވުމާއި މޫސުމީ ބަދަލާ ސީދާ ގުޅޭ ގޮތް ޔަގީން ކުރެވިފައި ނުވި ނަމަވެސް، ކަނޑުގެ ލޮނުގަނޑުގެ ފަށަލަ ހޫނުވާ ނަމަ މަތީގައިވާ ވައި ހޫނުވެ ތޫފާނުގެ ބާރުގަދަވާން އެހީވާކަން ސައިންސްގެ އަލީގައި ހޯދިފައި ވެ އެވެ.
ނަތީޖާއެއްގެ ގޮތުން ވިލާތަކުގައި ފެން އުފެދޭ އަދި ހިފަހައްޓާ ވަރު އިތުރުވެ، އާއްމުކޮށް ވެހޭ ވަރަށް ވުރެ ގިނައިން ބޯކޮށް ވާރޭ ވެހުމަށް މަގުފަހިވެ އެވެ.
އަށާރަ ސަތޭކައިގެ އަހަރުތަކުގައި ސިނާއީ އިންގިލާބު ފެށި ފަހުން ދުނިޔޭގެ ފިނިހޫނުމިން ވަނީ 1.2 ޑިގްރީ ސެލްސިއަސް އިން މަތިވެފަ އެވެ. ޖައްވަށް ބޭރު ކުރާ ކާބަން ގޭސް މަދު ނުކުރާ ނަމަ ދުނިޔެ ހޫނުވުން ދާނީ އިތުރުވަމުންނެވެ.
