ހުސްވެފައިވާ ދަ ގްރާންޑޭ ސްޕޯޓްސް ކްލަބްގެ ކޯޗުގެ މަގާމަށް ފުރަތަމަ ޑިވިޝަނުގެ ގިނަ ކްލަބްތަކެއްގައި ކުރިން މަސައްކަތްކުރި ކޯޗު އަހުމަދު ނާޝިދު (ނާދު) ހަމަޖައްސައިފި އެވެ.
ނާދު މިދިޔަ ސީޒަން ފެށިއިރު ހުރީ ސުޕަ ޔުނައިޓެޑް ސްޕޯޓްސް (ސަސް)އާ ހަވާލުވެ އެވެ. އެކަމަކު، ސީޒަން ފަށައިގެން ދިވެހި ޕްރިމިއާ ލީގުގެ ފުރަތަމަ ބުރުގައި ނާދުއާ އެކު ހަދާފައިވާ ކޮންޓްރެކްޓް ސަސް އިން އުވާލި އެވެ. އެއީ އެ ޓީމުގެ ކޯޗަކަށް މުހައްމަދު ޝިޔާޒް (މޯހަން) ގެންނާށެވެ.
ތިން އަހަރުގެ ކޮންޓްރެކްޓެއްގައި ސަސްއާ ހަވާލުވި ނަމަވެސް ދާދި ފަހުން އެ ޓީމުން ވަނީ މޯހަންގެ ކޮންޓްރެކްޓް ވެސް ދެ ފަރާތް އެއްބަސްވެގެން ނިމުމަކަށް ގެނެސްފަ އެވެ. މޯހަން ގުޅުނީ ލީގު ޗެމްޕިއަން މާޒިޔާއާ އެވެ.
ނާދު އަކީ ފުރަތަމަ ޑިިވިޝަނުގައި ދަ ގްރާންޑޭ ބެންޗުން ފެންނާނެ ދެ ވަނަ ކޯޗެެވެ.
މިދިޔަ ދެ ސީޒަނުގައި ދަ ގްރާންޑޭ އަށް ކޯޗުކޮށްދިން އިސްމާއިލް މަހަފޫޒް (އިންމަ) ވަނީ ދާދި ފަހުން ސަސްއާ ހަވާލުވެފަ އެވެ. ނާދު، ދަ ގްރާންޑޭއާ ހަވާލުވީ ކުރިއަށް އޮތް ސީޒަނަށް ކަމަށް އެ ކްލަބުން ވަނީ ބުނެފަ އެވެ. ނާދު ވަނީ މީގެ ކުރިން ދަ ގްރާންޑޭގެ ޒުވާން ޓީމަށް ޔޫތު ޗެމްޕިއަންޝިޕްގައި ކޯޗުކޮށްދީފަ އެވެ.
މިދިޔަ ސީޒަނުގައި ސަސްއާ ހަވާލުވުމުގެ ކުރިން އެންމެ ފަހުން ފުރަތަމަ ޑިވިޝަނުގެ ހެޑް ކޯޗެއްގެ ގޮތުގައި ނާދު ފެނުނީ މީގެ ފަސް ވަރަކަށް އަހަރު ކުރިން ވިކްޓްރީގެ ބެންޗުންނެވެ.
ފުރަތަމަ ޑިވިޝަނުގައި ކުރިން އޮތް އޯލްޔޫތުލިންކްއޭޖް (އޭވައިއެލް)ގައި ވެސް ރަނގަޅު މަސައްކަތްތަކެއް ކުރި ނާދު ވަނީ އެ ނޫން ޓީމުތަކުގައި ވެސް ކޯޗިންގެ މަސައްކަތްތަކެއް ކޮށްފަ އެވެ. އޭގެ ތެރޭގައި ކްލަބް ވެލެންސިއާ ރެލިގޭޝަން ޒޯންގައި 2012 ވަނަ އަހަރު ކުޅުނުއިރު އެ ޓީމުގެ އެސިސްޓަންޓް ކޯޗަކަށް ހުރެ ހެޑް ކޯޗެއްގެ ޒިންމާ ނެގި އެވެ. އޭގެ ފަހުން ނާދު ބޮޑަށް ފެނިފައިވަނީ ދެ ވަނަ ޑިވިޝަނުގެ ކްލަބްތަކާއި އުމުރުފުރާ ގައުމީ ޓީމުތަކުގެ ކޯޗެއްގެ ގޮތުގަ އެވެ.
ނާދު ވަނީ ގައުމީ އަންހެން އަދި ފިރިހެން ޓީމުތަކުގައި ވެސް މަސައްކަތް ކޮށްފަ އެވެ. އޭނާ ވަނީ 19 އަހަރުން ދަށުގެ ގައުމީ ޓީމާއި ގައުމީ އަންހެން ފުޓްބޯޅަ ޓީމަށް ވެސް އިރުޝާދުދީފަ އެވެ. ނާދު އަކީ 2019 ވަނަ އަހަރު ޑިސެމްބަރު މަހު ނޭޕާލުގައި ބޭއްވި ސައުތު އޭޝިއަން ގޭމްސްގައި ރާއްޖޭގެ އަންހެން ޓީމުން ލޯ މެޑަލް ހޯދި ޓީމުގެ ކޯޗެވެ. މިއީ ބައިނަލްއަގުވާމީ މުބާރާތްތަކުގެ ތެރެއިން ދެކުނު އޭޝިއާގައި ރާއްޖެ އަށް އަންހެން ފުޓްބޯޅަ އިން ލިބުނު ފުރަތަމަ މެޑަލް އެވެ.
