އިންޑިއާ އާއި ރާއްޖެއާ ދެމެދު އޮންނަ ގާތް ގުޅުމާމެދު ސުވާލު އުފައްދައި އެ ގުޅުމުގެ ސަބަބުން ރާއްޖޭގެ މިނިވަންކަމާއި އިސްތިގުލާލަށް ނުރައްކާވާކަމަށް ބުނެ ދޮގު މައުލޫމާތު ފަތުރާތީ ދިވެހި ސަރުކާރުން މިއަދު ކަންބޮޑުވުންފާޅުކޮށްފި އެވެ.
ދިވެހި ފަސްގަނޑުގައި އިންޑިއާ ސިފައިން ބޭތިއްބުމަށް މަސައްކަތް ކުރަމުންދާކަމަށް ތުހުމަތުކޮށް، އެކަމާ ދެކޮޅަށް އިދިކޮޅު ޕީޕީއެމް/ޕީއެންސީ ކޯލިޝަނުން އަންނަނީ "އިންޑިއާ އައުޓް"ގެ ނަމުގައި ވަރުގަދަ ކެމްޕޭނެއް ހިންގަމުންނެވެ.
އެގޮތުން، އައްޑޫގައި ޕޮލިސް އެކޭޑެމީއެއް އެޅުން ފަދަ މަޝްރޫއުތަކުގެ އިތުރުން އިންޑިއާގެ ކޮންސިޔުލޭޓެއް އަޅަނީ އެ ބޭނުމުގައި ކަމަށް ބުނެ އެ އަތޮޅުގެ ޕީޕީއެމް މެމްބަރުން ވެސް ދަނީ ކަންބޮޑުވުންފާޅު ކުރަމުންނެވެ.
އަދި އުތުރުތިލަފަޅުގައި ދިވެހި ކޯސްޓްގާޑަށް ޑޮކްޔާޑަކާއި ބަނދަރެއް އިންޑިއާ ސަރުކާރުން އަޅައިދެނީ ހަތިޔާރާއެކު އިންޑިއާ ސިފައިން އެތަނުގައި ތިބެވޭ ގޮތަށް ކަމަށް ވެސް ވަނީ ތުހުމަތުކޮށްފަ އެވެ.
އޭގެ އިތުރުން، ހދ. ހަނިމާދޫގެ އެއާޕޯޓު ތަރައްގީކުރާއިރު އެތަނުގައި އިންޑިއާގެ ވައިގެ ސިފައިން ތިބޭނެ ކަމުގެ އަޑުތަކެއް ވެސް ވަނީ ފެތުރިފަ އެވެ.
އިންޑިއާއާއެކު މި ސަރުކާރުން ސޮއިކޮށްފައިވާ އަސްކަރީ ބައެއް އެއްބަސްވުންތަކުގެ މައުލޫމާތުތައް ހާމަވެފައިވާ ދަނޑިވަޅެއްގައި، ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ރާއްޖޭގެ މިނިވަންކަން ގެއްލޭކަމަށް ބުނެ "އިންޑިއާ އައުޓް"ގެ ނަމުގައި ފަތުރަނީ ހަގީގަތާ ހިލާފު ވާހަކަތަކެއް ކަމަށެވެ.
އެ ބަޔާނުގައި ބުނި ގޮތުގައި އިންޑިއާއިން ދޭ އެހީގެ ސަބަބުން ރާއްޖޭގެ ކަނޑުގެ ސަރަހައްދު ބެލެހެއްޓުމާއި ސަލާމަތާއި ރައްކާތެރިކަން ކަށަވަރުވެ، ސީދާ ގޮތުން ދިވެހި ރައްޔިތުންނަށް މަންފާވާ ކަމަށެވެ.
މީގެ އިތުރުން، މަތުސްވާތަކެތީގެ ވިޔަފާރިއާއި ޓެރަރިޒަމް ހުއްޓުވުމަށް ވެސް އިންޑިއާއިން އެހީތެރިވަމުންދާ ކަމަށް ބުންޏެވެ.
ނަމަވެސް، އިންޑިއާއާ ދެކޮޅަށް އެފަދަ ދޮގު މައުލޫމާތު ފަތުރައިގެން ރާއްޖެއާ އެންމެ ގާތް ގައުމާއެކު އޮންނަ ގުޅުން ހީނަރުކުރަން މަސައްކަތް ކުރަނީ ދިވެހިންގެ ތެރެއިން މަދު ބައެއް ކަމަށް އެ ބަޔާނުގައި ތުހުމަތުކޮށްފައި ވެއެވެ.
"އެހެންކަމުން ހުރިހާ ފަރާތްތަކުން ވެސް ޒިންމާދާރުކަމާއެކު އަމަލުތައް ބަހައްޓައި، ހަގީގަތާ ހިލާފު ފަތުރައިގެން އަވަށްޓެރި ގައުމުތަކާއި ބައިނަލްއަގުވާމީ މުޖުތަމައުއާއެކު ރާއްޖޭން ގާއިމުކޮށްފައިވާ ގުޅުންތައް ހީނަރުކަން އަންނަ ގޮތަށް އަމަލުނުކުރަން ގޮވާލަން،" އެ ބަޔާނުގައި ބުންޏެވެ.
އަދި އެފަދަ ކަންކަން ރިޕޯޓުކުރާއިރު، މީޑިޔާތަކުން ވެސް ނޫސްވެރިކަމުގެ މިންގަނޑުތައް ހިފެހެއްޓުމަށް ވެސް ސަރުކާރުން ވަނީ ގޮވާލައިފަ އެވެ.
