ލަންޑަން (17 ނޮވެމްބަރު) - ސައުދީ އަރަބިއްޔާގެ އިންވެސްޓަރުންތަކެއް އިނގިރޭސި ޕްރިމިއާ ލީގުގެ ނިއުކާސަލް ޔުނައިޓަޑް ގަތުމާއެކު، ކުރިމަތިވި ޕްރެޝަރުތަކާހެދި ޕްރިމިއާ ލީގުގެ ޗެއާމަން ގެރީ ހޮފްމަން އިސްތިއުފާ ދިނުމަށް ނިންމައިފި ކަމަށް މީޑިއާ ރިޕޯޓްތަކުން ބުނެފި އެވެ.
ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ނިއުކާސަލް ގަތުމާއެކު، އިނގިރޭސި ޕްރިމިއާ ލީގުގެ ކްލަބުތަކުން ވަނީ މިދިޔަ މަހު ޕްރިމިއާ ލީގަށް ޝަކުވާ ހުށަހަޅައިފަ އެވެ. ކްލަބުތަކުގެ އެންމެ ބޮޑު އެއް ޝަކުވާ އަކީ، ޕްރިމިއާ ލީގު ކްލަބުތައް ގަންނަ ވެރިންނާއި ޑައިރެކްޓަރުން ފުރިހަމަކުރަންޖެހޭ "އޯނަޝިޕް ޓެސްޓް" އިން، ނިއުކާސަލްގެ އާ މެނޭޖްމަންޓް ފާސްވުމުންނެވެ. އިންސާނީ ހައްގުތަކާ ހިލާފުވުމުގެ ގިނަ ތުހުމަތުތަކެއް ސައުދީ އަރަބިއްޔާގެ ދައުލަތަށް އަމާޒުވެފައިވާއިރު، ޕްރިމިއާ ލީގު ކްލަބުތަކުގެ ވެރިންގެ "އޯނަޝިޕް ޓެސްޓް" ހަރުކަށި ކުރުމަށް އެމްނެސްޓީ އިންޓަނޭޝަނަލް އިން ވެސް ވަނީ ގޮވާލައިފަ އެވެ.
ޕީއައިއެފް އަށް ނިއުކާސަލްގެ ހިންގުން ލިބުމާއެކު، ޕްރިމިއާ ލީގުގެ ކްލަބުތަކުގެ އެންމެ ބޮޑު ޕްރެޝަރެއް ކުރިމަތިވީ ހޮފްމަންއަށެވެ. ޕްރިމިއާ ލީގުގެ ޗެއާމަންކަމާ ހޮފްމަން ހަވާލުވީ މީގެ 18 މަސް ކުރިންނެވެ. ޕްރިމިއާ ލީގުގެ ޗެއާމަންކަމުން އިސްތިއުފާ ދޭނެ ކަމަށް ހޮފްމަން ރަސްމީކޮށް އިއުލާންނުކުރިޔަސް، ކުރިއަށް އޮތް ދުވަސްތަކުގެ ތެރޭގައި އޭނާ އެކަން ރަސްމީކޮށް އިއުލާންކުރާނެ ކަމަށް މީޑިއާ ރިޕޯޓްތަކުން ބުނެ އެވެ.
ޕީއައިއެފް އިން ނިއުކާސަލް ގަތުމަށް ހުށަހެޅި ބިޑް ހުއްޓުވުމަށް ޕްރިމިއާ ލީގަށް ކުރެވޭނެ މާބޮޑު ކަމެއް ނެތަސް، ކްލަބުތަކުން ހިތްހަމަނުޖެހުނީ ކްލަބުތަކަށް އެކަން ކުރިން އަންގާފައި ނެތުމުންނެވެ. ކްލަބުތަކުން ގަބޫލްކުރާ ގޮތުގައި، ކުރިން ކްލަބުތަކުގެ ސަމާކުކަމަށް އެކަން އެންގި ނަމަ، އެ ބިޑު ހުއްޓުވުމަށް ކްލަބުތަކަށް މަސައްކަތްކުރެވޭނެ އެވެ. -- ބީބީސީ
