އިއްޔެ ހަވީރު ހައިކޯޓުން އެ އިއްވީ ޕްރޮސެކިއުޓާ ޖެނެރަލް އަލްއުސްތާޒް ހުސެއިމް ޝަމީމް ހިތްހަމަޖެހިވަޑައިގަންނަވާނެ ހުކުމެކެވެ؛ ސީލައިފް ފްލެޓްތަކުގެ މައްސަލައިގައި އެތައް ދައުވާ އުފުލާފައިވާ އެ ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އަންމަޓީ) ކަފާލާތުގެ ދަށުން ދޫކޮށްލަން ކްރިމިނަލް ކޯޓުން ކުރި ހުކުމް، ބާތިލްކުރީ އެވެ. އަންމަޓީ ދޫކޮށްލުމުން އެ ހުކުމަށް ޝަމީމް ވަރަށް ބޮޑަށް ފާޑުވިދާޅުވި އެވެ. އެކަމަކު އިއްޔެ ހުކުމް އިއްވަވަމުން ހައިކޯޓުގެ ފަނޑިޔާރު މުހައްމަދު ނިޔާޒް ވަނީ ޝަމީމަށް އަމާޒުކުރައްވައި ވަރަށް ބޮޑަށް ފާޑުވިދާޅުވެ ފިޔަވަޅު އަޅާނެކަމުގެ އިންޒާރު ވެސް ދެއްވައިފަ އެވެ.
ފަނޑިޔާރު ނިޔާޒް ހިތްހަމަނުޖެހިވަޑައިގަތީ، އަންމަޓީ ދޫކޮށްލަން ކްރިމިނަލް ކޯޓުން ނިންމުމުން އެކަމާ ދެކޮޅަށް ޝަމީމް މީޑިއާގައި ދެއްކެވި ވާހަކަތަކާ އެވެ. އެ މައްސަލަ ބެއްލެވި ކްރިމިނަލް ކޯޓުގެ ގާޒީ ހަސަން ސައީދަށް އިޝާރާތްކުރައްވައި ޝަމީމް އެ ދުވަހު ވިދާޅުވީ "ދަށުކޯޓުގެ ހަމަ އެންމެ ފަނޑިޔާރަކަށް، ޖާމިނުކުރެވޭގޮތް ސާފުވެވަޑައިގެންފައި ނެތުމަކީ އެންމެންގެ ވަގުތު ގެއްލޭކަމަކަށްވެއްޖެ" ކަމަށެވެ.
ޝަމީމް ވިދާޅުވީ "ޖާމިނުވުމުގެ މަފްހޫމް ފަނޑިޔާރަށް ކިޔައިދެވޭތޯ، ތަފާތު ދެ މައްސަލައެއްގައި ލައްކަ މަސައްކަތް ކުރެވިއްޖެ" ކަމަށާއި، އެކަން ކާމިޔާބު ނުވި ކަމަށެވެ. އަދި އެ އުސޫލު ގާނޫނުގައި އެކަން ވަރަށް ސާފުކޮށް އޮތްކަން ފާހަގަކުރައްވާ އެ ގާޒީގެ ނިންމެވުމާއި ގުޅިގެން ވަރަށް ބޮޑަށް ހިތްހަމަނުޖެހުން ފާޅުކުރެއްވި އެވެ.
އެ ވާހަކަތަކަށް އިޝާރާތްކުރައްވައި ހައިކޯޓުގެ ފަނޑިޔާރު ނިޔާޒް އިއްޔެ ހުކުމް އިއްވަވަމުން ވިދާޅުވީ އެއީ ފިޔަވަޅު އަޅަން ޖެހިދާނެ އަމަލެއް ކަމަށެވެ. ނިޔާޒް ވިދާޅުވީ ޕްރޮސިކިއުޝަންގެ ފަރާތުން މީޑިއާގައި އާއްމުކޮށް ކޮށްފައިވާ ކޮމެންޓްތަކެއް ކަމަށް ބުނެ ހުށަހެޅި ލިޔުންތަކެއް ހިމެނިފައި ހުރި ކަމަށާއި، އެއީ ތަރުހީބު ދޭ ކަމެއް ނޫން ކަމަށެވެ. އަދި އެއީ ޑިމޮކްރަޓިކް މުޖްތަމައަކުން ގަބޫލު ކުރާ އުސޫލަކަށް ވާނެ ކަމުގައިވެސް ބަލައި ނުގަނެވޭނެ ކަމަށް ވިދާޅު އެވެ.
މީގެ އިތުރުން "ވަކިވަކި ފަނޑިޔާރުންގެ ޒާތަށް ނިސްބަތްވާ ގޮތަށް ސޯޝަލް މީޑިއާގެ ވަސީލަތްތައް ބޭނުންކޮށްގެން، ފުރައްސާރައަކަށް ވެދާނެ ގޮތަކަށް ކަންކަން ކުރުމާއި މައްސަލައިގެ މައުލޫ ކޯޓުގައި ހިނގަހިނގާ އޮއްވައި، އެ މައުލޫގައި ކޯޓުން ބޭރުގައި ވަކިގޮތަކަށް އާންމުކޮށް ވާހަކަ ދެއްކުމާއި މި ކަންކަމަކީ ގާނޫނު ދައްކާފައިވާ މަގެއް ކަމަށް ނުދެކޭ”ކަމުގައި ވެސް ނިޔާޒް ވިދާޅުވި އެވެ.
"ކޯޓަކަށް ނުވަތަ ފަނޑިޔާރެއްގެ ކުރިމައްޗަށް އެކަމާމެދު ގޮތެއް ނިންމުމަށް ހުށަހެޅިފައިވާ ކަންކަމާ މެދު ޕަބްލިކްގައި ކޮމެންޓް ކުރުމަކީ ކޯޓު ކޮންޓެމްޕްޓްގެ ތެރެއިން ފިޔަވަޅު އަޅަންޖެހިދާނެފަދަ ކަމެއްކަން ދަންނަން ޖެހެ އެވެ،" ނިޔާޒުގެ ރައުޔުގައިވެ އެވެ. ނިޔާޒް ވަނީ ކޯޓުގައި ހިނގަމުންދާ މައްސަލައަކާ ގުޅިގެން ދައުލަތުގެ ފަރާތުން އެކަންކަމުގައި، އާއްމުންނަށް ފެންނާނެހެން ވާހަކަނުދެއްކެވުމަށް އިލްތިމާސްކުރައްވައިފަ އެވެ.
titledesc
ހައިކޯޓުން އިއްޔެ ހުކުމްކުރީ އެއްބަނޑު އެއްބަފާ ދައްތަ އާއި ކޮއްކޮ ޖާމިނު ކުރުމަށްފަހު ކަފާލާތުގެ ދަށުން އަހުމަދު މޫސާ ދޫކޮށްލަން އެ މައްސަލަ ބެއްލެވި ގާޒީ ހަސަން ސައީދު ނިންމެވުމުން ގުޅިގެން، އެ ހުކުމް ޕީޖީ އޮފީހުން ހައިކޯޓުގައި އިސްތިއުނާފުކުރުމުންނެވެ.
އަންމަޓީ
އެ މައްސަލަ ހައިކޯޓުގައި ބެއްލެވީ ފަނޑިޔާރު ޝުއައިބު ހުސައިން ޒަކަރިއްޔާ ރިޔާސަތުގައި އިންނަވައިގެން ފަނޑިޔާރު އަބްދުﷲ ހަމީދާއި ފަނޑިޔާރު ނިޔާޒްއާ އެކު އެވެ. އެހެން ނަމަވެސް ރިޔާސަތު ބެލެހެއްޓެވި ފަނޑިޔާރު ޝުއައިބުގެ ރައުޔާއި، ބެންޗުގައި ހިމެނިވަޑައިގަންނަވާ އަނެއް ދެ ފަނޑިޔާރުންގެ ރައުޔު ތަފާތުވުމުން އަންމަޓީ ވަނީ އަލުން ބަންދުކޮށްފަ އެވެ.
އަންމަޓީ އަލުން ބަންދުކުރުމަށް އެންގުމުގައި ހައިކޯޓުން ރިޔާއަތް ކޮށްފައިވާ ކަންކަން
އިސްތިއުނާފް ކުރެވުނު ފުރަތަމަ ނުކުތާ
ކްރިމިނަލް ކޯޓުގެ ނިންމުން ގޯސް ކަމަށް ބުނެ، ދައުލަތުން އިސްތިއުނާފްކޮށްފައިވާ ފުރަތަމަ ނުކުތާގައި ވަނީ އަންމަޓީ ކަފާލާތުގެ ދަށުން މިނިވަންވުމަށް ހަރުދަނާ އަސާސެއް ދެއްކިފައި ނުވާ ކަމަށާއި، އެ ނިންމުން ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދާއި ހިލާފު ކަމަށެވެ.
އަދި އަންމަޓީއަކީ މީގެ ކުރިން ތަހުގީގަށް ފިލައިގެން އުޅުނު މީހެއް ކަމަށްވުމުން، ކަފާލާތުގެ ދަށުން އޭނާ ދޫވެފައި ހުންނަ މުއްދަތުގައި ފިލައިފާނެ ކަމުގެ އިހްތިމާލު އޮތް ކަމަށް ވެސް ބުނެފައިވެ އެވެ.
ފަނޑިޔާރު ޝުއައިބުގެ ރައުޔު
އަންމަޓީ ފިލައިގެން ދިއުމުގެ އިހުތިމާލު ނައްތައިލެވޭނެ ނުވަތަ ކުޑަކުރެވޭނެ އިތުރު ހަރުދަނާ ފިޔަވަޅުތަކާއެކު ބަންދަށް ލުޔެއް ދިނުމަށް މައްސަލަ މައުލޫއީ ގޮތުން ބައްލަވާ ގާޒީއަށް ހުރަހެއް އޮތްކަމުގައި ނުދެކޭކަމަށް ފަނޑިޔާރު ޝުއައިބުގެ ރައުޔުގައިވެ އެވެ. އަދި އޭނާ ބަންދުން ދޫކޮށްލާފައިވަނީ، ކޯޓަށް ހާޒިރުރުވާނެކަން ކަށަވަރުކުރުމަށް ފިޔަވަޅުތަކެއް އަޅައި، ގާޒީއަށް ލިބިފައިވާ ތަގްދީރީ ބާރުގެ ދަށުން ޖިނާއީ އިޖުރާތާއި ޝަރީއަތް ކުރުމާއި ބެހޭ ގަވާއިދާއި އެއްގޮތްވާ ގޮތުގެ މަތިން ކަމަށް ވެސް އެ ރައުޔުގައި ބުނެފައި ވެއެވެ.
ފަނޑިޔާރު ޝުއައިބުގެ ރައުޔުގައިވާ ގޮތުން މިއީ ކަފާލާތުގެ ދަށުން ދޫކުރެވިދާނެ ބާވަތުގެ މައްސަލައެކެވެ. އަދި ދައުލަތުން ވެސް އެކަމަށް އިންކާރު ނުކުރާ ކަން ފަނޑިޔާރު ފާހަގަކުރެއްވި އެވެ.
ފަނޑިޔާރު ނިޔާޒުގެ ރައުޔު
ފަނޑިޔާރު އަބްދުﷲ ހަމީދުވެސް ތާއީދު ކޮށްފައިވާ މި ރައުޔުގައިވާ ގޮތުން އަންމަޓީ ކަފާލާތުގެ ދަށުން ދޫކޮށްލާފައި ވަނީ ފިލާފާނެ ކަމުގެ އިހުތިމާލްތައް ނައްތާނުލަ އެވެ. އެގޮތުން މިއީ ކަފާލާތުގެ ދަށުން ދޫކުރެވޭނެ ބާވަތުގެ މައްސަލައެއް ނޫންކަން ފާހަގަކުރައްވަމުން ފަނޑިޔާރު ނިޔާޒް ވިދާޅުވީ މި މައްސަލައަކީ އަންމަޓީގެ މައްޗަށް ތުހުމަތު ކުރެވޭ ހިޔާނާތަކީ އެތައް މީހެއްގެ ހައްގަށް ގެއްލުންވެފައިވާ މައްސަލައެއް ކަމަށެވެ.
އެގޮތުން އޭނާ ފިލައިގެން ދާނެ އިހްތިމާލު ނައްތާލެވިފައި ނުވާ ކަމަށް ފަނޑިޔާރު ދެކިވަޑައިގަނެ އެވެ. އެއީ އޭނާގެ ޕާސްޕޯޓެއް އޮތްކަން ނުވަތަ ނެތްކަން، ނުވަތަ މުއްދަތު ހަމަވެފައިވޭތޯ ވެސް ޕްރޮސިކިއުޝަނުން ޝަރީއަތުގައި ސާފުކޮށްދީފައި ނުވާތީ އެވެ. އަދި އޭނާގެ ނަމުގައި ކިތައް ޕާސްޕޯޓު އޮތްތޯ އާއި އޭނާ ދަތުރު ކުރުމަށް ރަސްމީ އެނޫން އެހެން ލިޔުމެއް ބޭނުންކުރޭތޯ އިމިގްރޭޝަނަށް ލިޔެގެން ދައުލަތުން ސާފުކޮށްފައި ނުވާތީ ކަމަށް ފަނޑިޔާރު ވިދާޅުވި އެވެ.
މީގެ އިތުރުން މީގެ ކުރިން ތަހުގީގަކަށް ފިލައިގެން އޭނާ އުޅެފައިވާތީ އާއި، ތަހުގީގަށް ހާޒިރު ނުވެވޭނެކަން ފުލުހަށް އަންގާފައި ވާތީ ފިލާފާނެ ކަމުގެ އިހްތިމާލު އޮތް ކަމަށް ބޮޑަށް ބުރެވެވޭކަން ފަނޑިޔާރު ފާހަގަކުރެއްވި އެވެ. އަދި ފިލައިގެން ގޮސްފި ނަމަ އަނބުރާ މި ރާއްޖެ ނުގެނެވިދާނެ ކަމުގެ އިހްތިމާލު ވެސް ބޮޑުކަން ފާހަގަކުރައްވަމުން ވިދާޅުވީ، އެފަދަ ހާލަތެއް ތަސައްވަރުކުރާއިރު، ފައިސާގެ ގޮތުން ގެއްލުން ލިބުނު ފަރާތްތަކުގެ ހައްގަށް އުނިކަމެއް ލިބޭތީ އަންމަޓީގެ ހައްގަށް އެކަނި ރިޔާއަތްކޮށް ކަފާލާތުގެ ދަށުން ދޫކުރުމުގައި އަމަލުކޮށްފައިވާ ގޮތް ގާނޫނީ ގޮތުން ބަލައިނުގަނެވޭ ކަމަށެވެ.
އިސްތިއުނާފް ކުރެވުނު ދެވަނަ ނުކުތާ
މި ނުކުތާގައި ފާހަގަކޮށްފައި ވަނީ އަންމަޓީ ޖާމިނުކުރި އޭނާގެ ކޮއްކޮއާއި ދައްތަގެ ކިބައިގައި ފުރިހަމަވާން ޖެހޭ ޝަރުތުތައް ފުރިހަމަވޭތޯ ކްރިމިނަލް ކޯޓުގެ ގާޒީ ހަސަން ސައީދު ކަށަވަރުކުރައްވާފައި ނުވާ ކަމަށެވެ. އަދި ޖާމިނުވި ދެމީހުން ކްރިމިނަލް ކޯޓަށް ހާޒިކޮށް ސުވާލުކޮށްފައި ވީނަމަވެސް، ހަމައެކަނި ސުވާލު ކުރުމަކުން އެމީހާގެ ކިބާގައި ޝަރުތުތައް ފުރިހަމަ ވާކަން ކަށަވަރު ނުކުރެވޭ ކަމަށާއި، ލިޔުމުން އެ ހޯދާފައި ނުވާ ކަމަށް ދައުލަތުގެ އިސްތިއުނާފީ މި ނުކުތާގައިވެ އެވެ.
ފަނޑިޔާރު ޝުއައިބުގެ ރައުޔު
ޖާމިނުވާ ފަރާތުގެ ޝަރުތުތައް ފުރިހަމަ ނުވާކަން ދަށުކޯޓަށް ސާބިތުނުކޮށްދެވޭ ހިނދު އެ ޝަރުތުތައް ފުރިހަމަވާނެ ކަމަށް ބެލެވޭނެ ކަމަށް ޝުއައިބު ވިދާޅުވި އެވެ. އަދި ކުށުގެ ތުހުމަތުގައި ބަންދުކުރެވޭ މީހާގެ ބަންދާއި މެދު ފަނޑިޔާރު ގޮތެއް ކަނޑައަޅުއްވާއިރު، ތުހުމަތުގައިވާ މީހާގެ ފަރުދީ މަސްލަހަތާއި އެމީހާގެ ހައްގުތައް ރައްކާތެރިކުރެވޭނެ ގޮތް ތަކެއްގެ މައްޗަށް ވެސް ރިއާޔަތްކޮށް މި ދެ މަސްލަހަތު ބެލެންސް ކުރެވޭނެގޮތެއްގެ މައްޗަށް ބައްލަވަން ޖެހޭނެ ކަމަށް ވެސް ވިދާޅުވި އެވެ.
ފަނޑިޔާރު ނިޔާޒުގެ ރައުޔު
ފަނޑިޔާރު އަބްދުﷲ ހަމީދު ވެސް ތާއީދު ކޮށްފައިވާ މި ރައުޔުގައި ވާގޮތުން ޖާމިނުވާ ދެމީހުންގެ ޝަރުތުތައް ކަށަވަރު ކުރަންޖެހެނީ ވަސީލަތްތައް ގާއިމްވެފައި ހުރިނަމަ އެ ވަސީލަތެއް މެދުވެރިކޮށެވެ. އެފަދަ ވަސީލަތެއް ނެތްނަމަ ޖާމިނުވާ މީހާގެ ބަސް ލިޔުމުން ހޯދައިގެން ކަމަށް އެ ދެ ފަނޑިޔާރުން ވެސް ދެކެވަޑައިގަތެވެ. އަދި އެމީހާގެ ބަސް ލިޔުމުން ހޯދުމުގެ ކުރިން އެކަން ކަށަވަރު ކުރެވޭނެ ވަސީ ލަތްތަކުގެ ބޭނުން ކުރަންޖެހޭނެ ކަމަށްވެސް ގަބޫލުކުރައްވަ އެވެ.
އައްމަޓީގެ މައްޗަށް ދައުލަތުން ހިޔާނާތުގެ 42 ދައުވާއެއް ކުރެ އެވެ. އެ ހުރިހާ ދައުވާތަކެއް ސާބިތުވެއްޖެނަމަ އޭނާގެ މައްޗަށް 65 އަހަރުގެ ޖަލު ހުކުމެއް އަންނާނެ އެވެ. މި ހުރިހާ ދައުވާއަކަށްވެސް އޭނާ ވަނީ އިންކާރު ކޮށްފަ އެވެ.
