ސިޑްނީ، އޮސްޓްރޭލިއާ (ނޮވެމްބަރު 15) - ދޯހާ އެއާޕޯޓުގައި ބަލައި ފާސްކުރި ގޮތާ މެދު ހިތްހަމަނުޖެހި، ބަދަލު ހޯދަން އެދި، އަންހެނުންތަކެއް ކޯޓަށް ދާން ނިންމައިފި އެވެ.
މިދިޔަ އަހަރުގެ ފަހުކޮޅު ގަތަރު އެއާވޭޒްގެ 10 ފްލައިޓެއްގައި ތިބި އަންހެނުންތަކަކަށް "ގައިނޮކޮލިޖަލް ސާޗް" އަށް އެއްބާރުލުން ދޭން މަޖުބޫރުވި އެވެ. އޭގެ ތެރޭގައި އޮސްޓްރޭލިއާގެ 13 މީހުން ހިމެނެ އެވެ.
އެފަދަ ގޮތަކަށް އަންހެން ޕަސަންޖަރުން ބަލައި ފާސްކުރަން ނިންމީ އެއާޕޯޓުގެ ފާހާނާގެ ތެރޭގައި ވިހެއި ގޮތަށް ދޫކޮށްލާފައި އޮތް ތުއްތު ކުއްޖެއްގެ މަންމަ ދެނެގަތުމުގެ ގޮތުންނެވެ.
އެ ހާދިސާއާ ގުޅިގެން އެކި ގައުމުތަކުން ގަތަރަށް ފާޑުކިޔުން އަމާޒުކުރި އެވެ. އަދި 2022 ވަނަ އަހަރުގެ ފީފާ ވޯލްޑް ކަޕްއާ ދިމާކޮށް ގިނަ އަދަދެއްގެ ބޭރު ރައްޔިތުން އެ ގައުމަށް ދަތުރު ކުރަން ހަމަޖެހިފައި ވާއިރު، އަންހެނުންނާ މެދު އަމަލުކުރާ ގޮތާ ގުޅިގެން ކަންބޮޑުވުން ފާޅުކުރި އެވެ.
ސިޑްނީގައި ހުންގާ މާކް ލޯޔާޒް ކުންފުނީގެ ޑޭމިއެން ސްޓާކޭޒާ ވިދާޅުވީ ބަލައި ފާސްކުރި އޮޕަރޭޝަނަށް އެއްބާރުލުން ދޭން ޖެހުނު ހަތް އަންހެނަކު ކޯޓަށް ދާން ނިންމާފައިވާ ކަމަށެވެ.
"މީގެ އަހަރެއްހާ ދުވަސް ކުރިން ހިނގާ ދިޔަ އެ ކަންތަކާ ހެދި މި އަންހެނުންތަކަށް ވަނީ ވަރަށް ބޮޑެތި ނުތަނަވަސްކަމާއި ޓްރޯމާއާ ކުރިމަތިވެފައި. މިހާރު ވެސް އެ މީހުން އުޅެނީ އެ ވިސްނުންތަކުގައި."
ސްޓާކޭޒާ ވިިދާޅުވީ އަންހެން މީހުން ޑިމާންޑު ކުރަނީ ގަތަރުގެ ކަމާ ބެހޭ އިދާރާތަކުން މައާފަށް އެދި، ފައިސާގެ ބަދަލު ދީ، ކުރިމަގުގައި އެއާޕޯޓު ބޭނުން ކުރާ ޕަސެންޖަރުންގެ ރައްކާތެރިކަން ކަށަވަރު ކުރުން ކަމަށެވެ.
އެ ހާދިސާ އަށް ފަހު އަމާޒުވި ފާޑުކިޔުމާ އެކު ގަތަރުން ބުނީ ޕަސެންޖަރުންގެ "ސަލާމަތާއި ރައްކާތެރިކަން" ކުރިމަގުގައި ޔަގީންކޮށްދޭނެ ކަމަށެވެ.
ގަތަރުގެ ބޮޑު ވަޒީރު އެކަމާ ގުޅިގެން މައާފަށް ވެސް އެދިވަޑައިގެންނެވި އެވެ. "ގައިނޮކޮލޮޖިކަލް ސާޗް" ހިންހުމުގައި އިސްކޮށް އުޅުނު ފުލުހަކާ މެދު ފިޔަވަޅު ވެސް އެޅި އެވެ.
ސްޓާކޭޒާ ވިދާޅުވީ ގަތަރުގެ ސިވިލް އޭވިއޭޝަން އޮތޯރިޓީ އާއި ހަމަދް އިންޓަނޭޝަނަލް އެއާޕޯޓާއި ގަތަރު އެއާވޭޒް އާއި ގަތަރު ސަރުކާރާ ދެކޮޅަށް ދައުވާ އުފުލާނީ އޮސްޓްރޭލިއާގައި ކަމަށެވެ.
