ހަމްޕު ފުރަތަަމަ އެގާރަ އަށް ނުލަނީ އެއްކޮށް ފިޓްނުވާތީ

ސާފް ޗެމްޕިއަންޝިޕްގައި ލަންކާ މެޗުގެ ތެރެއިން ހަމްޕު ބޯޅަ ކޮންޓްރޯލްކުރަނީ.-- ފޮޓޯ: ހުސެއިން ވަހީދު/ އަދަދު

ސާފް ޗެމްޕިއަންޝިޕްގައި ލަންކާ މެޗުގެ ތެރެއިން ހަމްޕު ބޯޅަ ކޮންޓްރޯލްކުރަނީ.-- ފޮޓޯ: ހުސެއިން ވަހީދު/ އަދަދު

ސްރީ ލަންކާގައި މިހާރު ކުރިއަށްދާ ފޯ ނޭޝަންސް ކަޕްގައި މިހާތަނަށް ރާއްޖޭން ކުޅުނު ދެ މެޗުގައި ހަމްޒާ މުހައްމަދު (ހަމްޕު) ކުޅެން ނާރުވަނީ އެއްކޮށް ފިޓްނުވާތީ ކަމަށް ގައުމީ ކޯޗު ފްރެންޗެސްކޯ މޮރިއޭރޯ ބުނެފި އެވެ.

ހަމްޕު އަށް އަނިޔާވީ މިދިޔަ މަހު އުރީދޫ ސާފް ޗެމްޕިއަންޝިޕްގައި މިދިޔަ މަހު 13 ވަނަ ދުވަހު އިންޑިއާއާ ދެކޮޅަށް ކުޅުނު މެޗުގަ އެވެ. އެ މެޗަށް ފަހު ހަމްޕުގެ ކަކުލަށް ތަދުވާތީ ހެދި ޓެސްޓްތަކުން އެނގުނީ ސީރިއަސް އަނިޔާއެއް ނެތް ނަމަވެސް ކަކޫ ކައިރީ މަސްގަނޑަށް ލިބިފައި އިން އަނިޔާއިން ރަނގަަޅުވާން މުއްދަތެއް ނަގާނެ ކަމެވެ. އެ އަނިޔާއިން މި ފަހަރުގެ މުބާރާތުގެ ކުރިން ރިކަވާވާނެ ކަމަށް ކުރިން ބެލެވުނެވެ.

މިދިޔަ މަހު ގައުމީ ޓީމުން ހދ.ކުޅުދުއްފުށީ ދަނޑު ހުޅުވަން ކުޅުނު މެޗާއި ޅ. ކުރެންދޫ ރިސޯޓްގައި ކުޅުނު މެޗުތަކުގައި ވެސް ހަމްޕު ނުކުޅެ އެވެ. އަދި މި ފަހަރުގެ ފޯ ނޭޝަންސް ކަޕްގައި ރާއްޖޭން މިހާތަނަށް ކުޅުނު ދެ މެޗުގައި ވެސް ހަމްޕު ކުޅެން އެރީ ބަދަލެއްގެ ގޮތުގަ އެވެ. ފުރަތަަމަ މެޗުގައި ލަންކާއާ 4-4 އިން އެއްވަރުވިއިރު، ދެ ވަނަ މެޗުގައި ވަނީ ބަންގްލަދޭޝް އަތުން 2-1 އިން ބަލިވެފަ އެވެ.

Advertisement

މާދަމާ ސީޝެލްސްއާ ދެކޮޅަށް ކުޅޭ މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި ހަމްޕު ފުރަތަމަ އެގާރައިގައި ބޭނުންނުުކުރަނީ ކީއްވެތޯ އެހުމުން މޮރިއޭރޯ ބުނީ އޭނާ އަކީ ޓީމުގެ ކޯޗު ކަމަށާއި ޓީމުގައި ކުޅޭނެ ކުޅުންތެރިން ނިންމަނީ އޭނާ ކަމަށެވެ.

"ހަމްޕު އަކީ ވަރަށް މުހިއްމު ކުޅުންތެރިއެއް. އެކަމަކު ވިސްނަން ޖެހޭ ކަަމަކީ ހަމްޕު އެ އަންނަނީ އަނިޔާ އަކުން ރިކަވާވަމުން. އަހަރެން ފުރަތަމަ އެގާރައިގައި މި ބޭނުންކުރަނީ 100 ޕަސެންޓް ފިޓް ކުޅުންތެރިން. އެހެންވެ، ހަމްޕު ފުރަތަމަ އެގާރައިގައި މި ބޭނުންނުކުރަނީ،" މޮރިއޭރޯ ބުންޏެވެ.

މޮރިއޭރޯ ބުނީ އޭނާ އެއްވެސް ކުޅުންތެރިއަކު ތަފާތެއް ނުކުރާ ކަމަށެވެ.

"އަހަރެން އެއްވެސް ކުޅުންތެރިއަކު ތަފާތެއް ނުކުރަން. ހުރިހާ ކުުޅުންތެރިން އަހަންނަށް ހަަމަހަމަ. ފުރަތަމަ އެގާރަ އެކޭ ފަހުން އެ އަރާ ކުޅުންތެރިއެކޭ އެއްވަރު،" މޮރިއޭރޯ ބުންޏެވެ.

މިދިޔަ މަހުގެ ސާފް ޗެމްޕިއަންޝިޕްގައި ރާއްޖޭގެ އެޓޭކިން ގޭމްގައި އެންމެ ބޮޑަށް ތަފާތު ދެއްކި ކުޅުންތެރިއަކީ ހަމްޕު އެވެ. އޭނާ ނެތުމުގެ މައްސަލަތައް އެޓޭކްގައި ފެނެ އެވެ. ހަމްޕުގެ އިތުރުން ނާއިޒް ހަސަން (ދާދު) އަށް ފުރުސަތު ނުލިބުމަކީ ވެސް ގިނަ ބަޔެއްގެ ކަންބޮޑުވުމެކެވެ.

މޮރިއޭރޯ ބުނީ ކުޅެން ނެރެނީ އޭނާގެ ޕްލޭނަށް ފެތޭ އެ މެޗެއްގެ ހާލަތަކަށް އެންމެ ރަނގަޅު ކުޅުންތެރިން ކަމަށެވެ.

ފޯ ނޭޝަންސް ކަޕްގެ ލީގު ބުރުގެ ފަހު ދެ މެޗަށްދާއިރު، އެއް ވަަނައިގައި އޮތް ބަންގްލަދޭޝާއި ދެ ވަނައިގައި އޮތް ސީޝެލްސް އަށް ވަނީ ހަތަރު ޕޮއިންޓް ލިބިފަ އެވެ. ތިން ވަނައިގައި އޮތް ރާއްޖެ އާއި ހަތަރު ވަނައިގައި އޮތް ލަންކާ އަށް ދެ މެޗުން ވަނީ ޕޮއިންޓެއް ލިބިފަ އެވެ. ކޮންމެ ޓީމަކަށް ވެސް ފައިނަލުގެ ޖާގަ ހޯދުމުގެ ފުރުސަތު އޮތީ ހުޅުވިފަ އެވެ.

ލީގު ބުރުގެ ފަހު ދެ މެޗު މާދަމާ ކުޅޭއިރު، ހަވީރު ކުޅޭނީ ސީޝެލްސް އާއި ރާއްޖެ އެވެ. ދެ ވަނަ މެޗުގައި މާދަމާރޭ ލަންކާ ކުޅޭނީ ބަންގްލަދޭޝްއާ އެވެ. ބަންގްލަދޭޝާއި ސީޝެލްސް އަށް އެ މެޗުތައް އެއްވަރުކޮށްލައިގެން ވެސް ފައިނަލުގެ ޖާގަ ލިބޭނެ އެވެ. ރާއްޖެ އާއި ލަންކާ އަށް ފައިނަލަށް ދެވޭނީ އެ މެޗުތަކުން މޮޅުވެގެންނެވެ. ހަތަރު ޓީމު ޕޮއިންޓް އެއްވަރުވެއްޖެ ހާލަތެއްގައި ބަލާނީ ލަނޑުގެ ތަފާތަށެވެ.

ރާއްޖެ އާއި ސީޝެލްސް ކުޅޭ މެޗު ފަށާނީ މާދަމާ ހަވީރު ރާއްޖެ ގަޑިން 15:30 ގަ އެވެ.

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox