ސޯޝަލް މީޑިއާ ޕްލެޓްފޯމް ފޭސްބުކްގައި ޓެރަރިޒަމް ފެތުރުމަށް ފުޅާ ދާއިރާއެއްގައި މަސައްކަތް ކުރި ކަމަށް ބުނާ އަދި ޓެރަރިސްޓު ޖަމާއަތް އައިސިސްގެ ފަރާތުން ފައިސާ ހޯދި ކަމަށް ތުހުމަތު ކުރެވޭ ހދ. ނޭކުރެންދޫ، ޝާޒިން، އަހުމަދު މުނާޒް ނުވަތަ "އަބޫ ޔޫސުފް" އާ ދެކޮޅަށް ކޯޓަށް ހުށަހަޅާފައި އޮތީ އެމެރިކާގެ ސްޓޭޓް ޑިޕާޓްމަންޓުން ތައްޔާރުކޮށްފައިވާ ވަރުގަދަ ރިޕޯޓުތަކެއްކަން ހާމަވެއްޖެ އެވެ.
މުނާޒުގެ މައްޗަށް ދައުލަތުން ކުރާ ޓެރަރިޒަމްގެ އަމަލެއް ކުރުމަށް ހިތްވަރުދިނުން އަދި ޓެރަރިޒަމަށް ފައިނޭންސް ކުރުމުގެ ދައުވާގައި ބުނެފައި ވަނީ އަބޫ ޔޫސުފްގެ ނަމުގައި އޭނާ ހިންގި ފޭސްބުކް އެކައުންޓަކުން ދައުލަތަށް ޓެރަރިޒަމްގެ އިންޒާރުދީފައިވާ ކަމަށެވެ. އަދި ޓެރަރިޒަމްގެ ކުށް ސާބިތުވެފައިވާ މީހެއްގެ އަތުން ވެސްޓާން ޔޫނިއަން މެދުވެރިކޮށް މުނާޒު ބޭރުން ފައިސާ ހޯދާފައިވާ ކަމަށް ވެސް ދައުވާގައި ބުނެ އެވެ.
އެ މައްސަލައިގައި މިއަދު ބޭއްވި އަޑުއެހުމުގައި މުނާޒާ ދެކޮޅަށް ދައުލަތުން ހުށަހަޅާފައިވާ ތިން ރިޕޯޓެއް ހާމަކޮށްދިނުމަށް އޭނާގެ ވަކީލު ހުސްނީ މުބާރަކް އެދިވަޑައިގަތެވެ. ނަމަވެސް ގާޒީ އިސްމާއިލް ޝަފީއު ނިންމެވީ ކިތާބީ ހެކި ސިއްރު ކުރުމަށް ކުރިން މައްސަލަ ބެއްލެވި ގާޒީ ނެރުއްވާފައިވާ އަމުރުތައް މުރާޖައު ނުކުރެއްވުމަށެވެ.
މުނާޒާ ދެކޮޅަށް އެ މައްސަލައިގައި ހުށަހަޅާފައި ވަނީ އެއް ހެކިވެރިއެއްގެ ހެކި ބަހާއި ކިތާބީ ހެއްކެވެ. ކިތާބީ ހެކީގެ ގޮތުގައި ހުށަހަޅާފައިވާ ރިޕޯޓުތަކުގެ ތެރޭގައި އެމެރިކާގެ ޑިޕާޓްމަންޓް އޮފް ސްޓޭޓް އިން މުނާޒުގެ ހަރަކާތްތައް ބެލުމަށްފަހު ތައްޔާރުކޮށްފައިވާ ރިޕޯޓެއް ހިމެނެ އެވެ.
އެމެރިކާގެ ސްޓޭޓް ޑިޕާޓްމަންޓުގެ ރިޕޯޓާއި އިތުރު ކިތާބީ ހެކިތައް ހާމަ ނުކުރުމަށް ނިންމެވި ނަމަވެސް މުނާޒާއި ވަކީލު ކޯޓަށް ހާޒިރުވެ، އެ ހެކިތައް ބަލައި މުރާޖަައު ކުރުމުގެ ފުރުސަތު ދެއްވުމަށް ގާޒީ ޝަފީއު ނިންމެވި އެވެ.
މިއަދުގެ އަޑުއެހުމުގައި މުނާޒާ ދެކޮޅަށް ކުރާ ތުހުމަތުތަކަށް ރައްދު ދެއްވަމުން އޭނާގެ ދިފާއީ ވަކީލު ވިދާޅުވީ ފޭސްބުކްގައި މުނާޒު ހިންގި ކަމަށް ބުނާ އެކައުންޓުން ކޮށްފައިވާ މުއާމަލާތްތަކުން އޭނާއަށް ޓެރަރިޒަމްގެ ދައުވާ ކުރެވިދާނެ ކަމަށް ނުބެލެވޭ ކަމަށެވެ.
ވެސްޓަން ޔޫނިއަން މެދުވެރިކޮށް ބޭރުން މުނާޒު ފައިސާ ހޯދިކަން ވަކީލު ދޮގެއް ނުކުރައްވަ އެވެ. ނަމަވެސް ވިދާޅުވީ އެއީ މުނާޒު ފޭސްބުކްގައި "ސަލާންޖަހައިގެން" ހޯދި ފައިސާ ކަމަށެވެ. އަދި ޓެރަރިޒަމްގެ އަމަލެއް ހިންގޭނެ ވަރަށްވުރެ ކުޑަ އަދަދެއްގެ ފައިސާ ކަމަށް ވެސް ވަކީލު ވިދާޅުވި އެވެ.
މިއަދުގެ އަޑުއެހުމުގައި ޝަރީއަތް ނިމެންދެން މުނާޒު ބަންދުކޮށް ބެހެއްޓުމަށް ނެރެފައިވާ އަމުރު ގާޒީ ވަނީ ދަމަހައްޓަވައިފަ އެވެ. މާފުށީ ޖަލުގައި ބަންދުކޮށްފައި ހުރި މުނާޒަށް ޖަލު ބަލައި ފާސް ކުރުމަށް ކަރެކްޝަންސްގެ ފަރާތުން ހިންގި އޮޕަރޭޝަނެއްގައި އަނިޔާވެފައިވާ ކަމަށާއި ގަވާއިދުން ބޭސް ފަރުވާ ނުކުރެވޭތީ ޝަރުތުތަކަކާއެކު އޭނާ ޖަލުން ދޫކުރުމަށް ދިފާއީ ވަކީލު އެދިވަޑައިގަތެވެ.
މުނާޒު ބަންދުން ދޫނުކުރި ނަމަވެސް އޭނާގެ ބޭސްފަރުވާގެ ކަންތައް ކަށަވަރު ކުރުމަށް ގާޒީ ޝަފީއު ދައުލަތަށް އަމުރު ކުރެއްވި އެވެ. އަދި މިއަދުގެ އަޑުއެހުން ގާޒީ ނިންމާލެއްވީ އަންނަ ޖެނުއަރީ މަހުގެ ކުރިން ހުކުމް ކުރެއްވުމަށް މަސައްކަތް ކުރައްވާނެ ކަމަށް ވިދާޅުވުމަށްފަހު އެވެ.
