ޑީސީ ކޮމިކްސްގެ ކެރެކްޓާ "ޖޯކަރު" ގެ ކޮސްޓިއުމެއް ލައިގެން ހުރި މީހަކު މި މަހުގެ ކުރީކޮޅު ޖަޕާނުގެ ރޭލެއްގެ ތެރޭގައި ހަމަލާދީ 17 މީހުން ޒަހަމްކޮށްލި ހާދިސާ އިން އެ ގައުމަށް ލިބުނީ ޝޮކެކެވެ.
ޖަޕާނަކީ ދުނިޔޭގެ އެންމެ ރައްކާތެރި ގައުމުތަކުގެ ތެރޭގައި މަޝްހޫރު ގައުމަކަށް ވާތީ، މިފަދަ ހަމަލާއެއް ކުރިމަތިވުމުން ގިނަ ބަޔަކު އަންނަނީ ޖަޕާނުގެ މުޖުތަމައު ބަދަލުވަމުންދާ ގޮތާ މެދު ސުވާލު އުފައްދާފަ އެވެ.
"ޖޯކަރު" ކޮސްޓިއުމް ލައިގެން ހުރި އުމުރުން 24 އަހަރުގެ ފިރިހެނަކު ރޭލުގެ ތެރޭގައި ވަޅިން ހަމަލާ ދިނުމުން އެއް ބަޔަކު ބުނަމުން ދަނީ ސަބްވޭގައި ދަތުރު ކުރުން ރައްކާތެރި ނޫން ކަމަށެވެ.
ހަމަލާ އަކީ "ޖޯކަރު" ފިލްމުގައި ފެނުނު މަންޒަރެއްގެ ކޮޕީއެއް ކަމަށް ދޭހަވާތީ ޖަޕާނުގެ މީޑިއާތަކުން ވަނީ އޭނާ ފަދަ އިތުރު މީހުން ހަމަލާ ދޭން ރޭވުމުގެ ފުރުސަތު އޮތް ތޯ ވެސް ސުވާލު އުފައްދާފަ އެވެ.
ރިޕޯޓުތައް ބުނާ ގޮތުން ހަމަލާ ދިން މީހާ ފުލުހުންނަށް ބުނީ އޭނާ "އަޅުކަން ކުރަނީ ޖޯކަރު ކެރެކްޓާ" އަށް ކަމަށާއި "ބޭނުމީ ވީ އެންމެ ގިނަ ބަޔަކު މަރަން" ކަމަށެވެ.
ނަމަވެސް ކުށްވެރިންގެ ސައިކޮލޮޖީގެ ދާއިރާ އިން ކިޔަވައިގެން ތިބި މީހުން ބުނާ ގޮތުގައި އޭނާގެ މަގްސަދަކީ ފިލްމު ކޮޕީ ކުރުމުގެ ބަދަލުގައި ސަމާލުކަން ހޯދުމެވެ.
"އޭނާ ބޭނުންވީ އެންމެންނަށް ވުރެ ތަފާތު ވާން،" ޓޯކިޔޯ މިރާއީ ޔުނިވާސިޓީގެ ކްރިމިނަލް ސައިކޮލޮޖިސްޓް ޕްރޮފެސަރު ޔަސުކުޔި ޑެގުޗި ބީބީސީ އަށް ބުންޏެވެ.
ގިނަ އަދަދެއްގެ ކްރިމިނަލް ސައިކޮލޮޖިސްޓުންނާ އިންޓަވިއު ކުރުމަށް ފަހު ބީބީސީން ބުނީ އެއީ ނަފްސާނީ މައްސަލައެއް ހުރި "ސައިކޯޕެތެއްގެ" ހަމަލާއެއް ނޫން ކަމަށް އެންމެން ވެސް އެއްބަސް ކަމަށެވެ.
އެގޮތުން ނަފްސާނީ މައްސަތައް ހުންނަ މީހުން، އެއް ފަހަރާ ގިނަ ބަޔަކަށް ހަމަލާ ދިނުން ނާދިރެވެ. އެއާ ހިލާފަށް މިފަދަ އަމަލުތައް އާއްމުކޮށް ހިންގަނީ މުޖުތަމައުގައި "ބާކީވާ" މީހުންނެވެ.
"އިޖުތިމާއީ ގޮތުން އެކަހެރިވުން ނުވަތަ އިޖުތިމާއީ ގުޅުންތައް ކެނޑިގެން ދިޔުމަކީ އެއް ފަހަރާ ގިނަ ބަޔަކު މެރުމާއި އެހެން ސީރިއަސް ކުށްތަކަށް މަގުފަހިވާ ސަބަބެއް،" ސުކުބާ ޔުނިވާސިޓީގެ ޕްރޮފެސަރު ޓަކަޔުކި ހަރަޑާ ބުންޏެވެ.
"އެއީ ތިމާގެ މީހެއް، ލޯބިވާ މީހެއް، ވަޒީފާއެއް، އިޖުތިމާއީ ގުޅުމެއް ނެތް މީހުން. އެ މީހުން މުޖުތަމައު ދެކެ ފޫހިވެ، މުޖުތަމައުއާ މެދު ނަފުރަތު ކުރޭ. އެފަދަ ބައެއް މީހުން އަމިއްލަ އަށް މަރުވުމުގެ ވިސްނުން ގެންގުޅޭ."
"ޖޯކަރު" ހަމަލާ ދިން މީހާގެ މާ ބޮޑު ތަފްސީލެއް އަދި އާއްމުވެފައެއް ނުވެ އެވެ.
"ޖޯކަރު" ކޮސްޓިއުމްގައި ހުރެ ހަމަލާ ދިން މީހާ. -- ފޮޓޯ: އީޕީއޭ
މިދިޔަ އޯގަސްޓު މަހުން ފެށިގެން ޓޯކިޔޯގައި ސަބްވޭ ނިޒާމުގެ ތެރޭގައި މިގޮތަށް ތަފާތުން ތިން ހަމަލާއެއް ދީފައި ވެ އެވެ. އެހެންކަމުން ކުރިއާ ހިލާފަށް ނުރައްކާތެރި ކުށްތައް އިތުރުވަމުންދާ ކަމަށް ބައެއް މީހުން ބުނެ އެވެ.
ސައިކޮލޮޖިސްޓުން ބުނާ ގޮތުގައި ކޮވިޑު ބަލިމަޑުކަމާ ހެދި އިގްތިސާދީ ގޮންޖެހުންތައް ކުރިމަތިވެ، އިޖުތިމާއީ އެކަހެރިކަމުގައި އުޅެން ޖެހުމުގެ ސަބަބުން ނުރައްކާތެރި ހާލަތްތަކުގައި ތިބި މީހުންގެ ފަރާތުން މިފަދަ އަމަލުތައް ފެންނަ މިންވަރު އިތުރުވެފައިވުމަކީ އެކަށީގެންވާ ކަމެކެވެ.
