ކުޑަކުދިންނަށް ކުރާ ޖިންސީ އަނިޔާގެ މައްސަލަތަކުގައި ދައުވާ ކުރަން ފޮނުވި މައްސަލަތަކުގެ 82 ޕަސެންޓު މައްސަލަ ކޯޓުތަކުގައި ނިމިފައި ނުވާ ކަމަށް ޕްރޮސިކިއުޓާ ޖެނެރަލް (ޕީޖީ) ހުސެއިން ޝަމީމް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ޝަމީމް ވިދާޅުވީ މިދިޔަ ތިން އަހަރު ދުވަހު ތެރޭގައި ޖުމްލަ 409 މައްސަލަ ހުށަހަޅާފައިވާ ކަމަށެވެ.
އެގޮތުން 2019 ވަނަ އަހަރު 71 މީހެއްގެ މައްޗަށް 101 ދައުވާ ކޮށްފައިވާއިރު މިދިޔަ އަހަރު 158 މީހެއްގެ މައްޗަށް 192 ދައުވާ ކޮށްފައިވާ ކަމަށް ޕީޖީ ވިދާޅުވި އެވެ. އަދި މި އަހަރު އޮކްޓޫބަރުގެ ނިޔަލަށް 83 މީހެއްގެ މައްޗަށް 116 ދައުވާ ކޮށް، ކޯޓަށް ހުށަހަޅާފައިވާ ކަމަށް ޕީޖީ ވިދާޅުވި އެވެ.
"2019 ވަނަ އަހަރާ އަޅާބަލާއިރު ވަރަށް ބޮޑު ކުރިއެރުމެއް ގެނެވިއްޖެ. މި ބާވަތުގެ މައްސަލަތައް ވެސް މީހުން އިތުރު ކުރާ މިނަވަރު އިތުރު ވެއްޖެ. ހެކި ހޯދޭ ވަރުވެސް އިތުރު ވެއްޖެ. އަދި ކޯޓަށް ހުށަހެޅޭ ވަރުވެސް އިތުރުވެއްޖެ،" ކަމަށް ޕީޖީ ވިދާޅުވި އެވެ.
މިދިޔަ ތިން އަހަރު 209 މީހުންގެ މައްޗަށް ހުށަހެޅުނު 409 ދައުވާ ހުށަހެޅިފައިވައިރު އޭގެ ތެރެއިން 82 ޕަސެންޓް މައްސަލަ އަދި ކޯޓުގައި ނުނިމި އޮތް ކަމަށް ޕީޖީ ވިދާޅުވި އެވެ.
ނިމިފައިވަނީ 17 މީހެއްގެ މައްޗަށް 21 މައްސަލައެކެވެ. އެއީ މިދިޔަ އަހަރުގެ 12 މައްސަލައަކާއި 2019 ވަނަ އަހަރުގެ ނުވަ މައްސަލައެކެވެ.
"އަޅުގަނޑުމެން މި އަންދާޒާ ކުރަނީ މި އަހަރު ނިމެންވާއިރަށް 140 ވަރަކަށް މީހުންގެ މައްސަލަ ނިންމާ ދައުވާ ކުރެވޭނެ ކަމަށް،" ޕީޖީ ވިދާޅުވި އެވެ.
