ގާނާގެ ވޮލްޓާ ސަރަހައްދަށް އުދަ އެރުމުގެ ސަބަބުން 500 އަށް ވުރެ ގިނަ ގެއަށް އަސަރުކޮށް 3000 މީހުން އެހެން ތަންތަނަށް ބަދަލުވާން ޖެހިއްޖެ އެވެ.
ކަނޑުގެ ލޮނުގަނޑު އުފުލުމުގެ މައްސަލަ އަކީ ހުޅަނގު އެފްރިކާ އަށް އޮތް ކަންބޮޑުވުމެކެވެ. ގާނާގައި މިހާރު ވެސް ގިނަ ބަޔަކު އައްސޭރިފަށުގެ ސަރަހައްދުތައް ދޫކޮށް ވަނީ ހިޖުރަކޮށްފަ އެވެ.
ގާނާގެ ނޭޝަނަލް ޑިޒާސްޓާ މެނޭޖްމަންޓް އޯގަނައިޒޭޝަނުން ބުނީ އުދަ އެރުމުގެ ސަބަބުން ތިން ޑިސްޓްރިކްޓެއްގެ ގެތަކަށް އެކިވަރުގެ ގެއްލުންވި ކަމަށެވެ. އެގޮތުން 522 ގެއަކުން 3000 އަށް ވުރެ ގިނަ މީހުން އެހެން ތަންތަނަށް ބަދަލުވާން ޖެހުނެވެ.
އެ އިދާރާ އިން ބުނީ ބައެއް ގެތައް އެއްކޮށް ހަލާކުވެފައި ވާއިރު ސްކޫލަކާއި ގަބުރުސްތާނަކަށް ވެސް ބޮޑެތި ގެއްލުންތައް ލިބިފައިވާ ކަމަށެވެ.
މިއީ މި އަހަރު ގާނާ އަށް އުދަ އެރި ތިން ވަނަ ފަހަރެވެ. އަދި އުދައިގެ އަސަރު އެންމެ ބޮޑަށް ކޮށްފައި ވަނީ މި ފަހަރު އެވެ.
ގާނާގެ އައްސޭރިފަށުގެ ސަރަހައްދުގެ ދިގުމިނަކީ 550 ކިލޯމީޓަރެވެ. އެ ގައުމުގެ އާބާދީގެ ހަތަރު ބައި ކޮށްފައި އެއް ބައި މީހުން ދިރިއުޅެނީ އައްސޭރިފަށުގެ ހިސާބުތަކުގަ އެވެ.
ކަނޑުގެ ލޮނުގަނޑު އުފުލުމުގެ ސަބަބުން އުދަ އެރުން އަވަސްވެ، އަރާ ރާޅުގެ ބާރު ގަދަވަމުން ދާތީ ގާނާ ސަރުކާރުން ވަނީ "ސީ ޑިފެންސް" މަޝްރޫއެއް ވެސް ފަށާފަ އެވެ.
އދ. އިން ބުނާ ގޮތުގައި އެފްރިކާގައި ވަރަށް ފަގީރު ހާލަތުގައި ދިރިއުޅޭ 100 މިލިއަނަށް ވުރެ ގިނަ މީހުންނަށް މޫސުމީ ބަދަލުގެ ނުރައްކާތެރި އަސަރުތައް ދަނީ ކުރަމުންނެވެ.
