ޗީޒްއަކީ އެއާ ނުލާ މީރު ކެއުމެއް ފުރިހަމަ ނުވާނެ ފަދަ ބާވަތެކެވެ. ޕާސްޓާ، ޕިއްޒާ, ބާގާ, ނުވަތަ ސީޒާ ސެލެޑަކަށްވެސް ހެޔޮ ވަރު ވަރަކަށް ރަހަމީރު ޗީޒެއް އެޅުމުން މުޅިން އެހެން ލެވަލް އަކަށް އެ ކެއުމެއްގެ ރަހަ ގެންގޮސްދެ އެވެ. ނަން ހުސްކޮސް އެކި ވައްތަރުގެ ޗީޒް މިހާރު އަހަރެމެންގެ ތެރޭގައިވެސް ލިބެން އެބަހުއްޓެވެ. އޭގެ ތެރެއިން ހަށިގަނޑަށް އެންމެ ފައިދާ ބޮޑީ ކޮން ޗީޒެއް ހެއްޔެވެ؟
ރިކޯޓާ ޗީޒް
މި ސުވާލުގެ އެމެރިކާގެ ޑައިޓީޝަނުންތަކަކާއި ކުރެވުމުން ލިސްޓުގެ އެންމެ ކުރިއަށް އައި ޗީޒް އަކީ ރިކޯޓާ އެވެ. ރިކޯޓާ ގެ މާނައަކީ "އަލުން ކައްކާފައި" ވުމެވެ. މަޝްހޫރު ޑައިޓީޝަން ކާސްޓްރޯ މޯޓިލަރީ ބުނާގޮތުން އޮތެންޓިކް ރިކޯޓާ އަކީ ކިރު ނެގުމަށްފަހު ބާކީ ހުންނަ އެތިކޮޅުން ހަދާ ޗީޒް އެކެވެ. ރިކޯޓާގައި އެންމެ ގިނަ އަދަދަކަށް ހިމެނެނީ ވޭ ޕްރޮޓީން އެވެ. މިއީ ހަށިގަނޑަށް ނަގައިގަތުމަށް އެންމެ ފަސޭހަ ޕްރޮޓީންއަށްވާއިރު މި މާއްދާގައި ގިނަ އަދަދަކަށް އެމިނޯ އެސިޑްސް ހިމެނެ އެވެ. އެހެންކަމުން ހަށިގަނޑުގެ މަސްތައް ވަރުގަދަކޮށް, ބަރުދަން ލުއި ކުރުމަށް މިއީ ހަމަ އެއް ވަނަ އެވެ.
ހާޑް ޗީޒް
އެކަށީގެންވާ މިންވަރަކަށް ބޭނުންކޮށްފިނަމަ ދެން ހަށިގަނޑަށް އެންމެ ފައިދާހުރި އެއް ބާވަތަކީ ހަރުކޮށް ހުންނަ ޗީޒް ތަކެވެ. މި ޗީޒްތަކުން އަހަރެމެންނާ އެންމެ ގާތްވާނީ އެކި ޕާސްޓާ ތަކަށާއި ސޫޕް އަދި ރިސޯޓޯތަކުގައި ބޭނުންކުރާ ޕާމަޒަން ޗީޒް އަށެވެ. ހަރުކޮށް ހުންނަ ޗީޒްތަކުގައި ފެން މަދުވެ ކޮންސަންޓްރޭޝަން ގިނަ ވުމުގެ ސަބަބުން ގިނަ އަދަދަކަށް ކެލްސިއަމް އެކުލެވެ އެވެ. އެހެން ނަމަވެސް މިފަދަ ޗީޒްތަކުގައި ހިމެނޭ ސޯޑިއަމް ކޮންޓެންޓް ވެސް އިތުރުވާތީ ކެއުމުގައި ވީހާވެސް މެދުމިންވަރެއް އިހުތިޔާރުކުރުން އެދެވިގެންވެ އެވެ.
ބަރުދަން މެއިންޓެއިން ކުރުމަށް ޗީޒް
ކިރިޔާވެސް ބަރުދަނާ މެދު ސަމާލުވާނަމަ ޗީޒް އަކީ ގާތް ގުޅުމެއް ބާއްވަންޖެހޭ މުހިންމު ބާވަތެކެވެ. މިފަދަ ފަރާތްތައް ބޭނުންކުރަން ޖެހެނީ ޕްރޮޓީން އިން މުއްސަނދި އަދި ފެޓްސްގެ ބައި މަދު ޗީޒްގެ ބާވަތްތަކެވެ. މިގޮތުން ލައިޓް ސްވިސް ޗީޒް, ލައިޓް ޗެޑާ ޗީޒް އަކީ ބޭނުންކުރެވިދާނެ ބައެއް އޮޕްޝަންތަކެކެވެ.
ޑައިޓީޝަނުން ބުނާ ގޮތުގައި އަހަރެމެންގެ ކެއުމުގައި ހިމެނޭ ކޮންމެ 100 ކެލަރީއަކަށް 10 ގްރާމް ޕްރޮޓީންއެއް ކެއުމުގައި ހިމަނަންޖެހެ އެވެ. މިއީ ނިކަން ފަސޭހައިން އެކި ޗީޒްތަކުން އަހަރެމެންނަށް ލިއްބައިދޭނޭ އަދަދެކެވެ.
ނުކާންވީ ކޮން ޗީޒެއް؟
ޑައިޓީޝަނުންގެ ހިޔާލުގައި އެކި ކަހަލަ ޕްރޮސެސްޑް ޗީޒްއާ, ސްލައިސްޑް އެކި ޗީޒްތަކާޢި ދަޅުގައި ބަންދުކޮށްފައި ހުންނަ ޗީޒްތަކުގެ އިތުރަށް ފްރިޖަށްވެސް ލާންނުޖެހޭ ޗީޒް ބްލޮކްތަކަކީ ކޮންމެހެންވެސް ދުރުހެލިވާންޖެހޭ ބާވަތްތަކެކެވެ. ހަމައެޔާއެކު ފިތައިގެން އަންނަ ގޮތަށް ތައްޔާރުކުރެވިފައިވާ ޗީޒްތަކާއި އެމެރިކަން ޗީޒް އާއި ކްރީމް ޗީޒް ފަދަ ބާވަތްތަކުގައި ގިނައިން ހިމެނެނީ ފެޓްގެ ބާވަތްތަކެވެ. އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން އިން މިފަދަ ބައެއް ތަކެތި ޗީޒްގެ ގޮތުގައި ކްލެސިފައި އެއްވެސް ނުކުރެ އެވެ.
ރޯ ނުވަތަ އަން ޕާސްޗަރައިޒްޑް ކިރުން ތައްޔާރުކުރާ ފެޓާ, ގޯޓް ޗީޒް ފަދަ ބާވަތްތަކަކީ ހަށިގަނޑަށް ބޭނުންވާ ޕްރޮބައޮޓިކްސްވެސް ގިނަ އަދަދަކަށް ހިމެނޭ ބާވަތްތަކެވެ.
ކަންމިހެން ހުރިކަމުގައި ވިޔަސް ދުނިޔޭގެ ކޮންމެ ހިސާބެއްގައިވެސް ކޮލިޓީ ރަނގަޅު ޗީޒްއަކީ އަގުބޮޑު އެއްޗެކެވެ. އެހެންކަމުން ގިނަ ބަޔަކަށް އަބަދުވެސް ބޭނުންކުރެވެނީ ކޮންމެވެސް ކަހަލަ ޕެކޭޖްޑް ޗީޒް އެކެވެ. އެހެން ނަމަވެސް މިފަދަ ހާލަތްކުގައިވެސް ވަކި މިންވަރަކަށް ޗީޒް ބޭނުންކުރަން ސަމާލުކަން ދޭން ޖެހެ އެވެ.
