ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހައްޔަރު ކުރުމަށް އިދިކޮޅު ކޯލިޝަނުން ރާއްޖޭގެ ސަލާމަތީ ބާރުތަކަށް ގޮވަލައިފި އެވެ.
އެގޮތަށް ގޮވާލީ އިންޑިއާ ސިފައިން ބޭރުކުރަން ގޮވާލާ އިދިކޮޅު ޕްރޮގްރެސިވް ކޯލިޝަނުން މިއަދު ހަވީރު ބޭއްވި "މިނިވަންކަމުގެ ދިފާއުގައި" ހިނގާލުމުގަ އެވެ.
އެ ހަރަކާތުގައި މާލެ ސިޓީގެ މޭޔަރު ޑރ. މުހައްމަދު މުއިއްޒު އާއި ޕީއެންސީގެ ރައީސް އަބްދުއްރަހީމް އަބްދުﷲ ފަދަ އިދިކޮޅު ކޯލިޝަންގެ އިސް ބޭފުޅުން ބައިވެރިވެވަޑައިގެންނެވި އެވެ.
އެ ހިނގާލުމުގައި ވާހަކަ ދައްކަވަމުން އަބްދުއްރަހީމް ވިދާޅުވީ ދިވެހި ސިފައިންނަކީ ގައުމުގެ ހައްގުގައި، ވާން ޖެހުނު ކޮންމެ ގުރުބާނީއެއް ވާން ތައްޔާރަށް ތިބޭ ބައެއް ކަމަށެވެ.
"އެއީ ބޭރުން އަންނަ އުދުވާނީ ހަމަލާއަކާ ކުރިމަތިލާން ޖެހުނު ކަމަށް ވިޔަސް، ގުދުރަތީ ކާރިސާއަކުން ދިވެހި ރައްޔިތުން ސަލާމަތް ކުރަން ވިޔަސް އަދި ބަޔަކު ހިންގާ ނުބައި ޖަރީމާއަކުން ދިވެހި ގައުމު ސަލާމަތް ކުރަން ވިޔަސް (ތިބޭ ބަޔެއް ސިފައިންނަކީ)،" އޭނާ ވިދާޅުވި އެވެ.
ރާއްޖޭގައި ތިބި ވެރިން ވެރިކަމުގެ ގާނޫނީ އިމުން ބޭރުވެގެން ދާއިރު އެމީހުން ގާނޫނީ އިމުގެ ތެރެއަށް ވައްދަން ރާއްޖޭގެ ސަލާމަތީ ބާރުތަކަށް ލާޒިމްވާ ކަމަށް އަބްދުއްރަހީމް ވިދާޅުވި އެވެ.
"އެ މީހުން ގާނޫނީ އިމުގެ ތެރެއަށް ނުވަދެއްޖެ ނަމަ އެމީހުން ހިފާ ހައްޔަރުކުރަން އެބަ ޖެހޭ. ދިވެހި ގައުމުގެ ސަލާމަތާއި ރައްކާތެރި ކަމަށްޓްކައި އިބްރާހިމް މުހައްމަދު ސޯލިހު ހިފާ ހައްޔަރު ކުރުމަކީ މިއަދު ތިޔަ ބޭފުޅުން ކޮންމެހެން ކުރަން ޖެހޭނެ ކަމެއް،" އަބްދުއްރަހީމް ވިދާޅުވި އެވެ.
އޭނާ ވަނީ ދިވެހި ސިފައިންނަށް ގާނޫނީ ޒިންމާ އެ ބޭފުޅުން އަދާ ކުރައްވަން ގޮވާލާފަ އެވެ. އަދި ގައިރު ގާނޫނީ އަމުރުތަކަށް ތަބާ ނުވުމަށާއި އެންމެ ފުރަތަމަ ދިވެހި ގައުމާއި ދިވެހި ރައްޔިތުން އިސްކުރުމަށް ވެސް ގޮވާލެއްވެވި އެވެ.
އަބްދުއްރަހީމް ވަނީ އެމްޑީޕީގެ ބައެއް ބޭފުޅުން އިސްވެ ތިބެ ބަރުލަމާނީ ނިޒާމު ރާއްޖެ އަށް ގެންނަން މަސައްކަތްކުރާތީ އެކަން ކުރިޔަ ނުދިނުމަށް ވެސް ސަލާމަތީ ބާރުތަކަށް ގޮވާލައްވައިފަ އެވެ. އޭނާ ވިދާޅުވީ ޖުމްހޫރީ އުސޫލަކީ މަޝްވަރާގެ އުސޫލުން ކަންކުރާ ނިޒާމު ކަމަށާއި އެ ނިޒާމަކީ މިއަދު ދުނިޔޭގައި ވެރިކަންކުރާ ނިޒާމުތަކުގެ ތެރެއިން އެންމެ ރަނގަޅު ނިޒާމް ކަމަށެވެ. އޭނާ އެހެން ވިދާޅުވި ނަމަވެސް ބަރުލަމާނީ ނިޒާމަކީ ވެސް ޖުމްހޫރިއްޔަތުގެ ދަށުން ވެރިކަން ކުރާ ނިޒާމެކެވެ.
އިދިކޮޅުން ސިލްސިލާކޮށް ބާއްވަމުން އަންނަ "މިނިވަންކަމުގެ ދިފާއުގައި ދިވެހިން" ހަރަކާތަކީ ރާއްޖޭގައި ހަރަކާތްތެރިވާ އިންޑިޔާ ސިފައިން ރާއްޖޭން ބޭލުމަށާއި، ރާއްޖޭގެ މިނިވަންކަމާއި ސިޔާދަތަށް އުނިކަން ލިބޭ ގޮތަށް މިހާރުގެ ސަރުކާރުން ހަދަމުންދާ އެއްބަސްވުންތައް ހާމަކޮށް، އެ އެއްބަސްވުންތައް ބާތިލުކުރުމަށް ގޮވާލާ ހަރަކާތެކެވެ.
