ސްރީ ލަންކާ އާއި ރާއްޖޭގެ ދެމެދުގައި ގާއިމްކުރަން ނިންމާފައިވާ "ޔޫތު އެމްއޯޔޫ"ގެ ތެރެއިން ރާއްޖޭގެ ކުޅިވަރަށް ގިނަ އެހީތަކެއް ވާން ލަންކާ އިން އެއްބަސްވެއްޖެ އެވެ.
ލަންކާގައި މިހާރު ކުރިއަށްދާ މަހިންދަ ރާޖަޕަކްސަ ފުޓްބޯޅަ މުބާރާތާ ވަޑައިގެން މިނިސްޓަރު މަހުލޫފް މި ވަގުތު ލަންކާގައި ހުންނަވައި ދިވެހި ކުޅިވަރާއި ޒުވާނުންނަށް ފުރުސަތުތަކެއް ހޯދައިދެއްވަން އަންނަނީ އެކި ފަރާތްތަކާ މަޝްވަރާ ބައްދަލުވުންތައް ބާއްވަމުންނެވެ. ދާދި ފަހުން މިނިސްޓަރު މަހުލޫފް ވަނީ ލަންކާގެ ސްޕޯޓްސް ކައުންސިލާ ވެސް ވަނީ ބައްދަލުކުރައްވައިފަ އެވެ.
މިއަދު ލަންކާގެ ސްޕޯޓްސް މިނިސްޓަރު ނަމާލް ރާޖަޕަކްސައާ ބައްދަލުކުރައްވައި މަޝްވަރާ ކުރެވުނު ޔޫތު އެމްއޯޔޫގެ ތެރެއިން ކުޅިވަރަށް ގިނަ ފުރުސަތުތަކެއް ތަނަވަސްކޮށްދޭ ގޮތަށް ހަމަޖެހިފައިވާ ކަމަށް މަހުލޫފް ވަނީ ވިދާޅުވެފަ އެވެ.
އެމްއޯޔޫގެ ހަވާސާގެ ތެެރެއިން މި ވަގުތު ކުރަން ނިންމާފައިވާ ކަންތައްތަކަށް ބަލާއިރު، އަންނަ މަހު ލަންކާގެ ގައުމީ ވޮލީ ޓީމު ރާއްޖެ އަށް އެކުވެރިކަމުގެ މެޗުތަކެއް ކުޅެން އަންނަ ގޮތަށް ވަނީ މަޝްވަރާކޮށްފަ އެވެ. މީގެ ކުރިން 2019 ވަނަ އަހަރު ވެސް ވަނީ ދިވެހި ސަރުކާރުގެ ދައުވަތަކަށް ލަންކާގެ ގައުމީ ޓީމާ އެކު ރާއްޖޭގައި ވަނީ މެޗުތަކެއް ކުޅެފަ އެވެ.
މީގެ އިތުރުން ރާއްޖޭގެ ސާފަރުންނާއި ލަންކާގެ ސާފަރުން އެކުވެ، ލަންކާގައި ފެސްޓިވަލެއް ބޭއްވުމަށް ވާހަކަ ދެކެވިފައިވާއިރު، އަންނަ ޖެނުއަރީ މަހު ލަންކާ އާއި ރާއްޖޭގެ ދެމެދުގައި ޖޫނިއާ ޓީޓީ މުބާރާތެއް ބޭއްވުމާއި ލަންކާގެ ބީޗްވޮލީ ޓީމު ރާއްޖެ ދަތުރުކުރުން ހިމެނެ އެވެ.
އެމްއޯޔޫގެ ތެރެއިން ލަންކާގެ އެހީގައި ރާއްޖޭގެ ދެ ލޯންގް ޑިސްޓެންސް ދުވާ އެތުލީޓުން ކެންޏާ އަށް ތަމްރީން ހެދުމަށް ފޮނުވަން ވަނީ މަޝްވަރާކޮށްފަ އެވެ. ކެންޏާ އަކީ ދިގު ރާސްތާ ދުވުމުގެ އެތުލީޓުން ތަމްރީން ކުރުމުގައި ފުންނާބު އުސް ގައުމެކެވެ.
ޒުވާނުން ބިނާކުރުމާއި ތަމްރީނު ކުރުމުގެ ބޭނުމުގައި ލަންކާ އާއި ރާއްޖޭގެ އެމްއޯޔޫގެ ތެރެއިން "ޔޫތު އެކްސްޗޭންޖް" ޕްރޮގްރާމެއް ވަނީ ރާވައިފަ އެވެ. މި ޕްރޮގްރާމަށް ރާއްޖޭގެ ޒުވާނުންގެ ޓީމެއް ލަންކާ އަށް އަންނަ ގޮތަށް ވެސް ވަނީ ވާހަކަ ދެކެވިފަ އެވެ.
ދާދި ފަހުން ޔޫތު މިނިސްޓަރު މަހުލޫފް ބަހްރޭނަށް ކުރެއްވި ދަތުރުގައި ވަނީ އެ ގައުމާ އެކު ވެސް އެއްބަސްވުމެއް ހަދައި ދިވެހި ކުޅިވަރަށް ބޮޑެތި ފުުުރުސަތުތަކެއް ހޯދައިދޭން މަޝްވަރާކުރައްވައިފަ އެވެ.
