ޝައްކު އުފެދޭ ގޮތަކަށް، މަރުވެފައި އޮއްވާ ފެނުނު އައިޖީއެމްއެޗްގެ ފިލިޕީންސް ނަރުސް ގްރޭސް ޕިނޭޑާގެ ހަށިގަނޑު އާއިލާއާ ހަވާލުކުރުމަށްޓަކައި އިއްޔެ މެންދުރު އެ ގައުމަށް ފޮނުވާލާފައިވާ ކަމަށް ފުލުހުން ބުނެފި އެވެ.
އޭނާގެ ހަށިގަނޑު ގައުމަށް ފޮނުވާލީ އިންޑިއާ އަށް ފޮނުވައި ޕޯސްޓް މޯޓަމް ހެދުމަށް ފަހު އެވެ. އެ ރިޕޯޓާ ހަވާލާދީ ފުލުހުން ބުނީ އޭނާ މަރުވެފައި ވަނީ ލިބުނު ޒަހަމްތަކުގެ ސަބަބުން ކަމަށެވެ. އެކަމަކު އޭނާގެ ހަށިގަނޑު ހޮސްޕިޓަލަށް ގެންދިޔައީ ދަން ޖެހިފައި ހުއްޓާ ކަމަށް ބުނެ އޭނާގެ ފިރިމީހާ އެވެ. އެފަދަ ކަމެއްގެ ނިޝާނެއް ނެތް ކަމަށް ވެސް ރިޕޯޓާ ހަވާލާދީ ފުލުހުން ބުނެ އެވެ.
ހީމޯޑަޔަލެސިސް ނަރުހެއްގެ ގޮތުގައި މަސައްކަތް ކުރި ގްރޭސްގެ މަރުގެ މައްސަލައިގައި އޭނާގެ ފިރިމީހާ ވަނީ ހައްޔަރުކޮށްފަ އެވެ. އޭނާގެ ބަންދަށް އިތުރު 15 ދުވަސް ކްރިމިނަލް ކޯޓުން ވަނީ މިއަދު ޖަހައިފަ އެވެ.
ފިރިމީހާ ހައްޔަރުކޮށްފައި ވަނީ އޭނާގެ މަރުގައި "ބަލަންޖެހޭ އިތުރު ކަންކަން ހުރި ކަމަށް ފާހަގަ" ކުރެވޭތީ ކަމަށް ފުލުހުން ބުނެ އެވެ. ގްރޭސްގެ ފިރިމީހާ އަކީވެސް އައިޖީއެމްއެޗުގެ އީއާރުގައި މަސައްކަތް ކުރާ ފިލިޕީންސް ނަރުހެކެވެ.
ގްރޭސް އާއި އޭނާގެ ފިރިމީހާއާ ކައިވެނިކޮށްފައި ވަނީ މީގެ ފަސް އަހަރު ކުރިން 2016 ވަނަ އަހަރުގެ މެއި މަހުގެ ތެރޭގަ އެވެ.
