ގައުމީ ބެޑްމިންޓަން މުބާރާތުގައި އިއްޔެ ކުޅުނު ފުރަތަމަ ޑިވިޝަނުގެ ފިރިހެން ސިންގަލްސް މެޗުން މޮޅުވެ، މުހައްމަދު އާކިފް ކުއާޓާ ފައިނަލުން ފުރުސަތު ހޯދައިފި އެވެ.
ކުޅިވަރު އެކުވެނި ބެޑްމިންޓަން ހޯލުގައި އިއްޔެ ފެށި 47 ވަަނަ ގައުމީ ބެޑްމިންޓަން މުބާރާތުގައި އިއްޔެ ހަވީރާއި ރޭ ދެ ވަނަ ޑިވިޝަނުގެ މެޗުތަކުގެ އިތުރުން ފުރަތަމަ ޑިވިޝަނުގައި ކުޅުނީ އާކިފް އާއި ރިޝްވާން ޝިޔާމް ބައްދަލުކުރި މެޗު އެކަންޏެވެ.
ގަދަ 16 ބުރުގައި ރިވައިވަލް ސްޕޯޓްސްގެ ރިޝްވާންގެ މައްޗަށް އާކިފް ކުރިހޯދީ ފަހަތުން އަރަ އެވެ. ފުރަތަމަ ސެޓު 21-15 އިން ގެންދިޔައީ ރިޝްވާން އެވެ. އެކަަމަކު، ދެން ކުޅުނު ދެ ސެޓުގައި ކުޅުން ރަނގަޅުކޮށް އާކިފް ވަނީ މެޗުން މޮޅުވެފަ އެވެ. އާކިފް ސެޓުތައް ގެންދިޔައީ 13-21 އާއި 20-22 އިންނެވެ.
މާދަމާ ފިރިހެން ސިންގަލްސްގެ ކުއާޓާ ފައިނަލް މެޗުތައް ކުޅޭގޮތަށް ހަމަޖެހިފައިވާއިރު، ކުއާޓާގައި އާކިފް ބައްދަލުކުރަން ޖެހޭނީ ރިވައިވަލްގެ އައްފާން އަލީއާ އެވެ. އާކިފް އަކީ ގައުމީ ޓީމުގެ ޕޫލުގައި ހިމެނިގެން ރަނގަޅު ޓްރެއިިންތަކަކާ އެކުގައި ކުރިއެެރުން ހޯދަމުން އަންނަ ކުޅުންތެރިއެކެވެ.
އިއްޔެގެ މެޗުގެ ތެރެއިން ރިޝްވާން ބޯޅަ ފޮނުވާލަނީ.-- ފޮޓޯ: ހުސެއިން ޝަޔާހު/ އަދަދު
ކުއާޓާގެ އެހެން މެޗުތަކަށް ބަލާއިރު، އެންމެ ފަހުގެ ޗެމްޕިއަން އަޖުފާން ރަޝީދު ނުކުންނާނީ މި ފަހަރުގެ މުބާރާތުގައި އެއް ވަނަ އަށް ސީޑްކޮށްފައިވާ ޒަޔާން ޒަކީއާ ދެކޮޅަށެވެ. ދެ ވަނަ އަށް ސީޑްކޮށްފައިވާ ނިބާލް އަހުމަދު ކުޅޭނީ ރިވައިވަލް އިން ހައި ޕާފޯމަންސް ޓްރެއިނިން ހަދަމުން އަންނަ ހައިޝަމް އިބްރާހިމް އަލީއާ އެވެ. އަނެއް ކުއާޓާގައި އަހުމަދު ތޯއިފް މުހައްމަދު ނުކުންނާނީ އަހުމަދު ސާދިން ޖަލީލާ ދެކޮޅަށެވެ.
އަންހެން ފުރަތަމަ ޑިވިޝަނުގެ މެޗުތައް ކުޅޭނީ ސެމީ ފައިނަލާ ހަމައިންނެވެ. ފުރަތަމަ ސެމީގައި އެންމެ ފަހުގެ ޗެމްޕިއަން ފާތިމަތު ނަބާހާ ބައްދަލުކުރާނީ އައިޝަތު އަފްނާން ރަޝީދުއާ އެވެ. ދެ ވަނަ ސެމީގައި ތަޖުރިބާކާރު ކުޅުންތެރިޔާ ނީލާ ނަޖީބު ނުކުންނާނީ ރާއްޖެ އަށް އިންޓަނޭޝަނަލް ރަން މެޑަލެއް ގެނެސްދީފައިވާ އައިމިނަތު ނަބީހާއާ ދެކޮޅަށެެވެ.
މި ފަހަރުގެ ގައުމީ މުބާރާތުގެ ދެ ވަނަ ޑިވިޝަނުގެ ފިިރިހެން ސިންގަލްސްގައި 32 ކުޅުންތެރިން ވާދަކުރާއިރު، އަންހެން ބައިގައި ވާދަކުރަނީ ތިން ކުޅުންތެރިންނެވެ.
ގައުމީ ބެޑްމިންޓަން މުބާރާތް އެންމެ ފަހުން ބޭއްވީ 2019 ވަަނަ އަހަރުގެ އޮކްޓޫބަރު މަހުގަ އެވެ. މިދިޔަ އަހަރު ބެޑްމިންޓަން އެސޯސިއޭޝަނުން އަހަރީ ކަލަންޑަރެއް އެކުލަވާލައި ގައުމީ މުބާރާތް ތާވަލުކުރި ނަމަވެސް މުބާރާތް ނުބޭއްވުނީ ކޮވިޑާ ހެދި އައި މެދުކެނޑުމުގެ ސަބަބުންނެވެ.
