އެއްގަމު ދަތުރުފަތުރުގެ ގާނޫނުގެ ދަށުން ކުރާ ޖޫރިމަނާއާ ގުޅިގެން 30 ދުވަސް ތެރޭ ޝަކުވާ ހުށަހެޅުމުގެ ފުރުސަތު ދޭގޮތަށް ޓްރާންސްޕޯޓު މިނިސްޓްރީން ގަވާއިދެއް އާއްމުކޮށްފި އެވެ.
އެ ގަވާއިދުގެ ދަށުން ޖޫރިމަނާ ކުރެވޭ ފަރާތަށް 30 ދުވަސް ތެރޭ އެ ޖޫރިމަނާއާ ވިދިގެން ޝަކުވާ ހުށަހެޅުމުގެ ފުރުސަތު އޮވެ އެވެ. ގަވާއިދުގައި ބުނަނީ ގާނޫނުގެ ދަށުން ކުރެވޭ ޖޫރިމަނާއާ ގުޅިގެން ޝަކުވާ ހުށަހެޅުމުގެ ހައްގު ޖޫރިމަނާ ކުރެވިފައިވާ ކޮންމެ ފަރާތަކަށް ވެސް ލިބިގެންވާ ކަމަށެވެ.
އެހެން ނަމަވެސް، ގަވާއިދުގައި ބަޔާންކޮށްފައިވާ 30 ދުވަސް ފަހުން އެފަދަ ޝަކުވާއެއް ބަލައި ނުގަންނާނެކަމަށް ވެސް ގަވާއިދުގައިވެ އެވެ.
ގަވާއިދުގައި ވަނީ ޖޫރިމަނާގެ ޝަކުވާ ހުށަހެޅޭނެ ސަބަބުތައް ބަޔާންކޮށްފަ އެވެ.
އެ ސަބަބުތަކަކީ:
- ގާނޫނުގެ ދަށުން ޖޫރިމަނާއެއް ކުރެވިދާނެކަމުގައި ބަޔާންކޮށްފައިނުވާ ހާލަތެއްގައި ކަމަށް ވުން.
- ގާނޫނުގެ ދަށުން ޖޫރިމަނާ ކުރަންޖެހޭ ހާލަތު ނުވަތަ ސަބަބު ހަގީގަތުގައި މެދުވެރިވެފައި ނެތުން.
- ގާނޫނުގެ ޖޫރިމަނާ ކުރަންޖެހޭ ފަރާތް ނޫން އެހެން ފަރާތެއް ޖޫރިމަނާކޮށްފައި ވުން.
- ގާނޫނާ ހިލާފް އަމަލަކާ ގުޅިގެން ކުރި ޖޫރިމަނާގެ އަދަދު ސައްހަ ނުވުން.
ބަޔާންކޮށްފައިވާ މި ސަބަބުތައް ނޫނަސް ގާނޫނާ ހިލާފު އަމަލު ހިނގާފައިވަނީ ޖޫރިމަނާކުރެވުނު ފަރާތުގެ އަމިއްލަ ބާރު ނުފޯރާފަދަ މަގުބޫލު ސަބަބެއް މެދުވެރިވެގެން ކަމުގައި ވާނަމަ، އެ ޝަކުވާއެއް ބެލުމުގެ އިހުތިޔާރު މިނިސްޓްރީއަށް ލިބިގެންވާކަމަށް ވެސް ގަވާއިދުގައިވެ އެވެ.
ޝަކުވާ ހުށަހަޅަން ޖެހެނީ އެކަމަށް ހާއްސަ ފޯމެއް މެދުވެރިކޮށެވެ. އެ ފޯމުގައި ޖޫރިމަނާ ކުރި ތާރީހާއި އަދަދާއި ސަބަބުގެ އިތުރުން ޝަކުވާގެ ސަބަބު ވެސް ބަޔާންކުރުމަށް ބުނެ އެވެ. އަދި ޖޫރިމަނާކޮށްފައިވަނީ އުޅަނދަކާ ގުޅިގެންނަމަ އެ އުޅަނދެއްގެ ރެޖިސްޓްރޭޝަން މައުލޫމާތު ވެސް ހުށަހަޅަން ބުނެ އެވެ. ލައިސެންސްއާ ގުޅިފައިވާނަމަ އެ ލައިސެންސްގެ މައުލޫމާތު ވެސް ހުށަހަޅަން ގަވާއިދުގައި ވަނީ ބުނެފަ އެވެ.
ޝަކުވާ ފޯމުގައި ބަޔާންކުރާ ކަންކަން ފުރިހަމަ ނުވާނަމަ، ހުށަހެޅި ފަރާތަށް އެންގުމަށްފަހު އެ ފޯމު ބާތިލުކުރުމުގެ އިހުތިޔާރު މިނިސްޓްރީއަށް ލިބިގެންވާކަމަށް ވެސް ގަވާއިދުގައި ބުނެ އެވެ.
މިނިސްޓްރީގެ ފަރާތުން ފުރިހަމަކުރަންޖެހޭ ކަންކަން ފުރިހަމަކުރުމަށް 10 ދުވަހުގެ މުހުލަތެއް ދީފައިވާއިރު، އެ ޝަކުވާއާ ގުޅޭ ކަންކަން ފުރިހަމަކުރުމަށް ފަހު އެ ޝަކުވާއާ މެދު ގޮތެއް ކަނޑައެޅުމަށްޓަކައި މުރާޖައާ ކޮމިޓީއަށް ތިން ދުވަސް ތެރޭ ފޮނުވުމަށް ވެސް ގަވާއިދުގައި ބުނެ އެވެ.
titledesc
ކޮމިޓީން ޝަކުވާ ބެލުމަށްފަހު އެ މައްސަލައިގައި ޖޫރިމަނާކޮށްފައިވަނީ ގާނޫނާއި ގަވާއިދުތަކާއި އެއްގޮތަށް ނުވަތަ ނޫންކަމަށް ނިންމިދާނެކަމަށް ގަވާއިދުގައި ބުނެ އެވެ.
އަދި ޝަކުވާއެއް ބެލުމަށްފަހުގައި، ޖޫރިމަނާ ކޮށްފައިވާ އަދަދު ބަދަލުކުރުން ނުވަތަ ޖޫރިމަނާ ކޮށްފައިވާ ފަރާތް ނޫން އެހެން ފަރާތެއް ޖޫރިމަނާ ކުރުން ފަދަ، ޖޫރިމަނާއަށް ބަދަލުގެނައުމުގެ ނިންމުމެއް ނިންމުމުގެ ބާރު ކޮމިޓީއަށް ލިބިފައިވާކަމަށް ވެސް ގަވާއިދުގައި ބުނެ އެވެ.
ކޮމިޓީން މިފަދަ ނިންމުމެއް ނިންމާނީ، ޝަކުވާ ހުށަހެޅުމުގެ އަސާސް ފުރިހަމަވާ މިންވަރަށް ބެލުމަށް ފަހު ކަމަށް ގަވާއިދުގައި ވެ އެވެ. އަދި ކޮމިޓީން ޖޫރިމަނާއެއް ބާތިލުކޮށްފި ހާލަތެއްގައި އެ ޖޫރިމަނާއާ ވިދިގެން އެޅި އިތުރު ފިޔަވަޅުތައް ވެސް ބާތިލުވާނޭކަމަށް ގަވާއިދުގައި ބުނެ އެވެ. އެގޮތުން ލައިސަންސް ހިފެހެއްޓުން ނުވަތަ އުޅަނދު ޓޯ ކުރުން ފަދަ ފިޔަވަޅުތައް އޭގެ ދަށުން ހިމެނޭނެ އެވެ.
މި ގަވާއިދަށް މިހާރު ވަނީ އަމަލުކުރަން ފަށާފަ އެވެ.
