ހިއުމަން ރައިޓްސް ކޮމިޝަން (އެޗްއާރްސީއެމް) ގެ ރައީސް ކަމުގެ މަގާމަށް އެ ކޮމިޝަނުގެ މެމްބަރު މަރިޔަމް މުނާ އަދި ނައިބު ރައީސަކަށް ޑރ. އަހުމަދު އަދުހަމް އަބްދުﷲ އައްޔަން ކުރައްވައިފި އެވެ.
މި ދެބޭފުޅުން މިއަދު އެ މަގާމަށް ރައިސުލްޖުމްހޫރިއްޔާ އައްޔަން ކުރައްވާފައި ވާއިރު، ރައްޔިތުންގެ މަޖިލީހުން ރުހުން ލިބިފައި ވަނީ މިދިޔަ މަހުގެ 27 ގައެވެ.
ރައީސް އޮފީހުން ފާހަގަކުރި ގޮތުގައި އެ ކޮމިޝަންގެ ރައީސްއަކަށް އައްޔަން ކުރި މުނާ ވަނީ އޮސްޓްރޭލިޔާގެ އީޑިތް ކޯވަން ޔުނިވަރސިޓީގައި ބިޒްނަސް އެޑްމިނިސްޓްރޭޝަންއިން މާސްޓަރސް ޑިގްރީ ހާސިލްކުރައްވާފަ އެވެ. މީގެ ކުރިން އޭޝިއާ ޝިޕިންގ އެންޑް އިންޓަރނޭޝަނަލް ޓްރޭޑިންގ ގެ ކޯޕަރޭޓް ސެކްރެޓަރީގެ މަގާމުގައި ހުރި މުނާ މިނިވަން މުވައްސަސާތަކާއި ސަރުކާރާއި އަމިއްލަ އޮފީސްތަކުގެ އިސް މަގާމުތައް ފުރުއްވާފައިވާ ކަމަށް ރައީސް އޮފީހުން ބުނެ އެވެ.
އެޗްއާރުސީއެމްގެ ނައިބަކަށް އައްޔަން ކުރި، ޑރ. އަދުހަމްއަކީ އޮސްޓްރޭލިއާގެ ވޭލްސްގެ ޔުނިވަރސިޓީ އޮފް ވޮލޮންގޮންގް އިން ޑޮކްޓްރޭޓް އޮފް ފިލޯސޮފީ އިން ލޯ (އިންޓަނޭޝަނަލް ލޯ) ފުރިހަމަ ކޮށްފައިވާ ބޭފުޅެއް ކަމަަށް ރައީސް އޮފީހުން ބުންޏެވެ. ވިލާ ކޮލެޖުގައި ޕަބްލިކް އިންޓަރނޭޝަނަލް ލޯ ގެ ލެކްޗަރާއެއްގެ މަގާމު ފުރުއްވި އަދުހަމް، ތައުލީމާއި ތަމްރީނުގެ ކޯހަކުން ފާހަގަކޮށްލެވޭ ކާމިޔާބީއެއް ހޯދުމާއި ގުޅިގެން ރައީސުލްޖުމްހޫރިއްޔާ ދެއްވާ ހާއްސަ އިނާމް ލިބިވަޑައިގަންނަވާފައިވާ ކަމަށްވެ އެވެ.
މި ދެބޭފުޅުންވެސް އެ މަގާމަށް އައްޔަން ކުރެއްވިއިރު ތިއްބެވީ އެޗްއާރުސީއެމްގެ މެމްބަރުންގެ ގޮތުގަ އެވެ.
ކޮމިޝަނުގެ މެމްބަރުން ތިބެންޖެހޭ އަދަދަށް މެމްބަރުން އައްޔަނުނުކުރެވި ގިނަ ދުވަސްތަކެއް ވެފައި ވަނިކޮށް، ފަސްވަނަ މެމްބަރުގެ ގޮތުގައި ސަމާއު އަހުމަދު ނަޖީބު އައްޔަނުކުރައްވާފައިވަނީ މިދިޔަ މަހުގެ ތިން ވަނަ ދުވަހެވެ.
