ގްލާސްގޯ، ޔޫކޭ (ނޮވެމްބަރު 8) - މި ގަރުނު ނިމޭއިރު ދުނިޔެ ހޫނުވުން 2.9 ޑިގްރީ ސެލްސިއަސް އަށް އަރައިފި ނަމަ އެންމެ ނާޒުކު 65 ގައުމުގެ ޖީޑީޕީ ވަރަށް ބޮޑު ތަނުން ވެއްޓޭނެ ކަމަށް ދިރާސާއަކުން ދައްކައިފި އެވެ.
ގްލާސްގޯގައި މިހާރު ކުރިއަށްދާ މޫސުމީ ބަދަލާ ގުޅޭ އދ. ގެ ސަމިޓު ކޮޕް26 ގައި ނެރުނު ދިރާސާ އިން ދެއްކި ގޮތުގައި އެވްރެޖު ގޮތެއްގައި 2050 ވަނަ އަހަރާ ހަމައަށް ދާއިރު އެ ގައުމުތަކުގެ ޖީޑީޕީގެ 20 ޕަސެންޓު އަދި 2100 ވަނަ އަހަރާ ހަމައަށް ދާއިރު ޖީޑީޕީގެ 64 ޕަސެންޓު ވެއްޓޭނެ ކަމަށެވެ.
ޕެރިސް އެއްބަސްވުމުގައިވާ ފަދައިން ދުނިޔެ ހޫނުވުން 1.5 ޑިގްރީ ސެލްސިއަސްގައި ހިފެހެއްޓުނު ނަމަވެސް 2050 ވަނަ އަހަރާ ހަމައަށް ދާއިރު އެ ގައުމުތަކުގެ ޖީޑީޕީގެ 13 ޕަސެންޓު އަދި 2100 ވަނަ އަހަރާ ހަމައަށް ދާއިރު ޖީޑީޕީގެ 33 ޕަސެންޓަށް އަސަރު ކުރާނެ އެވެ.
ނަވާރަ ވަނަ ގަރުނާ އަޅާ ބަލާއިރު ދުނިޔޭގެ އެވްރެޖް ފިނިހޫނުމިން މިހާރު ހުރީ 1.1 ޑިގްރީ ސެލްސިއަސް އަށް ވުރެ މަތިވެފަ އެވެ. ކްރިސްޓިއަން އެއިޑުން އިސްނަގައިގެން ހެދި ދިރާސާ އިން ލަފާދީފައި ވަނީ ފަގީރު ގައުމުތަކަށް ވީ އެންމެ އަވަހަށް އެހީ ފޯރުކޮށްދިނުމަށެވެ.
ދުނިޔޭގެ ދެކުނުގައިވާ ގައުމުތަކުން ދެމެހެއްޓެނިވި ގޮތަކަށް މޫސުމީ ބަދަލާ ދެކޮޅަށް ތަރައްގީ ހޯދަން ކުރާ މަސައްކަތް މި ވަގުތު އޮތީ ކުރިއަށް ނުގޮސް ހުއްޓިފައި،" ދިރާސާގައި އިސްކޮށް އުޅުނު ޖަރުމަނުވިލާތުގެ ހަމްބޮލްޑްޓް ޔުނިވާސިޓީގެ މަރީނާ އަންޑްރިޖެވިޗް ވިދާޅުވި އެވެ.
މޫސުމީ ބަދަލުގެ އަސަރު އިގްތިސާދަށް އެންމެ ބޮޑަށް ކުރާނެ ކަމަށް ބެލެވޭ 10 ގައުމުގެ ތެރެއިން އަށް ގައުމު ނިސްބަތް ވަނީ އެފްރިކާ އަށެވެ. އަނެއް ދެ ގައުމުގެ ނިސްބަތް ވަނީ ދެކުނު އެމެރިކާ ބައްރަށެވެ. އެންމެ ރަނގަޅު ހާލަތުގައި ވެސް އެ ގައުމުތަކުގެ ޖީޑީޕީގެ 40 ޕަސެންޓު ގެއްލޭނެ އެވެ.
އެންމެ ބޮޑު އަސަރެއް ކުރާނެ ކަމަށް ބެލެވެނީ ސޫދާން އަށެވެ. މިދިޔަ ސެޕްޓެމްބަރު މަހު އެ ގައުމަށް ބޯކޮށް ވާރޭވެހި ފެންބޮޑުވުމުން 300،000 އަށް ވުރެ ގިނަ މީހުން ހާލުގައި ޖެހުނެވެ.
