ސުވާލު އުފެދޭ ފަދަ ގޮތަކަށް މަރުވެފައި އޮއްވާ ފެނުނު އައިޖީއެމްއެޗުގެ ފިލިޕީންސް ނަރުސް މޭރީ ގްރޭސް ޕިނޭޑާގެ ހަށިގަނޑު ޕޯސްޓްމޯޓަމްއަށްފަހު ރޭގެ ވަގުތެއްގައި މާލެ ގެނެސްފި އެވެ.
ގްރޭސްގެ ހަށިގަނޑު ޕޯސްޓްމޯޓަމް ހެދުމަށް އަވަށްޓެރި އިންޑިއާއަށް ފޮނުވާފައިވަނީ މިދިޔަ އަންގާރަ ދުވަހު އެވެ. ފުލުހުން މިއަދު ބުނި ގޮތުގައި ގްރޭސްގެ ހަށިގަނޑު ޕޯސްޓްމޯޓަމްއަށްފަހު ރޭގެ ވަގުތެއްގައި ވަނީ މާލެ ގެނެސްފަ އެވެ.
"އަދި އާއިލާއާ ހަށިގަނޑު ހަވާލުކުރުމަށް ކުރަން ޖެހޭ ކަންކަން މިހާރު ދަނީ ކުރަމުން،" ފުލުހުންގެ ތަރުޖަމާނު ވިދާޅުވި އެވެ.
ފުލުހުން އިތުރަށް ބުނި ގޮތުގައި އެ މައްސަލައާ ގުޅޭ އިތުރު މައުލޫމާތުތައް ހާމަކުރެވެން އޮތް މިންވަރަކުން ހާމަކުރާނެ އެވެ.
ހީމޯޑަޔަލެސިސް ނަރުހެއްގެ ގޮތުގައި މަސައްކަތް ކުރި ގްރޭސްގެ މަރުގެ މައްސަލައިގައި އޭނާގެ ފިރިމީހާ ހައްޔަރުކޮށްފައިވާއިރު، އުމުރުން 29 އަހަރުގެ ހަމަ ފިލިޕީންސަށް ނިސްބަތްވާ އެ މީހާއަކީ ވެސް އައިޖީއެމްއެޗުގެ އީއާރުގައި މަސައްކަތް ކުރާ ނަރުހެއްކަން އެނގިފައިވެ އެވެ.
މި މައްސަލައިގައި ފުލުހުން މީހަކު ހައްޔަރުކޮށްފައި މި ވަނީ ގްރޭސްގެ މަރުގައި "ބަލަންޖެހޭ އިތުރު ކަންކަން ހުރި ކަމަށް ފާހަގަ" ކުރެވިފައިވާ ކަމަށް ބުނުމަށްފަހު އެވެ.
އެނގިފައިވާ ގޮތުގައި ގްރޭސްއަށް އަނިޔާތަކެއް ލިބިފައިވާ ކަމުގެ ނިޝާންތަކެއް ހަށިގަނޑުން ވަނީ ފެނިފަ އެވެ.
ގްރޭސް އޭނާގެ ފިރިމީހާއާ ކައިވެނިކޮށްފައި ވަނީ މީގެ ފަސް އަހަރު ކުރިން 2016 ވަނަ އަހަރުގެ މެއި މަހުގެ ތެރޭގަ އެވެ. ގްރޭސް ކުރިން މަސައްކަތްކޮށްފައި ވަނީ ފްރެސިނިއަސް މެޑިކަލް ކެއާގަ އެވެ. އެއީ ޑަޔަލަސިސް ހެދުމާއި ކިޑްނީގެ ބަލިތަކަށް ހާއްސަ ފަރުވާދޭ ސެންޓަރެކެވެ.
ގްރޭސްގެ މަރާ ގުޅިގެން "އަދަދު"އިން ވާހަކަ ދެއްކި ބައެއް މީހުން ބުނެފައި އޭނާ މަރުވި ދުވަހު ވެސް އޭނާ ޑިއުޓީއަށް ނުކުތް ކަމަށާއި މަސައްކަތުގައި އެއްވެސް ތަފާތެއް އެ ދުވަހު ފާހަގަ ނުކުރެވޭ ކަމަށެވެ.
