ޕެރިސް (ނޮވެމްބަރު 7) - ނޭމާ އާއި ކީލިއަން އެމްބާޕޭގެ ގޯލުތަކާ އެކު 3-2 އިން ބޯޑޯ ބަލިކޮށް ޕީއެސްޖީން ފްރެންޗް ލީގުގެ އެއް ވަނައިގައި ލީޑު ދަމަހައްޓައިފި އެވެ.
ފްރެންްޗް ލީގުގެ އެއް ވަނައިގައި ޕީއެސްޖީ އޮތީ 13 މެޗުން 34 ޕޮއިންޓާ އެކު އެވެ. ދެ ވަނައިގައި އޮތީ 13 މެޗުން 24 ޕޮއިންޓާ އެކު އޮތް ލެންސް އެވެ. ތިން ވަނައިގައި އޮތް ނީސް އަށް ވަނީ 12 މެޗުން 23 ޕޮއިންޓް ލިބިފަ އެވެ.
ބޯޑޯ ދަނޑުގައި ރޭ ޕީއެސްޖީން ކުޅުނު މެޗަށް އެ ޓީމުން ނުކުތީ އަނިޔާގެ ސަބަބުން ކުޅުމާ ދުރުގައި ހުރި ލިއޮނަލް މެސީ ނުލަ އެވެ.
ރޭގެ މެޗުގައި ޕީއެސްޖީގެ ތަރި އަކީ ނޭމާ އެވެ. ފުރަތަަމަ ހާފުގައި އޭނާ ވަނީ ދެ ގޯލު ޖަހައިފަ އެވެ. ދެ ގޯލު ޖަހަން ވެސް ފުރުސަތު ތަނަވަސްކޮށްދިނީ އެމްބާޕޭ އެވެ. ދެ ވަނަ ހާފްގައި ޕީއެސްޖީގެ ތިން ވަނަ ގޯލު ޖެހީ ޖިއޮޖީނިއޯ ވައިނަލްޑަމް ދިން ބޯޅަ އަކުން އެމްބާޕޭ އެވެ.
ހަތަރު ވަނަ ގޯލެއް ޖަހަން ޕީއެސްޖީން ފުރުސަތު ތަނަވަސްކުރި ނަމަވެސް ބޭނުމެއް ނުހިފުނެވެ. މި މެޗުގެ ފަހު ކޮޅުގައި ބޯޑޯ އިން ވަނީ ދެ ގޯލު ޖަހައި ޕީއެސްޖީ ހާސްކޮށްލައިފަ އެވެ.
މެޗުގެ 78 ވަނަ މިނިޓްގައި ބޯޑޯގެ ފުރަތަމަ ގޯލު ޖެހީ އަލްބާޓް އެލިސް އެވެ. މި ގޯލާ އެކު ބޯޑޯ އަށް ހިތްވަރެއް ލިބި ކުރި އެޓޭކްތަކުން އެ ޓީމުން ދެ ވަނަ ގޯލެއް ޖެހީ އިތުރު ވަގުތުގެ ދެ ވަނަ މިނިޓްގަ އެވެ. މި ގޯލު ކާމިޔާބުކުރީ އެމްބާއޭ ނިޔާންގް އެވެ. އޭގެ ފަހުން ގޯލެއް ޖަހަން ބޯޑޯ އިން ކުރި މަސައްކަތް ކާމިޔާބެއްނުވި އެވެ.
މެޗަށް ފަހު ޕީއެސްޖީގެ ކޯޗު މައުރީސިއޯ ޕޮޗެޓީނޯ ވަނީ ދެ ގޯލު ޖެހި އެ ޓީމުގެ ތަރި ނޭމާ އަށް ތައުރީފުކޮށްފަ އެވެ. އެކަމަކު، މެޗުގެ ފަހު ކޮޅުުގައި ޕީއެސްޖީ ކޮޅަށް ވަނީ ވަންނަން ނުޖެހޭ ގޯލުތަކެއް ކަމަށް ޕޮޗެޓީނޯ ވަނީ ބުނެފަ އެވެ.
