އއ. މަތިވެރީގައި މަޖިލިސް މެމްބަރު އަބްދުﷲ ޖާބިރު ހިންގަވާ "ކާސާ މިއާ" ގެސްޓްހައުސްގައި ހިންގި މާރާމާރީގެ މައްސަލައެއްގައި ދެ މީހަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ ބުރާސްފަތި ދުވަހު ހިނގި މި ހާދިސާގައި، މާރާމާރީ ހިންގާ އަނިޔާކުރި މައްސަލައެއްގައި 31 އަހަރުގެ ދިވެހި ފިރިހެނަކާއި 37 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އެ މީހުންނާ ގުޅޭ އިތުރު ތަފުސީލެއް ހިއްސާނުކުރެ އެވެ.
މި މައްސަލައިގައި މާރާމާރީ ހިންގާ އަނިޔާކުރި މީހާ ރަހީނުކުރި ކަމަށް ބައެއް މީޑިއާ ރިޕޯޓުތަައް ބުނެ އެވެ. ނަމަވެސް ފުލުހުން އެ ވާހަކަތައް ދޮގުކުރެ އެވެ. ފުލުހުންގެ އޮފިޝަލް ވިދާޅުވީ ހައްޔަރު ކުރި ދެ މީހުންނަށް ރަހީނުކުރުމުގެ ތުހުމަތު ނުކުރާ ކަމަށެވެ.
"އެ ގެސްޓްހައުސްއަށް ވަން މީހަކަށް އަނިޔާކުރި ކަމަށް ފުލުހުންނަށް ރިޕޯޓު ލިބުނީ." ފުލުހުން މީޑިއާ އޮފިޝަލް ވިދާޅުވި އެވެ.
މި ނޫހަށް މައުލޫމާތު ދެމުން ކުރިން ފުލުހުން ބުނީ މަތިވެރީގެ ހޮޓަލަކަށް ދިޔަ މީހަކަށް އެ ހޮޓަލުގެ ތެރޭގައި ތިބި ބަޔަކު ހަމަލާދީ މާރާމާރީ ހިންގި ކަމުގެ މައުލޫމާތުގެ ރިޕޯޓެއް ލިބުނު ކަމަށެވެ.
ކާސާ މިއާގައި މިކަމެއް ހިނގާފައި މިވަނީ އެތަނުގައި ހިނގި އަލިފާނުގެ ހާދިސާއަށް ފަހު ތަން ހުޅުވަން ތައްޔާރު ވަނިކޮށެވެ. އަދި ބުރާސްފަތި ދުވަހު ޖާބިރު މަތިވެރިއަށް ވަޑައިގަތީ ވެސް ތަން ހުޅުވުމަށް ކަމަށް މައުލޫމާތު ލިބެ އެވެ. ނަމަވެސް ރޭގެ ވަގުތެއްގައި އެ ގެސްޓްހައުސްއަށް ކަރަންޓު ދޭން ހުންނަ ތަނުގައި ވަނީ އަލިފާނުގެ ހާދިސާއެއް ހިނގާފަ އެވެ.
މި ދެ މައްސަލައިގައި ވެސް ޖާބިރު ތުހުމަތުކުރައްވަނީ ބަޔަކު ގަސްތުގައި ރޯކޮށްލީ ކަމަށެވެ. އަދި އެކަމުގައި ކައުންސިލު މެމްބަރުންގެ ބައިވެރިވުން އޮތް ކަަމަށް ވެސް ތަކުރާރުކޮށް ޖާބިރު ވަނީ ތުހުމަތުކުރައްވާފަ އެވެ. އެކަމަކު މިހާތަނަށް ގެސްޓުހައުސްގައި ރޯކޮށްލުމުގެ ތުހުމަތުގައި ބަޔަކު ހައްޔަރެއް ނުކުރެ އެވެ.
ކާސާ މިއާ ހުންނަ ބިމަކީ 2017 ގައި ރައީސް ޔާމީން ޓޫރިޒަމް ތަރައްގީކުރަން ކަނޑައަޅާފައިވާ ބިމެކެވެ. މިތަން ޖާބިރުގެ ރިޗް ކްލަބް މޯލްޑިވްސް ކުންފުންޏާ ހަވާލުކުރީ ކުރީގެ ޓޫރިޒަމް މިނިސްޓަރު އަލީ ވަހީދު ހުންނެވިއިރު 2019 ގައެވެ.
ކާސާ މިއާ ހަވާލުކުރުމުން ކައުންސިލުން ނުރުހިގެން އިހުތިސޯސުގެ ތެރޭގައި ހިމެނޭ ކަމަށް ބުނެ ޓޫރިޒަމް މިނިސްޓްރީއާ އަރައިރުންވި އެވެ. ނަމަވެސް އެެއީ ޓޫރިޒަމަށް ކަނޑައަޅާފައިވާ ބިންތަކެއް ކަމަށް ބުނެ އޭރު އަލީ ވަހީދު މި ނިންމުން ދިފާއުކުރެއްވި އެވެ.
