ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އއ. މަތިވެރީގައި އޮޕަރޭޓްކުރައްވާ ކާސާ މިއާ ގެސްޓްހައުސްގައި އަލިފާނުގެ ހާދިސާއެއް ހިނގައިފި އެވެ.
ރޭ ހިނގި މި ހާދިސާއާ ގުޅޭ ގޮތުން މަތިވެރީ ކައުންސިލް ރައީސް އަހުމަދު އަސްލަމް ވިދާޅުވީ ކާސާ މިއާގައި އަލިފާނުގެ ހާދިސާއެއް ހިނގި ކަމުގެ މައުލޫމާތު ލިބިފައިވާ ކަމަށެވެ. އެހެންނަމަވެސް މިވަގުތު ރަށުގައި ނެތުމުން އެއީ ކިހާ ވަރެއްގެ އަލިފާނުގެ ހާދިސާއެއް ކަމެއް އަދި ޔަގީންކުރެވިފައިނުވާ ކަމަށް އޭނާ ވިދާޅުވި އެވެ.
"އަޅުގަނޑުވެސް މިއަދު އަތޮޅު ކައުންސިލްގެ ބައްދަލުވުމަކަށް އައިސް ހުއްޓާ، ޖާބިރާ ފުލުހުންގެ އަތޮޅު ކޮމާންޑަރު އަޅުގަނޑަށް މެސެޖުކޮށްފަ ބުނި އެކަހަލަ ކަމެއް ވެގެން އުޅޭ ކަމަށް،" އަސްލަމް ވިދާޅުވި އެވެ.
އެ މައްސަލައާ ގުޅިގެން ފުލުހުން ބުނީ މަތިވެރީގައި ކަރަންޓު ބޯޑެއްގައި އަލިފާން ރޯވެފައިވާކަމުގެ މައުލޫމާތު ރޭ 5:00 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
"މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވޭ،" ފުލުހުންގެ މީޑިއާ އޮފިޝަލް ވިދާޅުވި އެވެ.
އަލިފާނުގެ ހާދިސާގެ ބައެއް ފޮޓޯތަކުން ފެންނަ ގޮތުގައި އަލިފާން ރޯވެފައިވަނީ ގެސްޓްހައުސްގެ އެތެރޭގައި ހުރި ބޮޑު ކަރަންޓު ބޯޑެއްގަ އެވެ. އަދި އެ އަލިފާންގަނޑުގައި އެ ބޯޑު ހުރި ކޮޓަރިއަށް ވެސް ބޮޑެތި ގެއްލުންތަކެއް ވަނީ ލިބިފަ އެވެ.
އެ މައްސަލަ ފުލުހުންގެ ފަރާތުން ދަނީ ތަހުގީގުކުރަމުންނެވެ. އެނގިފައިވާ ގޮތުގައި މެމްބަރު ޖާބިރުގެ ފަރާތުން ތުހުމަތުކުރަނީ އެއީ ބަޔަކު ގަސްދުގައިކޮށްފައިވާ ކަމެއް ކަމަށެވެ.
އެ ގެސްޓްހައުސްގައި އަލިފާނުގެ ހާދިސާއެއް މި ހިނގީ ގެސްޓްހައުސް އަލުން ހުޅުވަން ތައްޔާރުވަމުން ދަނިކޮށް ކަމަށް ވަނީ މައުލޫމާތު ލިބިފަ އެވެ. އަލިފާނުގެ ހާދިސާއާ ގުޅިގެން މެމްބަރު ޖާބިރުގެ ފަރާތުން ރަސްމި ބަހެއް ލިބޭ ގޮތް ވަނީ ނުވެފަ އެވެ.
ކާސާ މިއާ އަކީ މަތިވެރީގައި ހިންގާ އެންމެ ބޮޑު އެއް ގެސްޓްހައުސް އެވެ. މިއީ އެ ގެސްޓްހައުސްގައި އަލިފާނުގެ ހާދިސާއެއް ހިނގައިދިޔަ ދެ ވަނަ ފަހަރެވެ. އެގޮތުން 2019 ވަނަ އަހަރު ވެސް އެ ގެސްޓްހައުސްގައި ވަނީ އަލިފާނުގެ ހާދިސާއެއް ހިނގައިފަ އެވެ. އެފަހަރު ވެސް މެމްބަރު ޖާބިރު ވަނީ އެއީ ބަޔަކު ގަސްދުގައި ކުރިކަމެއްކަމަށް ތުހުމަތު ކުރައްވާފަ އެވެ.
އަލިފާނުގެ ހާދިސާ މި ހިނގީ މިދިޔަ ބުރަސްފަތި ދުވަހު މެމްބަރު ޖާބިރާއެކު މަތިވެރިއަށް ދިޔަ ބަޔަކު އެ ރަށުގައި ދިރިއުޅޭ މީހަކަށް އަނިޔާކުރިކަމުގެ މައްސަލައެއް ވެސް ރިޕޯޓްކޮށްފައިވަނިކޮށެވެ. އޭގެ ކުރިން މެމްބަރު ޖާބިރު، އެ ގެސްޓްހައުސްގައި މަސައްކަތްކުރާ މީހަކަށް މުސާރަ ނުދީގެން ވެސް މައްސަލަތަކެއް ފެންމަތިވި އެވެ. އަދި އާންމުން ވަނީ މެމްބަރު ޖާބިރާ ދެކޮޅަށް ރަށުގައި އެފަހަރު މުޒާހަރާ ވެސް ކޮށް، މެމްބަރު ޖާބިރު ރަށުން ފޭބުމަށް ގޮވާލާފައިވެ އެވެ.
