މިހާރު ކުރިއަށްދާ މޫސުމީ ބަދަލާ ގުޅޭ އދ. ގެ ބައްދަލުވުން ކޮޕް26 އަކީ ބޮޑު ނާކާމިޔާބީއެއް ކަމަށް ސްވިޑަންގެ ތިމާވެށި އެކްޓިވިސްޓު ގްރެޓާ ތަންބާގް ބުނެފި އެވެ.
"ކޮޕް26 ފެއިލްވެފައިވާކަން އެއީ ސިއްރެއް ނޫން،" ސަމިޓު ކުރިއަށްދާ ސްކޮޓްލޭންޑުގެ ގްލާސްގޯ ސިޓީގައި ޒުވާނުންނާ އެކު ބޭއްވި ހިނގާލުމަކަށް ފަހު ތަންބާގް ބުންޏެވެ.
"ތިމާވެށި ރައްކާތެރި ކުރާނެ ކަމަށް ބުނެ ވާ ބުރަދަނެއް ނެތް ވައުދުތަކާއި އެއްވެސް އަގެއް ނެތް ވާހަކަތަކުގެ ތެރެއިން އަންނަން ޖީލުގެ އަޑު އެ ދަނީ ކެނޑެމުން."
ތަންބާގް ބުނީ މޫސުމީ ބަދަލުގެ މައްސަލަ ހައްލު ވާނީ "މިހާރުން މިހާރަށް ވަރަށް ބޮޑު ތަނުން ކާބަން ބޭރު ކުރުން މަދުކޮށްގެން" ކަމަށެވެ.
"މިހާރު އުފައްދަން ޖެހޭ ސުވާލަކީ މިއީ، އަހަރުމެން މި ވަކާލާތު ކުރަނީ ކޮން ކަމަކަށް؟ އަހަރުމެން މި ވަކާލާތު ކުރަނީ އަމިއްލަ ނަފުސުތަކާއި ދުނިޔެ ސަލާމަތް ކުރަންތަ؟ ނޫނީ އާދައިގެ މަތިން ކަންކަން ކުރިއަށް ގެންދެވޭނެ ގޮތްތައް ހޯދަންތަ؟"
ހުކުރު ދުވަހު ގްލާސްގޯގައި ބޭއްވި ޒުވާނުންގެ ހިނގާލުމުގެ އެންމެ ކުރީ ސަފުގައި ތިބީ މޫސުމީ ބަދަލުގެ އަސަރު އެންމެ ބޮޑަށް ކުރަމުންދާ ގައުމުތަކުގެ ޖަންގަލި ހިސާބުތަކުގައި އުޅޭ މީހުންނެވެ.
ފަންސަވީސް ހާހަށް ވުރެ ގިނަ މީހުން ގްލާސްގޯގެ މަގުތައް މަތިން ހިނގާފައި ދިޔައިރު ގިނަ އަދަދެއްގެ ފުލުހުން ސެކިއުރިޓީ ބެލެހެއްޓުމުގައި އުޅުނެވެ.
ޒުވާނުންގެ އެއްވުމުގެ މަގްސަދަކީ ކޮޕް26 ބައްދަލުވުންތަކުން އެކަށީގެންވާ އަވަސް ފިޔަވަޅާ ހަމައަށް ދާން މަސައްކަތް ނުކުރާތީ އެކަމާ ދެކޮޅަށް އަޑު އުފުލުމެވެ.
މިދިޔަ އާދީއްތަ ދުވަހުގެ ރޭ ފެށި ކޮޕް26 ސަމިޓުގައި 120 ގައުމެއްގެ ލީޑަރުން ބައިވެރިވެވަޑައިގެންނެވި އެވެ. މިހާރު ސަމިޓުގައި ކުރިއަށް ދަނީ ލީޑަރުންގެ މަންދޫބުން މެދުވެރިކޮށް ކުރާ މަޝްވަރާތަކެވެ.
