ވ. ފެލިދޫން މާލެ އައި ލޯންޗަކުން އެއް ނަމްބަރު ފާލަމަށް ފޭބި އުމުރުން 19 އަހަރުގެ އިބްރާހިމް އާގިލް ގަޔަށް ވަޅި ޖަހާ މަރާލި ކަމަށް ތުހުމަތުކުރާ ގާތިލް ހަމްދޫން ހަމްޒަތުގެ އަތުގައި ވަޅިއެއް އޮތްތަން ފެންނަ ސީސީޓީ ފުޓޭޖް ފޮޓޯއެއް ލިބިފައިވާ ކަމަށް ހެކިވެރިއެއް ބުނެފި އެވެ.
ދ. ފަރެސްމާތޮޑާ، އާގިލް އަށް ތޫނު އެއްޗެހިން ހަމަލާދީ މަރާލީ އޮގަސްޓް 31، 2018 ގައެވެ.
އެ މައްސަލާގައި، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ ދައުލަތުން ކުރަނީ ލ. ފޮނަދޫ، ހިޔާ، ހަމްދޫން ހަމްޒަތާއި، ސ. ހިތަދޫ، ސްވޭހުހީނާގޭ އަލީ މިޖުވާދު މާލިކްގެ މައްޗަށެވެ. އަދި އެކަމަށް އެހީތެރިވިކަމުގެ ދައުވާ، ހއ. ދިއްދޫ ސްނޯބޯޑް އިބްރާހިމް ވިޝާމްގެ މައްޗަށް ކުރެ އެވެ.
ހެކިބަސް ނަގަން އެކި ފަހަރު އަޑުއެހުންތައް ތާވަލުކުރި ނަމަވެސް، އެކި ސަބަބުތަކާ ހެދި އަޑުއެހުންތައް ކެންސަލްވެ، މައްސަލަ ދިގުލައިގެން ދާތީ، މައްސަލަ ބައްލަވާ ގާޒީ އަލީ އާދަމް ވަނީ މި އަހަރު ތެރޭ ހުކުމާއި ހަމައަށް ވާސިލްވުމަށް ތާވަލެއް އެކުލަވާލާފަ އެވެ.
އެގޮތުން މިއަދު ބޭއްވި އަޑުއެހުމުގައި ކުރިއަށް ދިޔައީ ދައުލަތުން ހުށަހެޅި ދެ ހެކިވެރިންގެ ހެކިބަސް ނެގުމެވެ. ވީޑިއޯ ރިޕޯޓް އެނަލައިސިސް ސާބިތުކުރުމަށް ދައުލަތުން ހުށަހެޅީ އެ ތައްޔާރުކުރި ފުލުހުންގެ ފޮރެންސިކް އޮފިސަރެކެވެ. ދިފާއުން ކުރި ސުވާލަކާއި ގުޅިގެން ހެކިވެރިޔާ ވަނީ އާގިލްގެ ގާތިލް ކަމަށް ތުހުމަތު ކުރާ ހަމްދޫންގެ ހަރަކާތްތައް ފެންނަ ސީސީޓީވީ ފޫޓޭޖްގެ ފޮޓޯތައް ތަފްސީލުކޮށްދީފަ އެވެ.
ހެކިވެރިޔާ ބުނި ގޮތުގައި އެމްއެމްއޭ ސަރަހައްދުގައި ހަމްޒާ އާއި އެހެން މީހަކު އެރޭ ހަރަކާތްތެރިވަމުން ދިޔައިރު، އޭނާގެ އަތުގައި ވަޅިއެއް އޮތްކަން ސީސީޓީވީ ފުޓޭޖްތަކުން ސާފުވެ އެވެ. އަދި ވަޅި ހިފައިގެން އާގިލް ފަހަތުން އޭނާ ދުވި މަންޒަރާއި، ވަޅިޖެހުމާއި އެކު އާގިލް ވެއްޓުނު މަންޒަރާއި، އެވަގުތު ހަމްދޫން މީހެއްގެ ސައިކަލް ފަހަތަށް އަރައިގެން ވިލިގިލި ފެރީ ޓާމިނަލަށް ދިޔަ މަންޒަރު ފެނުން ކަމަށް ހެކިވެރިޔާ ބުންޏެވެ.
ކިތާބީ ހެކީގެ ގޮތުގައި ހުށަހެޅި ވީޑިއޯ އަދި ފޮޓޯގެ ތިން ހެކީީގެ ތެރެއިން ފުރަތަމަ ފުޓޭޖްގައި ހަމްދޫންއާ އެއްގޮތް ފަސް ސިފައެއް ފެންނަ ކަމަށާއި، ސައިކަލަށް އަރައިގެން ދާ މަންޒަރު ދައްކުވައިދޭ ދެވަނަ ވީޑިއޯގައި އޭނާއާއި އެއްގޮތްކަން ރަމްޒުކޮށްދޭ ތިން ސިފައެއް ފެނުނު ކަމަށް ހެކިވެރިޔާ ބުންޏެވެ.
އަދި ހަމްދޫން ސައިކަލުގައި ގެންދިޔައީ އާގިލް މަރާލުމުގައި އެހީވި ކަމުގެ ދައުވާ އުފުލާފައިވާ ވިޝާމް ކަމަށާއި އެއީ އޭނާކަން ކަށަަވަރުކުރީ އެއްގޮތް ކަމަށް ބެލެވޭ ހަތް ސިފައެއް ފެނުމުންކަން ފާހަގަކުރި އެވެ.
މި މަންޒަރުތައް ފުލުހުން ނަނާގަފައިވަނީ ޖުމްލަ 20 ސީސީޓީވީ ފުޓޭޖުންނެވެ.
ޑީއެންއޭ ރިޕޯޓް ސާބިތުކުރުމަށް އެ ރިޕޯޓް ތައްޔާރު ކުރި ޕްރައިމް އިންވެސްޓިގޭޓިވް އޮފިސަރެއް ދައުލަތުން ހުށަހެޅި އެވެ. އެގޮތުން ގާތިލް ކަމަށް ތުހުމަތު ކުރާ ހަމްދޫންގެ ހެދުމުގައި ހޭކިފައި ހުރި ލޭކޮޅަކުން އާގިލްގެ ޑީއެންއޭ ލިބިފައިވާ ކަމަށް ބުންޏެވެ. އަދި މަރާލުމުގައި އެހީވި ކަމަށް ތުހުމަތުކޮށް ދައުވާ އުފުލާފައިވާ ވިޝާމްގެ ޑީއެންއޭ ފެނިފައި ނުވާ ކަން ފާހަގަކުރި އެވެ.
ދިފާއުން މި ހެކިވެރިޔާގެ ހެކިބަސް ނެގީރު ސުވާލު އުފެއްދީ ޗެއިން އޮފް ކަސްޑަޓީ ފޯމްގެ ސައްހަ ކަމާއި މެދު އެވެ. އެގޮތުން އެ ފޯމްގައި އެއްވެސް މީހެއްގެ ސޮއި ނެތުމުން "ކޮންމެ މީހަކަށްވެސް އެއްޗެއް ލިޔެފައި ދެވިދާނެ ކަމަށް" ދިފާއީ ވަކީލް ބުންޏެވެ.
އެހެން ނަމަވެސް ހެކިވެރިޔާ ވަނީ އެ ކަން ކުރިއަށްދާ ތަރުތީބާއި އުސޫލު ޝަރީއަތަށް ސާފުކޮށްދީފަ އެވެ. އެގޮތުން އެ ފޯމަކީ އޮންލައިންކޮށް ލިބުނު ފޯމެއް ކަމަށާއި، އާންމުކޮށް ފޯމް ބަލައިގަންނައިރު، ސޮއިކޮށް އުޅެނީ ފިޒިކަލީ ހުށަހެޅޭ ކަރުދާސްތަކުގައި އެކަނި ކަމަށް ބުންޏެވެ.
މިކަމާއި ގުޅިގެން ދިފާއުން އިތުރު ސުވާލު އުފައްދަން މަސައްކަތް ކުރުމުން ދައުލަތުން ވަނީ އެކަމަށް އިއުތިރާޒްކޮށްފަ އެވެ. އެއީ މި މަރުހަލާއަކީ ހެއްކާއި ބެހޭ ގޮތުން ވާހަކަދައްކާ މަރުހަލާ ކަމުގައި ނުވާތީ ކަމަށް ދައުލަތުގެ ވަކީލް ވިދާޅުވި އެވެ.
މި މައްސަލާގައި ދެން އޮންނާނީ ހެއްކާއި ބެހޭ ގޮތުން ވާހަކަދެއްކުމެވެ. ގާޒީ އަލީ އާދަމް ތައްޔާރު ކުރެއްވި ތާވަލުގައި ވާގޮތުން 25 ނޮވެމްބަރުގައި ހުލާސާ ބަޔާން އިއްވުމަށްފަހު، 13 ޑިސެމްބަރު ހުކުމް ކުރުން އޮންނާނެ އެވެ. އެހެން ނަމަވެސް، ފަހުން ދިމާވާ ސަބަބަކާ ހެދި އަޑުއެހުމެއް ފަސްކުރަން ވެސް ޖެހިދާނެ ކަމަށް ގާޒީ ވިދާޅުވެފައިވެ އެވެ.
އާގިލަށް ފަރުވާދިނުމަށް ގެންދިޔަ އޭޑީކޭ އޮސްޕިޓަލުން އޭރު ބުނެފައިވާ ގޮތުގައި އެ ހޮސްޕިޓަލަށް އޭނާ ގެނައިއިރުވެސް އޮތީ މަރުވެފަ އެވެ.
