ވެލާނާ އިންޓަނޭޝަނަލް އެއާޕޯޓްގެ ވެސްޓް އޭޕްރަން ރަސްމީކޮށް ހުޅުވައިފި އެވެ.
ކުރީގެ ރައީސް ޔާމިން އަބްދުލްގައްޔޫމްގެ ސަރުކާރުގައި ފެށި އެއާޕޯޓް ތަރައްގީކުރުމުގެ ބިޔަ މަޝްރޫއުގެ ދަށުން ތަފާތު ފިޔަވަހިތަކަށް ބަހާލައިގެން އެއާޕޯޓްގެ އޭޕްރަން ތަރައްގީކުރުމުގެ މަސައްކަތްވަނީ ކުރިއަށް ގެންދިޔަ އެވެ.
މި މަޝްރޫއުގެ ދަށުން 2019 ވަނަ އަހަރު ވަނީ ސައުތް ވެސްޓް އޭޕްރަން ތަރައްގީކޮށް ނިންމައި ރަސްމީކޮށް ހުޅުވި އެވެ. މިއަދު ހަވީރު އޭޕްރަންއަށް ޖެއްސި މޯލްޑިވިއަންގެ އެއާބަސް އޭ320 ފްލައިޓާއެކު މުޅި އޭޕްރަން މިހާރު ވަނީ ރަސްމީކޮށް ހުޅުވާފަ އެވެ.
ވީއައިއޭއިން ވަނީ ކޮޗިންއިން މާލެ އައި މި ފްލައިޓަށް ވޯޓާ ސެލިއުޓާ އެކު ހޫނު މަރުހަބާއެއް ކިޔާފަ އެވެ.
އޭޕްރަން ހުޅުވުމުގެ ރަސްމިއްޔާތުގައި ވީއައިއޭ ހިންގުމާ ހަވާލުވެފައިވާ ކުންފުނި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިން ޑިރެކްޓަރު ގޯޑަން ސްޓުވާޓް ވަނީ ބައިވެރިވެފަ އެވެ.
މީޑިއާއާ ވާހަކަ ދައްކަވަމުން ސީއީއޯ ވަނީ ވެސްޓް އޭޕްރަން އާއެކު އެއާ ޓްރެފިކަށް ލުއި ވެގެންދާނެކަން ފާހަގަކުރައްވާފަ އެވެ.
އެއާޕޯޓުގެ ހިންގުމަށް ރަނގަޅު ބަދަލުތަކެއް އަންނާނެ ކަމަށާއި ކުރިއަށް އަންނަން އޮތް ލޯޑަށް ތައްޔާރުވުމުގެ ގޮތުން އެތައް މިލިއަން ރުފިޔާއެއް ހަރަދުކޮށް އެއާޕޯޓަށް ބޭނުންވާނެ ތާފާތު ސާމާނު ހޯދުމުގެ އިތުރުން އިތުރު މުވައްޒަފުން ނެގުމުގެ މަސައްކަތް މިހާރު ކުރަމުންދާ ކަމަށް އޭނާ ވިދާޅުވި އެވެ.
މި ރަސްމިއްޔާތުގައި އައިލެންޑް އޭވިއޭޝަންގެ މުހައްދު މިހާދު ވެސް ބައިވެރިވެ ވަޑައިގެންނެވި އިރު، އޭނާ ވިދާޅުވީ އޭޕްރަންގެ ޖާގަ ތަނަވަސްވުމާ އެކު ޑޮމެސްޓިކް ފްލައިޓުތައް ގަޑިޔައް ފުރައި ޖައްސަން ވަރަށް ބޮޑު ލުޔެއް ލިބިގެންދާނެ ކަމަށެވެ.
މިދިޔަ އަހަރުގެ ޖޫން މަހު ވެސްޓް އޭޕްރަންގެ 35،000 އަކަމީޓަރުގެ ސަރަހައްދެއް މަރާމާތު ކުރަން ފަށާފައިވާ އިރު، މިހާރު އެ އޭޕްރަންގައި ކޯޑް ސީގެ ނުވަ އެއާ ކްރާފްޓު އެއްފަހަރާ ޖެއްސޭނެ އެވެ.
މި އޭޕްރަންގައި ޑޮމެސްޓިކް އަދި އިންޓަނޭޝަނަލް ފްލައިޓުތައް ޖެއްސުމަށް ވަނީ ހަމަޖެހިފަ އެވެ.
އޭޕްރަން ތަރައްގީކުރުމުގެ މަޝްރޫއުގެ ދަށުން ފުރުތަމަ ބައި ތަރައްގީކޮށް ނިންމައި އެ ސަރަހައްދުގައި ފްލައިޓް ޖައްސަން ފަށާފައި ވަނީ 2019 ވަނަ އަހަރުގެ ޖުލައި މަހުގެ ތެރޭގަ އެވެ. މި ސަރަހައްދުގައި 70،000 އަކަ މީޓަރުގެ ޕާކިން ސްޕޭސް ހިމެނެ އެވެ.
މި އޭޕްރަންގައި ތިން މާސްކޯޑް އީ ގެ މަތިންދާ ބޯޓާއި، ކޯޑް އީގެ ދެ ޑެޑިކޭޓެޑް ސްޓޭންޑް އަދި ކޯޑް ސީގެ އެއް ޑެޑިކޭޓެޑް ސްޓޭންޑް ބެހެއްޓެ އެވެ.
