ނަސްރުގެ ދުވަހުގެ މުނާސަބަތުގައި ޑާކްރެއިން އެންޓަޓެއިންމަންޓުން ނެރުނު ކުރު ފިލްމު "އޯ ވަޒަން" އިން ފުން މެސެޖެއް ދޫކޮށްލައިފި އެވެ.
އަލީ ޝާމިން ލިޔެ ޑައިރެކްޓްކޮށްފައިވާ މި ފިލްމުގެ މަގްސަދަކީ މީގެ 33 އަހަރު ކުރިން، ނޮވެމްބަރު 3، 1988 ގައި ތަޅަމަ ޓައިގަރުން ގޮވައިގެން ދިވެހިންގެ ބަޔަކު ވެރިރަށް މާލެއަށް އަރައި ދިން އުދުވާނީ ހަމަލާ އާއި އެ ހާދިސާއިން ނަސްރު ހޯދަން ކުރި މަސައްކަތް ޝައުގުވެރި ގޮތަކަށް ކުޑަކުދިންނަށް އަންގައިދިނުމެވެ.
މި ވާހަކަތައް ފިލްމުގައ ގެނެސްދީފައި ވަނީ، އަސްކަރިއްޔާގެ ބޭކަހަލަ ކުޑަ ކުއްޖަކަށް ކިޔައިދޭ ގޮތަށެވެ. މި ފިލްމު ރިލީޒުކުރީ ޑާކް ރެއިންގެ ސޯޝަލް މީޑިއާ ޕްލެޓްފޯމްތަކާއި ބައިސްކޯފުގަ އެވެ.
ތޭރަ މިނެޓްގެ މި ފިލްމުން ދޭ މެސެޖްތައް ނުލާހިކު ވަރުގަދަ އެވެ. ފިލުމުގައި މިއަދުގެ މުޖްތަމައު އަދި ޒުވާން ޖީލުގެ ހަގީގަތާއި، ދިވެހިންގެ ތާރީހާ ބެހޭ މައުލޫމާތު، ހާއްސަކޮށް ނަސްރުގެ ދުވަހުގެ މައުލޫމާތުތަކާ ބީރަށްޓެހި މިންވަރު ފެނިގެންދެ އެވެ.
އިސްމާއިލް ރަޝީދު (ކޮޕީ އިއްސެ)ގެ ހުނަރުވެރި އެކްޓިންގައި ނޮވެމްބަރު 3 ގެ ހާދިސާ ކިޔައިދެމުންދަނީ ތުއްތު ފަންނާނެއް ކަމަށްވާ މުހައްމަދު އާތިކް އަށެވެ. މަންމަގެ ރޯލުން ފެންނަނީ ގިނަ ބައެއްގެ މެދުގައި މަގުބޫލުކަން ހޯދަމުން އަންނަ ތަރި ވާޝިއާ މުހައްމަދު (ޝިއާ) އެވެ.
ޝާމިން ބުނި ގޮތުގައި ފިލްމު އޭނާ ލިޔެފައިވަނީ ލޮކްޑައުންތެރޭގަ އެވެ. އެންމެ ފުރަތަމަ އަމާޒުކުރީ މިދިޔަ އަހަރުގެ ނޮވެމްބަރަށް މި ފިލްމު ނިންމާލުމަށެވެ. އެކަން ކާމިޔާބު ނުވުމުން މި އަހަރުގެ ނަސްރުގެ ދުވަހަށް ފިލްމުގެ ރިލީޒުކުރަން ނިންމި އެވެ.
ޖާނަލިޒަމްގެ ދާއިރާއިން މަތީ ތައުލީމު ހާސިލްކޮށްފައިވާ ޝާމިން ވަނީ ކުރިން ސިފައިންގޭގައި ވެސް މަސައްކަތްކޮށްފަ އެވެ. ސިފައިންގޭގައި ހޭދަކުރެވުނު ދުވަސްތަކަކީ މިފަދަ މަސައްކަތަކަށް މީހާ ޝައުގުވެރިކުރުވައި، މީހާގެ ހޭލުންތެރިކަން އިތުރުކޮށްދިން ކަމެއް ކަމަށްވެސް ޝާމިން ބުންޏެވެ.
ފިލްމުގެ އެގްޒެކެޓިވް ޕްރޮޑިއުސަރުންގެ ގޮތުގައި ޑާކްރެއިން އެންޓަޓެއިންމަންޓްގެ ޓީމު ބައިވެރިވި އިރު, ޝާމިންއާއެކު ފިލްމު ތައްޔާރުކުރުމުގައި އެންމެ އިސް ދައުރެއް އަދާކުރި އެކަކީ ޝަމްއާން ޝާކިރެވެ. އޭނާގެ ބައިވެރިވުން ފިލްމުގެ ސީނެމެޓޯގްރަފީގައި ވެސް ފެނިގެންދިޔައިރު ފިލްމުގެ ޕޯސްޓް ޕްރޮޑަކްޝަންގައި އިބްރާހިމް އާރިފް އާއި އަބްދުﷲ އައުރާފްގެ ހުނަރުވެރި މަސައްކަތް ވަނީ ފެނިގެން ގޮސްފަ އެވެ.
މިއީ ޝާމިންގެ މިފަދަ މަސައްކަތެއް މިހާ ބޮޑު އޯޑިއަންސަކަށް ފެނިގެންދިޔަ ފުރަތަމަ ފަހަރެވެ. ރާއްޖެ ޓީވީ އިން 2017 ވަނަ އަހަރު ބޭއްވި ކުރު ފިލްމު ހެދުމުގެ މުބާރާތަކުން ވެސް ޝާމިން އާއި ޝަމްއާން ވަނީ އެއްވަނަ ހޯދާފަ އެވެ.
ކުރު އެހެނަސް މުހިންމު މި ފިލްމަކީ އެތައް ޒަމާންތަކަކަށް ވެސް ބޭނުންކުރެވޭނެހާ ފުރިހަމަ މަސައްކަތެކެވެ. ނަސްރުގެ ދުވަހަކީ ކޮބައިކަން ނޭނގޭ ކޮންމެ ޅަ ސިކުނޑިއަކަށް ވެސް ވިސްނޭނެހާ އަސަރާއެކު ބަލާހިތްކުރުވާ ފަދަ ގޮތަކަށް ތައްޔާރުކުރެވިފައިވާ މޮޅު ފިލްމެކެވެ.
