މޫސުމީ ބަދަލާ ގުޅޭ ބައިނަލްއަގްވާމީ ބޮޑު ބައްދަލުވުން ކޮޕް26 ގައި ރަޝިއާ އާއި ޗައިނާގެ ލީޑާޝިޕް ނުފެންނާތީ އެމެރިކާގެ ރައީސް ޖޯ ބައިޑެން ފާޑުވިދާޅުވެއްޖެ އެވެ.
ސްކޮޓްލޭންޑުގެ ގްލާސްގޯގައި މިހާރު ކުރިއަށްދާ ކޮޕް26 ސަމިޓަށް ރަޝިއާގެ ރައީސް ލެޑިމިއަ ޕޫޓިން އަދި ޗައިނާގެ ރައީސް ޝީ ޖިންޕިން ވަޑައިގެންފައެއް ނުވެ އެވެ.
"ޗައިނާ އިން ދުނިޔޭ ލީޑަރެއްގެ ގޮތުގައި މުޅިން އާ ދައުރެއް އަދާ ކުރަން މަސައްކަތް ކުރާއިރު، މި ތަނަށް ނައުން މިއީ ކޮން ކަހަލަ ކަމެއްތޯ،" ނޫސްވެރިންނަށް ބައިޑެން ވިދާޅުވި އެވެ.
"މިއީ ބޮޑު ސިންގާހާ މައްސަލައެއް. އެކަމަކު މި މައްސަލައާ ދުރަށް އެ މީހުން އެ ޖެހެނީ. އެގޮތަށް ކަންތައް ކުރުމަށް ފަހު ލީޑާޝިޕް ދައްކާ ކަމަށް ބުނެވޭނީ ކިހިނެއްތޯ،" ބައިޑެން ވިދާޅުވި އެވެ.
"ޗައިނާ އިން ނައުމަކީ ބޮޑު ކުށެއް. ދުނިޔޭގެ އެހެން ހުރިހާ ގައުމަކުން ޗައިނާ އަށް އެ ބަލަނީ އެ މީހުން ކޮށްދޭނީ ކޮން ކަމެއްތޯ ސާފު ކުރަން."
ދުނިޔޭގައި އެންމެ ގިނައިން ކާބަން ބޭރު ކުރާ ގައުމަކީ ޗައިނާ އެވެ. ނަމަވެސް ކާބަން މަދު ކުރަން ކުރާނެ ކަންކަމާ ގުޅޭ ނޭޝަނަލީ ޑިޓާމައިންޑް ކޮންޓްރިބިއުޝަންސް (އެންސީޑީ) ޗައިނާ އިން ހުށަހަޅާފައެއް ނުވެ އެވެ.
ކޮވިޑް ބަލިމަޑުކަން ފެށުނު ފަހުން ޗައިނާގެ ރައީސް ގައުމުން ބޭރަށް ދަތުރެއް ނުކުރައްވަ އެވެ. އެއާ ހިލާފަށް ގިނަ ދަތުރުތަކެއް ކުރައްވާ ރަޝިއާގެ ރައީސް ޕޫޓިން އަށް ވެސް ބައިޑެން ވަރަށް ބޮޑަށް ފާޑުވިދާޅުވި އެވެ.
"ޕޫޓިންގެ ޖަންގަލިތައް އެ އަނދަނީ. ޕޫޓިން އަށް ވަނީ މޫސުމީ ބަދަލާ ގުޅޭ ސީރިއަސް މައްސަލަތަކެއް ދިމާވެފައި. އެކަމަކު އެއްވެސް ކަމެއް ކުރާކަށް ބޭނުންފުޅެއް ނުވޭ،" ބައިޑެން ވިދާޅުވި އެވެ.
އެމެރިކާ އިން ވައުދުވެފައި ވަނީ 2050 ވަނަ އަހަރުގެ ކުރިން ނެޓް ޒީރޯ ހާސިލްކުރަން ފިޔަވަޅުތައް އެޅުމަށެވެ.
