އެންމެފަހުން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދާއިރާތަކުގެ އިންތިހާބަށް ހަރަދުވީ 2.3 މިލިއަން ރުފިޔާ ކަމަށް އެޕާޓީން ބުނެފި އެވެ.
އެމްޑީޕީގެ އެތެރޭގެ އިންތިހާބުގެ ވޯޓުލުން ވަނީ މުޅި ރާއްޖޭގެ ހުރިހާ ރަށެއްގައި ކުރިއަށް ގެންގޮސްފަ އެވެ. މި އިންތިހާބުގައި އެމްޑީޕީގެ ވޯޓު ލެވޭ 93,612 މެމްބަރުންގެ ތެރެއިން 47،100 މެމްބަރުން ވަނީ ވޯޓު ލާފަ އެވެ.
އެމްޑީޕީ ގައުމީ މަޖިލީހުގެ ހަތަރު ވަނަ ދައުރުގެ ފުރަތަމަ ޖަލްސާގައި ޕާޓީގެ ޗެއާޕާސަން ހަސަން ލަތީފް ވަނީ ޕާޓީގެ އެތެރޭގެ އިންތިހާބުގެ ވޯޓު ކަރުދާސް ތައްޔާރުކުރުމަށާއި ވޯޓުލާ މަރުކަޒުތަކަށް ކުރި ހަރަދުގެ އިތުރުން އޮފިޝަލުންނަށާއި އިންތިހާބާ ގުޅިގެން ދަތުރުތައް ހިމެނޭހެން މުޅި އިންތިހާބަށް ހޭދަވީ 2.3 މިލިއަން ރުފިޔާ ކަމަށް ވިދާޅުވެފަ އެވެ.
މި އިންތިހާބުގައި ޖުމްލަ 97 ދާއިރާއަކުން 730 ކެންޑިޑޭޓުން ވަނީ ވާދަކޮށްފަ އެވެ. މި އިންތިހާބު ކާމިޔާބުކުރި މެމްބަރުން ރައީސުލްޖުމްހޫރިއްޔާ، ކެބިނެޓް މެމްބަރުން، ރައްޔިތުންގެ މަޖިލީހުގެ މެމްބަރުންނާއެކު ގައުމީ މަޖިލީހުގައި މަސައްކަތްކުރާނެ އެވެ.
ވަރަށް ފޯރިގަދަކޮށް ކުރިއަށްދިޔަ އެމްޑީޕީ ދާއިރާތަކުގެ އިންތިހާބަށްފަހު މިރޭ ތާޖުއްދީން ސްކޫލްގައި ބޭއްވި ފުރަތަމަ ގައުމީ މަޖިލީހުގެ ޖަލްސާގައި މެމްބަރުން މަޝްވަރާ ކުރެއްވީ މާލެ ނޫން ރަށްރަށުގައި ހިންގާ އެ ޕާޓީގެ ހަރުގެތަކުގެ ހަރަކާތްތައް ވަރުގަދަ ކުރުމަށެވެ.
އެމްޑީޕީގެ އެންމެ ބާރުގަދަ ގުނަން ކަމުގައިވާ ގައުމީ މަޖިލިހުގައި ތިބޭ ދާއިރާތަކުގެ މެމްބަރުންގެ އިންތިހާބު ސެޕްޓެމްބަރުގައި ބާއްވާފައި ވަނީ ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ހިޔާލުތަފާތުވެފައި އޮތް ދަނޑިވަޅެއްގަ އެވެ.
ގައުމީ މަޖިލީހުގެ ޖަލްސާ މިރޭ ކުރިއަށްދިޔައިރު ރައީސް ސޯލިހާއި ނަޝީދު ހުންނެވީ ކޮޕް-26 ގައި ބައިވެރިވެވަޑައިގަތުމަށް ސްކޮޓްލެންޑުގެ ގްލާސްގޯގަ އެވެ.
