ޖައްވަށް ބޭރު ކުރާ ކާބަން މަދު ކުރުމަށް ނެޓް ޒީރޯ ލަނޑުދަނޑި އަށް އިންޑިއާ އިން ވާސިލްވާނީ ގިނަ ގައުމުތަކަށް ވުރެ 20 އަހަރު ލަހުން 2070 ވަނަ އަހަރުގައި ކަމަށް ބޮޑު ވަޒީރު ނަރެންދްރަ މޯދީ ވިދާޅުވެއްޖެ އެވެ.
ކޮޕް26 ސަމިޓުގެ އެންމެ މައިގަނޑު އެއް އަމާޒަކީ ހުރިހާ ގައުމަކުން ވެސް 2050 ވަނަ އަހަރުގެ ކުރިން ނެޓް ޒީރޯ ހާސިލްކުރަން އަޒުމު ކަނޑައެޅުމެވެ. ސްކޮޓްލޭންޑުގެ ގްލާސްގޯގައި ސަމިޓު ފަށައިގެން ކުރިއަށް ދާއިރު، ގިނަ ގައުމުތަކުން ވަނީ އެކަމަށް އެއްބަސްވެފަ އެވެ.
މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓުގައި މޯދީ ވިދާޅުވީ 2070 ވަނަ އަހަރުގެ ކުރިން އިންޑިއާ އިން ނެޓް ޒީރޯ ހާސިލްކުރަން ވައުދުވާ ކަމަށެވެ. މިއީ ނެޓް ޒީރޯއާ ގުޅޭ ލަނޑުދަނޑިއެއް އިންޑިއާ އިން ކަނޑައެޅި ފުރަތަމަ ފަހަރެވެ.
ނެޓް ޒީރޯ ނުވަތަ ކާބަން ނިޔުޓްރަލްވުމަކީ މިހާރު އެޓްމޮސްފިއާގައި ހުރި ގްރީންހައުސް ގޭހުގެ ތެރެއަށް އިތުރަށް ގޭސް ބޭރު ނުކުރުމެވެ. ނުވަތަ ޖައްވުގައި ހުރި ގްރީން ހައިސް ގޭހާއި ޖައްވުން ނައްތާލާ ގްރީން ހައުސް ގޭސް ބެލެންސް ކުރުމެވެ.
ޗައިނާ އިން ބުނެފައި ވަނީ ނެޓް ޒީރޯ ހާސިލްކުރާނީ 2060 ވަނަ އަހަރުގެ ކުރިން ކަމަށެވެ. އެމެރިކާ އާއި ޔޫރަޕިއަން ޔޫނިއަން (އީޔޫ) ގެ އަމާޒަކީ ގިނަ ގައުމުތައް ފަދައިން 2050 ވަނަ އަހަރެވެ.
އިންޑިއާ އަކީ ހަތަރު ވަނަ އަށް އެންމެ ގިނައިން ކާބަން ބޭރު ކުރާ ގައުމެވެ. އެ ލިސްޓުގެ އެންމެ ކުރީގައި ޗައިނާ އޮތް އިރު، ދެން ހިމެނެނީ އެމެރިކާ އާއި އީޔޫ އެވެ.
