ގައުމުގެ ރައްޔިތުންގެ މެދުގައި އެއްބައިވަންތަކާއި އެކުވެރިކަން އާލާކުރުމުގައި ފުޓްބޯޅަ އިސްދައުރެއް އަދާކުރާކަން ނިމިދިޔަ އުރީދޫ ސާފް ޗެމްޕިއަންޝިޕް އިން ފެނިގެން ގޮސްފައިވާ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ސާފް ޗެމްޕިއަންޝިޕްގައި ގައުމީ ޓީމުން ކުރި މަސައްކަތް ފާހަގަކުރުމަށާއި މި މަހު ސްރީ ލަންކާގައި ބާއްވާ މަހިންދުރަ ރާޖަޕަކްސަ ފޯ ނޭޝަންސް ކަޕަށް ދިއުމުގެ ކުރިން ގައުމީ ޓީމަށް ހިތްވަރު ދިނުމަށް ނައިބު ރައީސް ފައިސަލް ނަސީމް ވަނީ މިއަދު ހާއްސަ ރަސްމިއްޔާތެއްގައި ބައިވެރިވެވަޑައިގެންފަ އެވެ.
ހޮޓެލް ޖެންގައި ބޭއްވި މި އިވެންޓްގައި ގައުމީ ޓީމާ މުހާތަބުކޮށް ނައިބު ރައީސް ފައިސަލް ވިދާޅުވީ ގައުމީ ޓީމުގައި ހިމެނޭ ކުޅުންތެރިން ގައުމުގެ ހައްގުގައި ކުރަނީ މުހިއްމު މަސައްކަތެއް ކަމަށާާއި ފުޓްބޯޅަ ކުޅުންތެރިންނަކީ ގައުމުގެ ރައްޔިތުންނަށް އުފާވެރިކަން ގެނެސްދޭ ބައެއް ކަމަށެވެ.
"އެންމެން އެއްބައިވަންތަ ކުރުވައި އެކުވެރިކުރުވާ އެއްޗެއްގެ ގޮތުގައި ފުޓްބޯޅަ ފެނިގެން މިދަނީ،" ނައިބު ރައީސް ވިދާޅުވި އެވެ.
"ސާފް (ޗެމްޕިއަންޝިޕް)ގައި ފެނުނީ އާދަޔާހިލާފު ސަޕޯޓެއް. ކޮންމެ ރަށަކާއި މާލެއިން އަދި (ގަލޮޅު) ދަނޑުން ވެސް ފެނިގެންދިޔައީ އެއް ޖޯޝެއް. ގައުމީ ޓީމުން ވަރަށް ހިތްވަރުކުރި، ކޮންމެ ފަހަރަކު ހުރިހާ ޓީމަކަށް ކާމިޔާބު މުބާރާތަކަށް ނުވެދާނެ. މީގެ މަސައްކަތް ކުރަންވީ ކުރިއަށް އޮތްތަނުގައި ހިތްވަރުކޮށް ކާމިޔާބު ހޯދަން،"
މިއަދުގެ އިވެންޓްގެ ތެރެއިން ނައިބު ރައީސް ފައިސަލް ވާހަަކަ ދައްކަވަނީ.--ފޮޓޯ:
މިއަދުގެ ސަރުކާރުގެ ފެށުން ވެސް އައީ "ދުޅަހެޔޮ ހަށިހެޔޮ" ޝިއާރުގެ ދަށުން ހިންގުނު ކުޅިވަރުގެ އިވެންޓްތަކަކާ އެކުގައިކަން ފާހަގަކުރައްވައި، ނައިބު ރައީސް ވިދާޅުވީ އެފްއޭއެމުން މުޅި ރާއްޖެ އަށް ފުޅާކޮށް މުޅި ގައުމުގައި ކުރިން އެ އޮތް ފުޓްބޯޅަ ފޯރި އަލުން ގެންނަން މަސައްކަތް ކުރުމަށް އެދޭ ކަމަށެވެ.
ގައުމީ ޓީމުން މި މަހު 8-17 އަށް ލަންކާގައި ބާއްވާ ފޯ ނޭޝަންސް ކަޕްގައި ކާމިޔާބަށް އެދޭ ކަމަށް ނައިބު ރައީސް ވަނީ ވިދާޅުވެފަ އެވެ.
"ގައުމުގައި ކުޅުނަސް ގައުމުން ބޭރުގައި ކުޅުނަސް އަޅުގަނޑުމެންގެ އަތްތިލަބަޑީގެ އަޑު މަޑުވެގެން ނުދާނެ. އަޅުގަނޑުމެންގެ ދުއާ އަކީ އަބަދުވެސް ގައުމީ ޓީމަށް ކާމިޔާބު ލިބުން،" ނައިބު ރައީސް ވިދާޅުވި އެވެ.
ނައިބު ރައީސް ވިދާޅުވީ ކުޑައިރުއްސުރެން ވެސް އެއް ކަމެއްގައި އެންމެ ބޮޑަށް ޝާމިލުވެގެން އުޅެވުނު ކަަމަކީ ފުޓްބޯޅަ ކަމަށާއި އެހެންވެ، ފުޓްބޯޅައިގެ ކަންކަމަށް އަބަދުވެސް ހާއްސަ ސަމާލުކަމެއް ދެވޭ ކަމަށެވެ.
މިއަދުގެ އިވެންޓްގައި ވާހަކަ ދައްކަވަމުން އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ ސާފް ޗެމްޕިއަންޝިޕަށް އެފްއޭއެމުން ކަނޑައެޅި ދެ ޓާގެޓަކީ މުބާރާތް ކާމިޔާބުކުރުމާއި ގައުމު އެއްބައިވަންތަކޮށް އެންމެންނަށް އުފާވެރިކަން ގެނެސްދިނުމުގެ ދެ ޓާގެޓް ކަމަށެވެ.
މީގެ ތެރެއިން މުބާރާތް ކާމިޔާބު ކުރުމުގެ ޓާގެޓަށް ވާސިލްނުވެވުނު ކަމުގައި ވިޔަސް އެންމެން އެއްބައިވަންތަ ކުރުމުގެ މަގުސަދު ހާސިލްވިކަން ޖަވާ ފާހަގަކުރެއްވި އެވެ.
"ހާއްސަކޮށް ދަނޑު ތެރެއިން އެ ފެނުނު ކަންތައްތައް (ސަޕޯޓަރުންގެ ސަޕޯޓް) ފެނި އުފަލުން ރޮވޭވަރުވި،" ޖަވާ ވިދާޅުވި އެވެ.
މިއަދުގެ އިވެންޓްގެ ތެރެއިން ޖަވާ ވާހަކަ ދައްކަވަނީ.-- ފޮޓޯ: ހުސެއިން ޝަޔާހު/ އަދަދު
ރާއްޖޭން މި ފަހަރުގެ ފޯ ނޭޝަންސް ކަޕަށް ތައްޔާރުވާއިރު، މީގެ ކުރިން ލަންކާގައި ބޭއްވި މަހިންދުރަ ރާޖަަޕަކްސަ މުބާރާތް ކާމިޔާބުކުރީ ރާއްޖޭންނެވެ. އެ ގޮތުން 2012 ވަނަ އަހަރު ބޭއްވި 23 އަހަރުން ދަށަށް ހާއްސަ ރާޖަޕަކްސަ މުބާރާތް ރާއްޖެ އަށް ކާމިޔާބުކުރެވިފައިވުމާ އެކު ރާއްޖޭން މި ފަހަރު ތައްޔާރުވާނީ އެންމެ ފަހުގެ ވިސްނުމުގައި ކަމަށް ޖަވާ ވިދާޅުވި އެވެ.
"ޑިފެންޑިން ޗެމްޕިއަންގެ ހައިސިއްޔަތުން މުބާރާތް ކާމިޔާބުކުރަން ޓާގެޓް މިކުރަނީ ސީނިއާ ޓީމު ގޮވައިގެން. ތަށި ރާއްޖެ ގެންނަން ބޭނުން. ގައުމީ ޓީމުގެ އެކުވެރިކަމަށް ބަދަހިކަމަކަށް ބަދަލެއް ނާދޭ،" ޖަވާ ވިދާޅުވި އެވެ.
ފޯ ނޭޝަންސް ކަޕްގައި ރާއްޖެ އާއި ލަންކާގެ އިތުރުން ދެން ކުޅެނީ ސީޝެލްސް އާއި ބަންގްލަދޭޝް އެވެ.
ފުޓްބޯޅައިގެ ކަންކަން ރަނގަޅަށް ކުރިއަށް ގެންދިއުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމް އަދި ޔޫތު މިނިސްޓަރު އަހުމަދު މަހުލޫފާއި މިނިސްޓްރީން ކުރައްވާ މަސައްކަތަށް ޖަވާ ވަނީ ޝުކުރު އަދާކުރައްވައިފަ އެވެ.
މި އިވެންޓްގައި ވާހަކަ ދައްކަވަމުން ޔޫތު މިނިސްޓްރީގެ ސްޓޭޓް މިނިސްޓަރު އަދި ގައުމީ ޓީމުގެ މިޑްފީލްޑަރު އަސްހަދު އަލީ (އަޑޭ) ވިދާޅުވީ މިހާރު ފުޓްބޯޅައިގައި މި ކުރެވޭ މަސައްކަތުގެ އެންމެ ބޮޑު ޓާގެޓަކަށް ވާން ޖެހޭނީ 2023 ވަނަ އަހަރުގެ އޭޝިއަން ކަޕަށް ކޮލިފައިވުން ކަމަށެވެ. އަދި އެކަމަށްޓަކައި ޔޫތު މިނިސްޓްރީން ދެވެން އޮތް އެހީތެރިކަމެއް ފޯރުކޮށްދޭނެ ކަމަށާއި ކުޅިވަރުގެ ކޮންމެ ކަމެއްގައި ވަކި ކުޅިވަރެއް ތަފާތު ކުރުމެއް ނެތި މިނިސްޓްރީން ދޭން ޖެހޭ އެއްބާރުލުން ދޭނެ ކަމަށް އަސްހަދު ވިދާޅުވި އެވެ.
