އެއްގަމު އުޅަނދުފަހަރުގެ ރޯޑް ވާދިނެސް ހަދައިދޭ ގަރާޖުތަކުގައި ވަކި ޝަރުތުތަކަކާއި މިންގަނޑުތަކެއް ހުރުމަށް ލާޒިމުކުރާ އުސޫލެއް ތައާރަފްކުރަން ޓްރާންސްޕޯޓު މިނިސްޓްރީން ނިންމައިފި އެވެ.
އިއްޔެ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ޓްރާންސްޕޯޓު މިނިސްޓްރީގެ އިސް ބޭފުޅުން ވަނީ ހާޒިރުކޮށްފަ އެވެ. އެ ކޮމިޓީގައި މެމްބަރުން ވަނީ ރޯޑު ވާދިނެސްގެ ކަންކަމާ ގުޅޭ ގޮތުން މިނިސްޓްރީގެ އޮފިޝަލުންނާ ސުވާލުކުރައްވާފަ އެވެ.
ކޮމިޓީގައި ވާހަކަދައްކަވަމުން، ކޮމިޓީ މެމްބަރު އަދި ފުވައްމުލައް މެދު ދާއިރާގެ މެމްބަރު ހުސެއިން މުހައްމަދު ދީދީ ވަނީ ރޯޑް ވާދިނެސްގެ ކަންކަމަކީ އެއްވެސް ވަރަކަށް ބެލެހެއްޓިގެން ކުރެވޭ ކަމެއް ނޫން ކަމަށާއި އަދި ރޯޑް ވާދިނެސް ހޯދަން އޮންނަ އޮތުން އުވާލުމުގެ ވިސްނުމެއް މިނިސްޓްރީގެ އޮތްތޯ ސުވާލުކުރައްވާފަ އެވެ.
"އެއްގަމު އުޅަނދުފަހަރުގަ އެއްވެސް އެއްޗެއް ޗެކު ނުކުރެވި ގަރާޖުތަކުން ދޫކުރާ އެއްޗެއް މީ (ރޯޑު ވާދިނެސް)، އެހެންވިމަ މީތި އުވާލުމާ މެދު އެއްވެސް ވަރަކަށް ވިސްނުމެއް އެބަ ހުރިތޯ؟ ދުއްވާ އެއްޗިހީގަ ހަގީގަތުގަ މި ހުންނަނީ ރޯޑް ވާދިނެސް ނުހެދި. އެހެންވީމަ އިތުރު ފީއެއް ރައްޔިތުން އަތުން ދާ ގޮތަށް މި އޮންނަ އޮތުން، ކުރިޔަށް ގެންދާ ގޮތަށް ތޯ ވިސްނުން އޮތީ؟" މެމްބަރު ހުސެއިން މުހައްމަދު ސުވާލު ކުރެއްވި އެވެ.
މެމްބަރުގެ ސުވާލަކަށް ޖަވާބު ދެއްވަމުން ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީ ވިދާޅުވީ، މެމްބަރު ފާހަގަކުރެއްވި ފަދަ މައްސަލަތަކެއް މިނިސްޓްރީއަށް ވެސް ފާހަގަކުރެވިފައިވާ ކަމަށެވެ. އަދި އެކަންކަން ހަރުދަނާކުރުމުގެ ގޮތުން މިނިސްޓްރީން މިހާރު އާ އުސޫލެއް ގެނައުމުގެ މަސައްކަތް ކުރަމުންދާކަމަށް އޭނާ ވިދާޅުވި އެވެ.
"މިހާރު އިއުލާންކުރާ އުސޫލުގެ ދަށުން ވެއްޖެއްޔާ އިންނާނީ ރޯޑް ވާދިނެސް ހެއްދުމަށްޓަކައި ބޭނުންކުރެވޭ ވެހިކަލްތައް މޮނިޓާކޮށް ބެލެހެއްޓުމަށް ބޭނުންކުރެވޭ ފުރިހަމަ ޓެކްނޮލޮޖީ ކަހަލަ ހުރިހާ ކަމެއް ފުރިހަމަވާ ތަންތަނަށް ރޯޑް ވާދިނެސް ދޫކުރުމުގެ ހުއްދަ ދޫކުރަން،" ޝިމާޒް ވިދާޅުވި އެވެ.
ޝިމާޒް ވިދާޅުވީ މިހާރު މާލޭގައި ގާތްގަނޑަކަށް 40 އަކަށް ގަރާޖުން ރޯޑު ވާދިނެސް ހައްދައިދޭއިރު، އާ އުސޫލު އައުމަށްފަހު އެ އަދަަދު ހަތަކާއި އަށަކާ ދެމެދަށް ވެއްޓިގެންދާނެކަމަށެވެ. އަދި އެތަންތަން މިނިސްޓްރީން މޮނިޓާ ކުރައްވާނެ ކަމަށް ވެސް އޭނާ ވިދާޅުވި އެވެ. އުސޫލާ ހިލާފްވާ ތަންތަނަށް ރޯޑު ވާދިނެސް ހެއްދުމުގެ ހުއްދަ ބާތިލު ވެސް ކުރާނެކަމަށް އޭނާ ވިދާޅުވި އެވެ.
ޝިމާޒް އިތުރަށް ވިދާޅުވީ، ރޯޑް ވާދިނެސް ހައްދައިދޭ ތަންތަނުގައި މޯލްޑިވްސް ޕޮލިޓެކްނިކް ފަދަ ސަރުކާރުން ގަބޫލުކުރާ ކަމާގުޅޭ ސަނަދެއް އޮންނަ ދިވެއްސެއް ހުރުން ލާޒިމުކުރުން އުސޫލުގައި ހިމެނުމަށް އެ މިނިސްޓްރީން ވަނީ ނިންމައިފަ އެވެ. އަދި އެއީ މީގެ ކުރިން އެއްވެސް ވަރަކަށް މޮނިޓާ ކުރެވިފަ އޮތް ކަމެއް ނޫންކަން ވެސް ފާހަގަކުރެއްވި އެވެ.
"ކުރިޔަށް އޮތްތަނުގައި ރޯޑް ވާދިނެސް ހައްދާ ގަރާޖުތަކަށް ހުއްދަ ދޫކުރާއިރު، އެތަނެއްގަ ހުންނަން ޖެހޭނެ ޕޮލިޓެކްނިކް ނުވަތަ ދިވެހި ސަރުކާރުން ގަބޫލުކުރާ ފެންވަރުގަ ސަނަދެއް އޮންނަ، ދިވެއްސެއް. އެނޫން ޝަރުތެއް ހަމަވާ ތަނެއް ނޫނިއްޔަކާ އަޅުގަނޑުމެން ހުއްދައެއް ދޫނުކުރާނެ،" ޝިމާޒް ވިދާޅުވި އެވެ.
މެމްބަރު ހުސެއިން މުހައްމަދު ވަނީ މިނިސްޓްރީން ތައާރަފްކުރަން ނިންމާފައިވާ އާ އުސޫލާއެކު މިހާރު މާލޭގައި އެކަން ކުރަމުން އަންނަ ވިޔަފާރިތަކަށް ވާނޭ ގޮތް އޮޅުން ފިލުވުމަކީ ވެސް މުހިންމު ކަމެއް ކަމަށް ވިދާޅުވެ އެކަމާ ގުޅޭ ގޮތުން ކޮމިޓީގައި ސުވާލުކުރައްވާފަ އެވެ.
"މިހާރު ހުއްދަ ދީފަ ހުރި ތަންތަނަށް ކިހިނެތްތޯ ވާނީ؟ މިހާރު ހުއްދަ ދީފަ ހުރި ތަންތަނުގެ ހުއްދަ ބާތިލުވާނީތޯއޭ ތިބޭފުޅުން ތިގޮތަށް ކަންތައް ކުރެއްވީމަ؟،" މެމްބަރު ހުސެއިން މުހައްމަދު ސުވާލުކުރެއްވި އެވެ.
މެމްބަރުގެ ސުވާލަށް ޖަވާބުއަރުއްވަމުން ކޮމިޓީގައި އިންނެވި މިނިސްޓަރު ނަހުލާ ވަނީ އާ އުސޫލު ގެންނާނީ މިހާރު އެ ވިޔަފާރި ކުރާ ފަރާތްތަކަށް ވެސް ޝަރުތު ހަމަކުރުމަށް ފުރުސަތު ދިނުމަށް ފަހު ކަމަށް ވިދާޅުވެފަ އެވެ. އަދި އެ ޝަރުތު ހަމަނުކުރާ ފަރާތްތަކަށް ހުއްދަ ނުދޭނެކަމަށް މިނިސްޓަރު ނަހުލާ ވެސް ވިދާޅުވި އެވެ.
"އާ އުސޫލު އަޅުގަނޑުމެން އިއުލާންކުރާއިރު، އިއުލާންކުރާނީ މުއްދަތެއް ލުމަށްފަހު، އެ މުއްދަތެއްގެ ތެރޭގަ އެކަން ކުރަން ބޭނުންވާ އެ ވިޔަފާރިކުރާ ބޭފުޅުންނަށް އެ ވިޔަފާރިކުރަން މަގުފަހިވެގެންދާނެ، ހަމައެއާއެކު މި ދެންނެވި ފަދައިން އެ ޝަރުތުތައް ހުންނަ މީހުންނަށް އެކަން ކުރެވޭނީ، މިހާރު އެކަން ކުރަމުންދާ ހުރިހާ ތަނެއް އުވިގެންދާނެ،" މިނިސްތަރު ނަހުލާ ވިދާޅުވި އެވެ.
އާ އުސޫލާއެކު މިނިސްޓްރީން ޝަރުތު ހަމަވާ ތަންތަނާ އެކު އެއްބަސްވުމެއް ހަދާނެ އެވެ. އަދި އެފަދަ ތަނަކުން އުސޫލާ ހިލާފްވެއްޖެނަމަ، ފިޔަވަޅު އަޅައި، އެތަންތަނަށް ދީފައި އޮންނަ ރޯޑް ވާދިނެސް ހައްދައިދިނުމުގެ ހުއްދަ ބާތިލުކުރާނޭކަމަށް މިނިސްޓްރީން އިއްޔެ ބުންޏެވެ. އަދި އެތަންތަނުގައި ސަރުކާރު ގަބޫލުކުރާ ސަނަދެއް އޮންނަ ދިވެއްސެއް ހުރުމަށް އޮންނަ ޝަރުތު ފުރިހަމަކުރުމަށް، ޕޮލިޓެކްނިކުން ހަ މަސް ދުވަހުގެ ކޯހެއް ހިންގާނެ ކަމަށް ވެސް މިނިސްޓްރީ އޮފިޝަލުން އިއްޔެ ބުންޏެވެ.
