ވިހި ތިރީސް ވަނަ އަހަރުގެ ކުރިން ޖަންގަލިތަކުން ގަސް ކެނޑުން ހުއްޓާލައި އަލުން ގަސްތައް އިންދުމުގެ މަސައްކަތް ފަށާނެ ކަމަށް ގައުމުތަކުން އެއްބަސްވެއްޖެ އެވެ.
އެއީ މިހާރު ކުރިއަށްދާ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ބައްދަލުވުން، ކޮޕް26 ގައި ގައުމުތަކުން ނިންމި ފުރަތަމަ އެއްބަސްވުމެވެ.
އެ އެއްބަސްވުމުގައި ސޮއިކުރާ 100 އަށް ވުރެ ގިނަ ގައުމުގެ ތެރޭގައި އެމެޒޯން ޖަންގަލީގެ ބޮޑު ބަޔެއް ކަނޑާފައިވާ ބްރެޒިލް ހިމެނެ އެވެ.
ޖަންގަލިތަކުން ގަސް ކެނޑުން ހުއްޓާލުމަށް ގައުމުތަކުން ވީ ވައުދުގެ ދަށުން ކުރާ މަސައްކަތަށް އެހީވުމަށް 19.2 ބިލިއަން ޑޮލަރު ހޭދަކުރަން އެއްބަސްވުމުގައި ހިމަނާފައި ވެ އެވެ.
ތަޖުރިބާކާރުން އެއްބަސްވުމަށް މަރުހަބާ ކިޔުމަށް ފަހު ބުނީ މީގެ ކުރިން 2014 ވަނަ އަހަރު ވެސް އެފަދަ އެއްބަސްވުމަކަށް އައި ނަމަވެސް ފިޔަވަޅު ނޭޅުމުން އެއްވެސް ކުރިއެރުމެއް ނުލިބުނު ކަމަށެވެ.
ގަސް ކެނޑުމުގެ ސަބަބުން ދުނިޔެ އަށް ގެއްލުން ވަނީ ގަސްތަކަކީ ދުނިޔޭގެ އެޓްމޮސްފިއާގައި ހުންނަ ގިނަ އަދަދެއްގެ ކާބަންޑައިއޮކްސައިޑް ދަމައިގަނެ، އޭގެ ބަދަލުގައި އޮކްސިޖަން ބޭރު ކުރާ އެއްޗަކަށް ވާތީ އެވެ.
ގަސް ކެނޑުން ހުއްޓާލަން އެއްބަސްވި ގައުމުތަކުގެ ތެރޭގައި ކެނެޑާ، ބްރެޒިލް، ރަޝިއާ، ޗައިނާ، އިންޑޮނީޝިއާ އަދި ކޮންގޯ ހިމެނެ އެވެ. އެ ގައުމުތަކުގައި ހުންނަނީ ދުނިޔޭގެ ޖަންގަލިތަކުގެ 85 ޕަސެންޓެވެ.
އެއްބަސްވުމުގެ ދަށުން ހިމެނި ފައިސާގެ ބަޔެއް ހޭދަކުރާނީ ގެއްލުންވެފައިވާ ބިންތައް އަލުން ބިނާ ކުރުމަށާއި، ޖަންގަލިތަކުގެ ރޯވުން ކޮންޓްރޯލް ކުރުމަށް ތަރައްގީ ވަމުން އަންނަ ގައުމުތަކަށެވެ.
އޭގެ އިތުރުން ބައިނަލްއަގްވާމީ ވިޔަފާރީގެ ތެރެއިން ޖަންގަލިތަކުގެ ގަސް ކެނޑުން އުނިކުރަން 28 ގައުމެއްގެ ސަރުކާރުން ވަނީ އެއްބަސްވެފަ އެވެ. އަދި ދުނިޔޭގެ ބޮޑު 30 ކުންފުންޏަކުން ޖަންގަލިން ގަސް ކެނޑުމާ ގުޅިފައިވާ އިންވެސްޓްމަންޓު ހުއްޓާލަން ނިންމި އެވެ.
ދުނިޔޭގެ ދެ ވަނަ އަށް އެންމެ ބޮޑު ޖަންގަލި، ކޮންގޯ ބޭސިން ހިމާޔަތް ކުރަން ހާއްސަ 1.1 ބިލިއަން ޕައުންޑުގެ ފަންޑެއް ގާއިމްކުރަން ވެސް ނިންމާފައި ވެ އެވެ.
