މޫސުމީ ބަދަލާ ގުޅޭ ގޮތުން ގައުމުތަކުން 2015 ވަނަ އަހަރު ސޮއިކުރި ތާރީހީ ޕެރިސް އެއްބަސްވުމުން ވަކިވާން އެމެރިކާގެ ކުރީގެ ރައީސް ޑޮނަލްޑް ޓްރަމްޕް ނިންމެވި މައްސަލައިގައި މިހާރުގެ ރައީސް ޖޯ ބައިޑެން މައާފަށް އެދިވަޑައިގެންފި އެވެ.
ސްކޮޓްލޭންޑުގެ ގްލާސްގޯގައި މިހާރު ކުރިއަށްދާ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ބައްދަލުވުން، ކޮޕް26 ގައި ބައިޑެން މައާފަށް އެދިވަޑައިގެންނެވުމަށް ފަހު ވިދާޅުވީ އެމަނިކުފާނުގެ ސަރުކާރުން އެޅި އެންމެ ފުރަތަމަ އެއް ފިޔަވަޅަކީ އަލުން އެއްބަސްވުމުގައި ބައިވެރިވުން ކަމަށެވެ.
ޕެރިސް އެގްރީމެންޓުން ވަކިވާން ނިންމުމަށް ފަހު ޓްރަމްޕް ވިދާޅުވީ އެ އެއްބަސްވުމުގެ ސަބަބުން ވަޒީފާތައް ގެއްލެމުންދާ ކަމަށެވެ.
އެއާ ހިލާފަށް ކޮޕް26 ގައި ބައިޑެން ވިދާޅުވީ މޫސުމީ ބަދަލާ ދެކޮޅަށް މަސައްކަތް ކުރުމުން އިގްތިސާދަށް ވާނީ ގެއްލުން ނޫން ކަމަށާއި ލިބޭނީ ފައިދާ ކަމަށެވެ،
"މި އިތުރުވަމުންދާ ބިރުވެރިކަމުގެ ތެރެއިން ވެސް އަޅުގަނޑަށް ފެންނަނީ އާދަޔާ ހިލާފު ފުރުސަތެއް. އެއީ ހަމައެކަނި އެމެރިކާ އަށް އޮތް ފުރުސަތެއް ނޫން. ހުރިހާ ގައުމުތަކަށް ވެސް އޮތް ފުރުސަތެއް،" ފެހި އިގްތިސާދަކަށް ބަދަލުވުމާ ގުޅޭ ގޮތުން ބައިޑެން ވިދާޅުވި އެވެ.
ބައިޑެން ވައުދުވެވަޑައިގެންނެވީ އެމެރިކާގެ ފަރާތުން "ވާހަކަ ދެއްކުމުގެ ބަދަލުގެ އަމަލުން ކުރިއެރުން" ދެއްކުމަށެވެ.
"އެމެރިކާ ހަމައެކަނި އައިސް މި މޭޒުގައި އިށީނީކީ ނޫން. އުއްމީދަކީ ލާމަސީލު ނަމޫނާއެއްގެ ގޮތުގައި ދުނިޔެ ލީޑުކުރުން."
ބައިޑެން ވިދާޅުވީ ފިޔަވަޅެއް ނާޅައި ތިބުމުން މިހާރު ވެސް އިގްތިސާދަށް ލިބެމުން ދަނީ ގެއްލުން ކަމަށެވެ. ނަމަވެސް އިއާދަކުރަނިވި ޓެކްނޮލޮޖީ އަށް ބަދަލުވެ، ސާފު ހަކަތަ އާއި ތިމާވެއްޓާ ރައްޓެހި އިގްތިސާދެއް ބިނާކުރަން ފެށުމުން ލިބޭ ފައިދާ ބޮޑުވާނެ ކަމަށެވެ.
އާދީއްތަ ދުވަހުގެ ރޭ ފެށި ކޮޕް26 ސަމިޓު ކުރިއަށް ދާނީ ނޮވެމްބަރު 12 ވަނަ ދުވަހާ ހަމައަށެވެ. އެ ބައްދަލުވުމުގެ އެއް އަމާޒަކީ ދުނިޔެ ހޫނުވުން 1.5 ޑިގްރީ ސެލްސިއަސް އަށް ވުރެ މަތިވިޔަ ނުދީ ހިފެހެއްޓުމަށް ގައުމުތަކުން ކުރާނެ ކަންކަން ފައިނަލް ކުރުމެވެ.
ޕެރިސް އެގްރީމެންޓަކީ ކޮބާ؟
ހުރިހާ ގައުމަކުން ވެސް އެއްބަސްވަނީ އެކުގައި މަސައްކަތްކޮށްގެން މޫސުމީ ބަދަލު ކޮންޓްރޯލް ކުރެވިދާނެ ކަމަށެވެ. ޕެރިސްގައި 2015 ވަނަ އަހަރު ސޮއިކުރި އެއްބަސްވުމުގެ ދަށުން އެއްބަސްވީ 1.5 ޑިގްރީ ސެލްސިއަސް އަށް ވުރެ މަތިވިޔަ ނުދީ ފިނިހޫނުމިން ދެމެހެއްޓުމަށެވެ.
އެކަން ހާސިލްކުރަން ކުރާނެ ކަންކަން ކޮންމެ ފަސް އަހަރަކުން ހުށަހަޅަން ޖެހެނީ ނޭޝަނަލީ ޑިޓާމައިންޑް ކޮންޓްރިބިއުޝަންސް (އެންޑީސީ) ގެ ނަމުގައި ވަކިވަކި ގައުމުތަކުންނެވެ. ނަމަވެސް މި ފަހަރުގެ ކޮޕް ސަމިޓާ ދިމާކޮށް ބައެއް ގައުމުތަކުން އެންޑީސީ އަދިވެސް ހުށަހަޅާފައެއް ނުވެ އެވެ. އޭގެ ތެރޭގައި ޗައިނާ އަދި އިންޑިއާ ހިމެނެ އެވެ.
މިހާރު ގައުމުތަކުން ހުށަހަޅާފައި ހުރި އެންޑީސީތަކަށް ބަލާއިރު، ދުނިޔެ ހޫނުވުން 1.5 ޑިގްރީ ސެލްސިއަސް އަށް ވުރެ މަތިވާނެ ކަމަށް ސައިންސްވެރިން ބުނެ އެވެ. އެހެންކަމުން ކޮޕް26 އަށް ދާއިރު، ޕެރިސް އެގްރީމެންޓުގެ ދަށުން އެންމެ ފުރަތަމަ ހުށަހެޅި އެންޑީސީތައް މުރާޖައާ ކުރުން މުހިއްމެވެ.
