އިރާނަށް ދެއްކުމުގެ ގޮތުން އެކުވެރި ގައުމުތަކުގެ ރައްކާތެރިކަމާ އެކު އެމެރިކާގެ ވައިގެ ފައުޖުގެ ބޮން އަޅާ ޖެޓެއް މެދުއިރުމަތީގެ ވައިގެ ސަރަހައްދުން ދަތުރުކޮށްފި އެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ ބީ-1ބީ ލޭންސާ ޖެޓު ދަތުރު ކުރީ ގަލްފު ސަރަހައްދާއި، ބާބް އަލް މަންދެބް ސްޓްރެއިޓް އާއި ސުއެޒް ކެނަލް އަދި ގަލްފް އޮފް އޮމާންގެ މަތިން ކަމަށެވެ.
އޭގެ އިތުރުން އިރާނަށް މުހިއްމު ސްޓްރެޓެޖިކް ސަރަހައްދެއް ކަމަށްވާ ސްޓްރެއިޓް އޮފް ހޮރްމުޒް މަތިން ވެސް ޖެޓު ދަތުރުކުރި އެވެ.
އެ ޖެޓު ދަތުރު ކުރަމުން ދިޔަ އިރު އިޒްރޭލާއި، ސައުދީ އަރަބިއްޔާ އަދި ބަހްރެއިން އާއި މިސްރުގެ ވައިގެ ފައުޖުން ރައްކާތެރިކަން ފޯރުކޮށްދެމުން ދިޔަ އެވެ.
މިދިޔަ ޖެނުއަރީ މަހު ވެސް އެމެރިކާގެ ޖެޓެއް މެދުއިރުމަތީގެ ސަރަހައްދުން ދަތުރުކުރި އެވެ. އެ ފަހަރު ދަތުރުކުރި ބީ-52 ޖެޓަކީ ނިޔުކްލިއާ ހަތިޔާރު އުލުމުގެ ގާބިލްކަން ލިބިފައިވާ ޖެޓެކެވެ.
އެނެލިސްޓުން ބުނާ ގޮތުގައި މިދިޔަ ފެބްރުއަރީ މަހުން ފެށިގެން އިރާނާއި އިޒްރޭލުން ދަނީ "ހިޔަނި ހަނގުރާމައެއް" ކުރަމުންނެވެ. އެގޮތުން ގަލްފު ސަރަހައްދުގައި އުޅޭ ދެ ގައުމުގެ މަނަވަރުތަކަށް ވެސް ހަމަލާ އަމާޒުވެފައި ވެ އެވެ.
އެމެރިކާގެ އަސްކަރީ ޖެޓެއް މެދުއިރުމަތީގެ ސަރަހައްދުން ދަތުރުކޮށްފައި ވާއިރު އިރާނުގެ ނިޔުކްލިއާ މަޝްރޫއާ ގުޅޭ މަޝްވަރާތައް މި މަހު އަލުން ފެށުމަށް އަންނަނީ މަސައްކަތް ކުރަމުންނެވެ.
