ލަންޑަން (ނޮވެމްބަރު 1) - ޓޮޓެންހަމް ހޮޓްސްޕާސްގެ ކޯޗުކަމުން ޕޯޗުގީސް ކޯޗު ނޫނޯ އެސްޕިރީޓޯ ސަންޓޯ ވަކިކޮށް މި ވަގުތު ވަޒީފާއެއް ނެތި ހުރި އިޓަލީގެ ކޯޗު އެންޓޯނިއޯ ކޮންޓޭ ގެންނަން ޓޮޓެންހަމުން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
މިދިޔަ ޖޫން މަހު ގިނަ ކޯޗުންތަކެއް ނޫނެކޭ ބުނެފައި އޮތް ޓޮޓެންހަމާ ނޫނޯ ހަވާލުވީ ދެ އަހަރުގެ އެއްބަސްވުމެއްގަ އެވެ. ޓޮޓެންހަމް އިން ނޫނޯ ގެނައުމުގެ ކުރިން ކޮންޓޭއާ މަޝްވަރާކުރި ނަމަވެސް އޭނާ ބޭނުންވި ބައެއް ކަންކަމަށް ޓޮޓެންހަމުން އެއްބަސްނުވާތީ މަޝްވަރާތައް ހުއްޓުނީ އެވެ.
ކުރިން ޕޯޓޯ އާއި ވުލްްވްސް އަށް ކޯޗުކޮށްދިން ނޫނޯ ޓޮޓެންހަމަށް ގެނައީ ދެ އަހަރުގެ ކޮންޓްރެކްޓެއްގަ އެވެ. ސީޒަން ފަށައިގެން ރަނގަޅު ޓްރެކްގައި ޓޮޓެންހަމް އޮތް ނަމަވެސް ފަހަކަށް އައިސް އެ ޓީމު އޮތީ ވަރަށް ބޮޑަށް ފޯމު ގެއްލިފަ އެވެ. އެންމެ ފަހުން ކުޅުނު މެޗުގައި ވަނީ އަމިއްލަ ދަނޑުގައި އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑް އަތުން 3-0 އިން ބަލިވެފަ އެވެ.
ކޯޗު އެންޓޯނިއޯ ކޮންޓޭ: އޭނާ ޓޮޓެންހަމާ ހަވާލުވުމުގެ ފުރުސަތު އެބައޮތް.
ޔުނައިޓެޑް އަތުން ބަލިވި މެޗަށް ފަހު ޓޮޓެންހަމްގެ ސްޕޯޓިން ޑިރެކްޓަރު ފަބިއޯ ޕަރަޓީޗީ ވަނީ ނޫނޯއާ ބައްދަލުކޮށްފަ އެވެ. ރިޕޯޓްތައް ބުނާގޮތުން އެ ބައްދަލުވުމުގައި ވަނީ ނޫނޯގެ މުސްތަގުބަލާ ގުޅޭގޮތުން ވާހަަކަ ދައްކައިފަ އެވެ. އަދި ކްލަބްގެ ބޯޑުން މަޝްވަރާކޮށް ގޮތެއް ނިންމަން އެޖެންޑާ ކޮށްފައިވާކަން ނޫނޯގެ ސަމާލުކަމަށް ގެނެސްފަ އެވެ.
ސަތާރަ މެޗަށް ފަހު ނޫނޯ ވަކިކުރަން ޓޮޓެންހަމް އިން ނިންމައިފިނަމަ ދެން އެ ޓީމުން އެންމެ ގެންނަން ބޭނުމީ ކޮންޓޭ އެވެ.
ދާދި ފަހުން ނިއުކާސަލް ޔުނައިޓެޑްގެ ކޯޗަކަށް ވާން ކޮންޓޭ އަށް ލިބުނު ފުރުސަތު އޭނާ ވަނީ ދޫކޮށްލައިފަ އެވެ. މެންޗެސްޓާ ޔުނައިޓެޑާ ހަވާލުވާން ކޮންޓޭ ބޭނުންވާ ކަމަށް ވެސް ބައެއް މީޑިއާތަކުން ވަނީ ރިޕޯޓްކޮށްފަ އެވެ.
ޔުނައިޓެޑުން އެ ޓީމުގެ ކޯޗު އޮލެ ގުނަ ސޯލްޝެއާއާ އެކު ކުރިއަށްދާނެ ކަމަށް ބެލެވޭއިރު، މިހާރު ހާލަތު އޮތްގޮތުން ޓޮޓެންހަމާ ކޮންޓޭ ހަވާލުވުމުގެ ފުރުސަތު އެބައޮތެވެ.
މިދިޔަ ސީޒަނުގައި އިންޓަ މިލާނަށް އިޓާލިއަން ލީގު ކާމިޔާބު ކޮށްދިނުމަށް ފަހު އެ ޓީމު ދޫކޮށްލި ކޮންޓޭ ވަނީ މީގެ ކުރިން ޗެލްސީ އަށް ކޯޗުކޮށްދީ އެ ޓީމަށް ލީގު ކާމިޔާބު ކޮށްދީފަ އެވެ. ކޮންޓޭގެ އިތުރުން ޓޮޓެންހަމުން ކޯޗަކަށް ގެންނަން ބޭނުންވާ މީހުންގެ ޝޯޓްލިސްޓުގައި ކުރިން ރޯމާ އާއި ޝަހުތަރު ޑޮނެސްކަށް ކޯޗުކޮށްދިން ޕައޮލޯ ފޮންސޭކާ ހިމެނެ އެވެ.
