ދުނިޔޭގެ ބޮޑެތި ކުންފުނިތަކުން 15 ޕަސެންޓުގެ ޓެކްސެއް ނެގުމަށް ނިންމައި، އެންމެ ކުރިއަރާފައިވާ 20 ގައުމުން ބައިނަލްއަގްވާމީ އެއްބަސްވުމެއްގައި ސޮއިކޮށްފި އެވެ.
އެފަދަ އެއްބަސްވުމަކަށް އައިސްފައި ވަނީ މަލްޓިނެޝަނަލް ކުންފުނިތަކަށް ލިބޭ ފައިދާ އިން ދައްކަން ޖެހޭ ޓެކްސް ވީހާވެސް މަދުން ދެއްކޭ ގޮތްތަކަށް އަމަލުކުރާ ކަމުގެ ކަންބޮޑުވުންތަކަށް ފަހު އެވެ.
އެއްބަސްވުމުގައި ސޮއިކުރީ ފާއިތުވި ހަފުތާ ބަންދުގައި އިޓަލީގެ ރޯމްގައި އޮތް ޖީ20 ސަމިޓުގައި ބައިވެރިވި ގައުމުތަކުގެ ހުރިހާ ލީޑަރުންނެވެ.
ސަމިޓުގެ އެޖެންޑާގައި މޫސުމީ ބަދަލާއި ކޮވިޑް ބަލިމަޑުކަން ވެސް ހިމެނެ އެވެ. މިއީ ބަލިމަޑުކަށް ފެށުނު ފަހުން ޖީ20 ގެ ލީޑަރުން އެއް ތަނަކުން ބައްދަލުވާ ފުރަތަމަ ފަހަރެވެ.
ޖީ20 ގްރޫޕުގައި ހިމެނެނީ 19 ގައުމަކާއި ޔޫރަޕިއަން ޔޫނިއަން (އީޔޫ) އެވެ. ޗައިނާގެ ރައީސް ޝީ ޖިންޕިން އާއި ރަޝިއާގެ ރައީސް ލެޑިމިއަ ޕޫޓިން ސަމިޓުގައި ބައިވެރިވެވަޑައިގެންނެވީ ވާޗުއަލްކޮށެވެ.
ޓެކްސް އެއްބަސްވުމަކީ އެމެރިކާގެ ހިޔާލެކެވެ. އާދީއްތަ ދުވަހުން ފެށިގެން އެ އެއްބަސްވުން އެޑޮޕްޓުކޮށް، 2023 އިން ފެށިގެން ތަންފީޒު ކުރާނެ އެވެ.
އެމެރިކާގެ ޓްރެޝަރީ ސެކެޓްރީ ޖެނެޓް ޔެލެން ވިދާޅުވީ ތާރީހީ އެއްބަސްވުމުގައި ސޮއިކުރުމަކީ ދުނިޔޭގެ އިގްތިސާދަށް މުހިއްމު ދަނޑިވަޅެއް ކަމަށާއި ކޯޕަރޭޓް ޓެކްސް ނަހަމަކޮށް ނެގުން ދެން ނިމުނީ ކަމަށެވެ.
ޓްވިޓާގައި އޭނާ ވިދާޅުވީ އެއްބަސްވުމުގެ ސަބަބުން އެމެރިކާގެ ކުންފުނިތަކާއި މަސައްކަތްތެރިންނަށް ފައިދާ ކުރާނެ ކަމަށެވެ. ނަމަވެސް އޭގެ ދަށުން އެމެރިކާގެ ބޮޑެތި ކުންފުނިތަކުން ދައްކަން ޖެހޭ ޓެކްސް އިތުރުވާނެ އެވެ.
ޖީ20 ސަމިޓު ފަށާފައި ވަނީ މޫސުމީ ބަދަލާ ގުޅޭ ބައިނަލްއަގްވާމީ ބޮޑު ސަމިޓު، ކޮޕް26 ގެ ކުރިންނެވެ. ޖީ20 ގައި ނިންމާ ކަންކަމުގެ އަސަރު ކޮޕް26 އަށް ކުރުން އެކަށީގެންވެ އެވެ.
މޫސުމީ ބަދަލު ކުޑަ ކުރަން ގައުމުތަކުން އަޅާނެ ފިޔަވަޅުތައް ކޮޕް26 އަށް ހުށަހަޅަން ޖެހެ އެވެ. ނަމަވެސް ބައެއް ގައުމުތަކުން އެކަން މިހާތަނަށް ވެސް ކޮށްފައެއް ނުވެ އެވެ.
