މެޑްރިޑް (31 އޮކްޓޯބަރު) - ސްޕެނިޝް ލީގުގައި ރޭ އެލްޗޭ އަތުން 2-1 އިން މޮޅުވެ، ރެއާލް މެޑްރިޑް ތާވަލްގެ އެއް ވަނަ އަށް ޖެހިލިއިރު، އަމިއްލަ ދަނޑުގައި ބާސެލޯނާ ކުޅުނު މެޗުން އަލްވޭސްއާ 1-1 އިން އެއްވަރުވެ ލީގުގެ ނުވަ ވަނަ އަށް ވެއްޓިއްޖެ އެވެ.
ރަށުން ބޭރުގައި އެލްޗޭއާ ދެކޮޅަށް ރެއާލް ކުޅުނު މެޗުގައި އެ ޓީމުގެ ދެ ލަނޑު ވެސް ޖަހައިދިނީ ރަނގަޅު ފޯމެއްގައި ހުރި ބްރެޒިލްގެ ވިންގާ ވިނީޝިއަސް ޖޫނިއާ އެވެ.
މެޗުގެ ފަހުކޮޅު އެލްޗޭގެ ޕެރޭ މިލާ ލަނޑެއް ޖެހި ނަމަވެސް، ރެއާލް ވަނީ އެ ޓީމުގެ ލީޑު ހިފަހައްޓައިފަ އެވެ. މެޗުގެ 63 ވަނަ މިނިޓުގައި އެލްޗޭގެ ގުޓިއޭރޭޒް ޕަރޭހޯ އަށް ރަތްކާޑު ދެއްކުމުން، އެ ޓީމު މެޗު ފުރިހަމަކުރީ 10 ކުޅުންތެރިންނާއެކު އެވެ.
ގޯލު ޖެހުމަށް ފަހު ރެއާލްގެ ވިނީޝިއުސް އުފާފާޅުކުރަނީ.-- ފޮޓޯ: އޭއެފްޕީ
މި މެޗުން މޮޅުވެ، ރެއާލް އަލުން ތާވަލްގެ އެއް ވަނަ އަަށް ޖެހިލީ ގޯލުގެ ތަފާތުންނެވެ. ރެއާލް އާއި ތާވަލްގެ ދެވަނައިގައި އޮތް ސެވިއްޔާ އާއި ތިން ވަނައިގައި އޮތް ރެއާލް ސޮސިއޭޑާޑަށް ވެސް ލިބިފައިވަނީ 24 ޕޮއިންޓެވެ. ލީގުގައި މިރޭ އެތުލެޓިކް ބިލްބާއޯއާ ދެކޮޅަށް ކުޅޭ މެޗުން ސޮސިއެޑާޑް މޮޅުވެއްޖެ ނަމަ، އެ ޓީމު އެއްވަނަ އަށް ޖެހިލާނެ އެވެ.
ބާސާގެ ކޯޗުކަމުން ރޮނާލްޑް ކޫމަން ވަކިކުރުމަށް ފަހު، ބާސާ އިން ކުޅުނު ފުރަތަމަ މެޗުގައި އެ ޓީމަށް ލީޑު ނަގައިދިނީ ނެދަލޭންޑްސްގެ ފޯވަޑް މެމްފިސް ޑިޕާއީ އެވެ. އެކަމަކު، ބާސެލޯނާގެ ޑިފެންސް ތެރެއިން ހެދުނު ގޯހެއްގެ ފައިދާނަގައި އަލަވޭސްގެ ލުއިސް ރިއޯހާ ވަނީ ދެ ވަނަ ހާފުގެ ކުރީކޮޅު ލަނޑެއް ޖަހައި، މެޗުގެ ނަތީޖާ އެއްވަރުކޮށްފަ އެވެ.
މި މެޗުގައި ބާސާގެ ފޯވަޑް ސާޖިއޯ އަގުއޭރޯގެ މެޔަށް އުނދަގުލެއް ވެގެން، އޭނާ ވަނީ ހޮސްޕިޓަލަށް ގެންގޮސްފަ އެވެ. ބާސާ އިން ފަހުން ބުނީ "ކާޑިއަކް" ޓެސްޓްތަކެއް ކުރުމަށް އަގުއޭރޯ ،33، ހޮސްޕިޓަލްގައި އެޑްމިޓްކޮށްފައިވާ ކަމަށެވެ.
މެޗުގެ ތެރެއިން އަގުއޭރޯ: އޭނާ މެއަށް ތަދުވާތީ ވަނީ ހޮސްޕިޓަލަށް ގެންގޮސްފައި.
މިއީ މެންޗެސްޓާ ސިޓީން މި ސީޒަންގައި ބާސާ އަށް ބަދަލުވި އަގުއޭރޯ އެ ޓީމުގެ ފުރަތަމަ 11 ގައި ކުޅުނު ފުރަތަމަ މެޗެވެ.
"މި ވަގުތު އަހަންނަށް މާ ބޮޑު ތަފްސީލެއް ނޭނގޭ. އަގުއޭރޯ ހޮސްޕިޓަލަށް ގެންގޮސް، ޓެސްޓްތަކެއް ހަދާކަން އަހަންނަށް އެނގެނީ،" ބާސާގެ ވަގުތީ ކޯޗު ސެރްޖީ ބަރްޖުއާން ބުންޏެވެ.
މި މެޗުން ލިބުނު ޕޮއިންޓާއެކު، ބާސާ އޮތީ ތާވަލްގެ ނުވަ ވަނައިގަ އެވެ.
ލަ ލީގާގައި ރޭ ކުޅުނު އެހެން މެޗުތަކަށް ބަލާލާއިރު، އޮސަސޫނާ އަތުން ސެވިއްޔާ މޮޅުވީ 2-0 އިންނެވެ. އަދި ވިޔަރެއާލް އަތުން ވެލެންސިއާ ވަނީ 2-0 އިން މޮޅުވެފަ އެވެ. -- ބީބީސީ
