ކާބޯތަކެތީގެ ސަބްސިޑީއަކީ ޓާގެޓެޑް ސަބްސިޑީއަކަށް ހަދަންޖެހޭ ކަމަށް ފިނޭންސް މިނިސްޓްރީން ބުނެފި އެވެ. އެ މިނިސްޓްރީން މިގޮތަށް ބުނީ މިހާރު ކާބޯތަކެތީގެ ސަބްސިޑީ ދޭ އުސޫލު އޮތްގޮތުން ތަނަވަސް ގޭބިސީތަކުގެ އިތުރުން ވިޔަފާރިތަކާއި ފަތުރުވެރިން ހިމެނޭހެން، ރާއްޖޭގައި ކާޑުގެ ބާވަތްތައް ގަންނަ ހުރިހާ ފަރާތްތަކަށްވެސް ކާޑުގެ ސަބްސިޑީ އެއް ހަމައެއްގައި ލިބޭތީ އެވެ.
އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓުގައި ކާބޯތަކެތީގެ ސަބްސިޑީ ދިނުމުގައި މިހާރު ގެންގުޅޭ އުސޫލުގައި ހުރި މައްސަލަތައް ވަނީ ފާހަގަކޮށްފަ އެވެ.
ކާބޯތަކެތީގެ ސަބްސިޑީގެ ގޮތުގައި ދައުލަތުން ސަބްސިޑީ ދެވެނީ ހަނޑޫ، ހަކުރު އަދި ފުށް ފަދަ ކާޑުގެ ބާވަތްތަކަށެވެ. މިއީ އެސްޓީއޯއިން ވިއްކާ ހަނޑޫ، ހަކުރު އަދި ފުށް ދައުލަތުން އަންގާ ކޮންޓްރޯލްޑް އަގެއްގައި ވިއްކާތީ އެ ކުންފުންޏަށް ލިބޭ ގެއްލުމުގެ ބަދަލު ދިނުމަށް ދައުލަތުން ދޭ ސަބްސިޑީ އެކެވެ.
މި އުސޫލުން ކާބޯތަކެތީގެ ސަބްސިޑީ ދިނުމަށްޓަކައި ސަރުކާރުން 350 މިލިއަން ރުފިޔާއަށްވުރެ ގިނައިން ކޮންމެ އަހަރަކު ހަރަދުކުރަންޖެހޭއިރު، މި ސަބްސިޑީގެ 99.9 ޕަސަންޓަކީ އެސްޓީއޯއަށް ދޭ ބަދަލެވެ.
ފިނޭންސުން ބުނާ ގޮތުގައި މިހާރު ކާބޯތަކެތީގެ ސަބްސިޑީ ދޭ އުސޫލުގެ މަތިން ރާއްޖޭން ކާޑުގެ ބާވަތްތައް ގަންނަ ހުރިހާ ފަރާތްތަކަށްވެސް ކާޑުގެ ސަބްސިޑީ ލިބެ އެވެ.
titledesc
ތަނަވަސް ގޭބިސީތަކާއި ވިޔަފާރިތަކާއި ފަތުރުވެރިންނަށްވެސް ކާބޯތަކެތީގެ ސަބްސިޑީ އެއް ހަމައެއްގައި މި ލިބެމުންދާ ކަމަށް މިނިސްޓްރީން ބުންޏެވެ.
އެގޮތުން ފާއިތުވި އަހަރުތަކުގެ ތަފާސްހިސާބުތަކަށް ބަލާއިރު، 2018 ވަނަ އަހަރު މި ސަބްސިޑީއަށް ދައުލަތުން 311.2 މިލިއަން ރުފިޔާ ހަރަދުކޮށްފައިވާއިރު، ޖެހިގެން އައި އަހަރު 352.6 މިލިއަން ރުފިޔާ ވަނީ ހޭދަވެފަ އެވެ.
ނަމަވެސް، މިދިޔަ އަހަރު ކޮވިޑުގެ ބަލިމަޑުކަމުގެ ސަބަބުން ރާއްޖޭގެ ބޯޑަރުތައް ބަންދުކޮށް، ޓޫރިސްޓުން އައުން އެކީގައިހެން ހުއްޓިގެން ދިޔުމާ ގުޅިގެން އެ އަދަދު ވަނީ 210.6 މިލިއަން ރުފިޔާއަށް ދަށްވެފަ އެވެ.
އެއީ އޭގެ ކުރީ އަހަރާ އަޅާބަލާއިރު، 40.3 ޕަސަންޓުގެ ވެއްޓުމެކެވެ.
ކާބޯތަކެތީގެ ސަބްސިޑީ އިން ޓޫރިޒަމް ސެކްޓަރއަށް ހޭދަކުރެވޭ މިންވަރު ފާހަގަކުރަމުން ފިނޭންސުން ބުނީ 2019 ވަނަ އަހަރުގެ ހައުސްހޯލްޑް އިންކަމް އެކްސްޕެންޑިޗާ ސާވޭ (ހަޔަސް)ގައި ގޭބިސީތަކުން ކާޑުގެ ބާވަތްތަކަށް ކުރި ހަރަދަށް ބަލާ އަންދާޒާކުރެވެނީ، ގޭބިސީތަކުން ބޭނުންކުރަނީ އެސްޓީއޯއިން ވިއްކާ ކާޑުގެ ބާވަތްތަކުގެ މަދުބައެއް ކަމަށެވެ.
އެގޮތުން، އެސްޓީއޯއިން 2019 ވަނަ އަހަރު ވިއްކި ހަނޑުލުގެ 57.2 ޕަސަންޓު އަދި ފުށުގެ 49.6 ޕަސަންޓު އިންސައްތަ ގޭބިސީތަކުން ބޭނުންކުރާއިރު، ގޭބިސީތަކުން ބޭނުންކޮށްފައިވަނީ އެސްޓީއޯއިން ވިއްކި ހަކުރުގެ އެންމެ 31.7 ޕަސަންޓެވެ.
ފިނޭންސުން ހުށަހަޅާ ހައްލު
ފިނޭންސުން ބުނި ގޮތުގައި އެހެން ގައުމުތަކުން ވެސް މީގެ ކުރިން ކާބޯތަކެތީގެ ސަބްސިޑީ ދެމުންގެންދިޔައީ އިންޑައިރެކްޓް ސަބްސިޑީއެއް ގޮތުގައި ނަމަވެސް، ގިނަ ގައުމުތަކުން މިހާރު ވަނީ ސަބްސިޑީ ދޭ އުސޫލު ޓާގެޓެޑް ސަބްސިޑީއަކަށް ބަދަލުކޮށްފަ އެވެ.
މިގޮތުން ސަބްސިޑީ ދިނުމުގައި ފުޑް ޓްރާންސްފާ، ވައުޗާ އަދި ކޭޝް ޓްރާންސްފާ ދިނުން ފަދަ އުސޫލުތައް ބޭނުންކުރާ ކަމަށް ބުންޏެވެ.
މީގެ އިތުރުން، ގިނަ ގައުމުތަކުން ރާއްޖެއާ އެއްގޮތަށް ހަނޑޫ ނުވަތަ އެ ގައުމެއްގައި ކެއުމަށް ގިނައިން ބޭނުންކުރާ އެހެން ބާވަތްތަކަށް ސަބްސިޑީ ނުވަތަ އެހީ ދިން ނަމަވެސް، އެއްވެސް ގައުމަކުން މި ސަބްސިޑީގެ ތެރޭގައި ހަކުރު ނުހިމަނާކަން ފާހަގަކުރެވޭ ކަމަށް ވެސް ފިނޭންސް މިނިސްޓްރީން ބުންޏެވެ.
2022 ބަޖެޓުގެ ހުލާސާ
މި ކަންބޮޑުވުމުގެ އިތުރުންވެސް، އަންނަ އަހަރުގެ ތެރޭގައި ދައުލަތުގެ ބަޖެޓުން ދޭ އިންޑައިރެކްޓް ސަބްސިޑީތައް ދިނުމުގައި ހުރި އިސްރާފުތައް ކުޑަކުރުމަށް ފިޔަވަޅުތަކެއް އެޅުމަށް ރާވައިފައިވާ ކަމަށް ފިނޭންސުން ބުންޏެވެ.
"މި ފިޔަވަޅުތަކުގެ ސަބަބުން ރައްޔިތުންނަށް ދޭ ހިދުމަތްތައް ނުވަތަ ފޯރުކޮށްދޭ ތަކެތީގެ އަގަށް އެއްވެސް ބަދަލެއް ނާންނާނެ އެވެ،" ފިނޭންސުން ޔަގީންކަން ދިނެވެ.
މިނިސްޓްރީން އިތުރަށް ބުނީ މި މަސައްކަތުގެ އަމާޒަކީ މިވަގުތު ހުރި އިންއެފިޝަންސީތަކުގެ ސަބަބުން ކުރިމަތިވާ ''ޑެޑް ވެއިޓް ލޮސް'' ނުވަތަ އިންއެފިޝަންސީގެ ސަބަބުން މުޅި މުޖުތަމައަށް ގެއްލިގެންދާ ބައި ކުޑަކުރުން ކަމަށެވެ.
