ވޮޝިންޓަން، އެމެރިކާ (އޮކްޓޯބަރު 30) - އިރާނުގެ ނިޔުކްލިއާ މަޝްރޫއާ ގުޅޭ މަޝްވަރާތައް އަލުން ފަށަން ތައްޔާރުވަމުން ދަނިކޮށް އެމެރިކާ އިން އިރާނުގެ ޑްރޯން ޕްރޮގްރާމާ ދެކޮޅަށް ފިޔަވަޅު އަޅައިފި އެވެ.
އެމެރިކާ އިން ބުނީ އިރާނުގެ ޑްރޯންތައް ބޭނުންކޮށްގެން ގަލްފު ސަރަހައްދުގައި އުޅޭ އެމެރިކާގެ ފައުޖުތަކާއި ބައިނަލްއަގްވާމީ މަނަވަރުތަކަށް ހަމަލާދެމުންދާ ކަމަށެވެ.
އޭގެ އިތުރުން އިރާނުން ވަނީ ހިޒްބުﷲ އާއި ހަމާސް، ޔަމަނުގެ ހޫތީން އަދި އިތިއޮޕިއާ އަށް ޑްރޯން ސަޕްލައިކޮށްފައި ކަމަށް ވެސް އެމެރިކާ އިން ތުހުމަތު ކުރެ އެވެ.
އެމެރިކާ އިން ދަތިކުރުމުގެ ފިޔަވަޅު އަޅާފައި ވަނީ އިރާނުގެ ޑްރޯން ޕްރޮގްރާމުގެ އިސްވެރިޔާ ބްރިގޭޑިއާ ޖެނެރަލް ސައީދް އަގްހަޖާނީއާ ދެކޮޅަށެވެ.
އެމެރިކާ އިން ތުހުމަތު ކުރާ ގޮތުގައި 2019 ވަނަ އަހަރު ސައުދީ އަރަބިއްޔާގެ ތެޔޮ ފެކްޓްރީއަކަށް ދިން ހަމަލާގެ ފަހަތުގައި ހުރީ އަގްހަޖާނީ އެވެ. އޭގެ އިތުރުން މި އަހަރުގެ ޖުލައި މަހު އޮމާން ކައިރިން މަނަވަރަކަށް ހަމަލާދީ ދެ މީހުން މަރުވި ހާދިސާ އަށް ވެސް ޒިންމާ ވާން ޖެހެނީ އޭނާ ކަމަށް އެމެރިކާ އިން ބުނެ އެވެ.
ދަތިކުރުމުގެ ފިޔަވަޅު އެޅި ފަރާތްތަކުގެ ލިސްޓުގައި ދެ ކުންފުނި ހިމެނެ އެވެ. އެއީ ކިމިއާ ޕާޓް ސިވާން އާއި އޮޖޭ ޕަރްވާޒް މަޑޯ ނަފަރް އެވެ. އެ ދެ ކުންފުންޏަކީ ޑްރޯން އުފައްދަން ބޭނުންވާ ސާމާނު ސަޕްލައިކުރާ ދެ ކުންފުންޏެވެ.
"އިރާނުން ޑްރޯން އުފައްދައިގެން ކުރާ މަސައްކަތާ ހެދި ބައިނަލްއަގްވާމީ ސުލްހަ އާއި ހަމަޖެހުމަށް ހުރަސް އެޅޭ،" އެމެރިކާގެ ޑެޕިއުޓީ ޓްރެޝަރީ ސެކެޓްރީ ވެލީ އަޑެޔެމޯ ވިދާޅުވި އެވެ.
"އިރާނުން ހިންގާ ޒިންމާދާރުކަން ކުޑަ އަނިޔާވެރި އަމަލުތަކަށް އެ ގައުމު ޖަވާބުދާރީ ކުރުވަމުން ދާނަން."
އިރާނާ ދެކޮޅަށް ފިޔަވަޅު އަޅާފައި ވާއިރު، މީގެ ނުވަ ދުވަސް ކުރިން ސީރިއާގެ އަލް ތަންފުގައި ހުންނަ އެމެރިކާގެ އަސްކަރީ މަރުކަޒަކަށް ޑްރޯން ބޭނުންކޮށްގެން ހަމަލާއެއް ދީފައި ވެ އެވެ.
އެ ހަމަލާ ދިނީ ކޮން ބައެއްކަން ޕެންޓަގަން އިން ހާމަކޮށްފައެއް ނުވެ އެވެ. ނަމަވެސް މެދުއިރުމަތީގައި އެފަދަ ހަމަލާ ދިނުމަށް އިރާނުން ޑްރޯން ފޯރުކޮށްދޭ ކަމަށް ބުންޏެވެ.
"މީގެ ކުރިން ވެސް މިކަހަލަ ހަމަލާތައް ފެނިފައިވޭ. އެއީ އިރާނުގެ އެހީއާ އެކު ޝިއައީ އަސްކަރީ ގްރޫޕުތަކުން ދޭ ހަމަލާތައް،" މިދިޔަ ހޯމަ ދުވަހު ޕެންޓަގަންގެ ތަރުޖަމާނު ޖޯން ކާބީ ވިދާޅުވި އެވެ.
އިރާނާ ދެކޮޅަށް ފިޔަވަޅުކަން އިއުލާނު ކުރީ ނިޔުކްލިއާ މަޝްރޫއާ ގުޅޭ މަޝްވަރާތައް ނޮވެމްބަރު މަހު ފަށަން ތައްޔާރު ކަމަށް އިރާނުން ބުނިތާ ދެ ދުވަސް ފަހުންނެވެ.
އިރާނުގެ ނިޔުކްލިއާ މަޝްރޫއާ ގުޅޭ މަޝްވަރާތައް މެދުކެނޑިފައި އޮންނަތާ މިހާރު ފަސް މަސްވެއްޖެ އެވެ. އެހެންވެ، މަޝްވަރާތައް އަލުން ފެށުމަށް އެ ގައުމަށް ދިޔެއީ ޕްރެޝަރު ބޮޑުވަމުންނެވެ.
