ރިޔާދް، ސައުދީ އަރަބިއްޔާ (އޮކްޓޯބަރު 30) - ޔަމަނު ހަނގުރާމައާ ގުޅޭ ގޮތުން ލުބްނާންގެ މިނިސްޓަރަކު ސައުދީ އަރަބިއްޔާ އަށް އިހްތިރާމު ކުޑަކޮށް ވާހަކަ ދެއްކެވި މައްސަލާގައި ލުބްނާނަށް ކަނޑައަޅާފައި ހުންނަ ސައުދީ ސަފީރު އަނބުރާ ގައުމަށް ގެންދަން ނިންމައިފި އެވެ.
ހުކުރު ދުވަހު އެކަން އިއުލާނު ކުރުމަށް ފަހު ސައުދީ އަރަބިއްޔާ އިން ބުނީ އެ ގައުމުގައި ހުންނަ ލުބްނާން ސަފީރު ވެސް އަނބުރާ ގައުމަށް ގެންދިޔުމަށް 48 ގަޑިއިރުގެ މުހުލަތެއް ލުބްނާން ސަރުކާރެއް ދޭނެ ކަމަށެވެ.
އޭގެ އިތުރުން ލުބްނާނުން ސައުދީ އަރަބިއްޔާ އަށް މުދާ އިމްޕޯޓު ކުރުން މެދުކަނޑާލުމަށް ވެސް ވަނީ ނިންމާފަ އެވެ. އެއީ ސެކިއުރިޓީ ސަބަބުތަކާ ހެދި ކަމަށް ސައުދީ އަރަބިއްޔާ އިން ބުނެ އެވެ.
ސައުދީ އަރަބިއްޔާ އިން ބުނީ ލުބްނާނާ އެކު އޮތް ގުޅުން ގޯސްވުމުން ހިތާމަ ކުރާ ކަމަށާއި ކުރިއަށް އޮތް ތަނުގައި އެ ގައުމަށް ދެކޮޅަށް އިތުރު ފިޔަވަޅުތައް އަޅަމުން ދާނެ ކަމަށެވެ.
ލުބްނާނުގެ ބޮޑު ވަޒީރު ނަޖީބް މިކާތީ ވިދާޅުވީ ސައުދީ އަރަބިއްޔާގެ ނިންމުމާ މެދު ހިތާމަ ކުރައްވާ ކަމަށެވެ.
"ސައުދީ އަރަބިއްޔާގެ ނިންމުމާ މެދު ވަރަށް ހިތާމަ ކުރަން. އުއްމީދަކީ އެ ނިންމުން މުރާޖައާ ކުރުން. އަޅުގަނޑުމެން ބަލަނީ ޖެހިފައި އޮތް މައްސަލަ ހައްލު ކުރެވޭތޯ."
ޔަމަނު ހަނގުރާމައިގައި ސައުދީ އަރަބިއްޔާގެ އަސްކަރީ ކޯލިޝަނުން އަދާކުރާ ދައުރަށް ލުބްނާންގެ އިންފޮމޭޝަން މިނިސްޓަރު ޖޯޖް ކޯޑާހީ ފާޑުވިދާޅުވި މައްސަލަ ހޫނުވެ، ޔޫއޭއީ އާއި ސައުދީ އަރަބިއްޔާ އިން އެ ގައުމުގެ ސަފީރު ހާޒިރުކުރީ މިދިޔަ ބުދަ ދުވަހު އެވެ.
ހޯމަ ދުވަހު ޓީވީން ދެއްކި އިންޓަވިއުއެއްގައި ކޯޑާހީ ވިދާޅުވީ އިރާނުގެ އެހީއާ އެކު އުޅޭ ހޫތީ ހަނގުރާމަވެރިން ދިފާއުވާން މަސައްކަތް ކުރަނީ ބޭރުގެ ހަމަލާތަކާ ދެކޮޅަށް ކަމަށާއި ސައުދީގެ އަސްކަރީ ކޯލިޝަނުން ދަނީ ގެތަކާއި، އަވަށްތަކަށް ބޮން އަޅަމުން ކަމަށެވެ.
ޔަމަނުގެ ހަތް އަހަރުވީ ހަނގުރާމަ އިން ކުރާ ފައިދާއެއް ނެތް ކަމަށާއި ހަނގުރާމަ ނިންމަންވީ ވަގުތު އައިސް ޖެހިއްޖެ ކަމަށް ވެސް އޭނާ ވިދާޅުވި އެވެ.
ދުނިޔެ އަށް ދިމާވެފައިވާ އެންމެ ބޮޑު އިންސާނީ ކާރިސާގެ ގޮތުގައި އދ. އިން ސިފަކުރާ ޔަމަނުގައި އެތައް ހާސް ބަޔަކު މަރުވެފައި ވާއިރު، އެތައް މިލިއަން ބަޔެއްގެ ގެދޮރު ވަނީ ގެއްލިފަ އެވެ.
މިދިޔަ އަންގާރަ ދުވަހު ލުބްނާންގެ ސަރުކާރުން ބުނީ ކޯޑާހީގެ ވާހަކަތައް ބަލައިނުގަންނަ ކަމަށާއި އެއީ ސަރުކާރުގެ ވިސްނުން ނޫން ކަމަށެވެ. އަދި އެ އިންޓަވިއުއަކީ މިދިޔަ ސެޕްޓެމްބަރު މަހު ކޯޑާހީ އަށް ކެބިނެޓުގެ މަގާމެއް ލިބިވަޑައިގެންނެވުމުގެ ކުރިން ދެއްވި އިންޓަވިއުއެއް ކަމަށް ބުންޏެވެ.
ލުބްނާންގެ މަޝްހޫރު ޓީވީ ޕްރެޒެންޓަރެއްގެ ގޮތުގައު އުޅުމަށް ފަހު އިންފޮމޭޝަން މިނިސްޓަރުކަމަށް ވަޑައިގެންނެވި ކޯޑާހީ ނޫސްވެރިންނަށް ވިދާޅުވީ އިންޓަވިއު ދިނީ އޯގަސްޓު ފަސް ވަނަ ދުވަހު ކަމަށާއި އެއީ އޭނާގެ އަމިއްލަ ހިޔާލު ކަމަށެވެ.
"އަޅުގަނޑު އެއްވެސް މީހަކަށް ގެއްލުމެއް ނުދެން. ހަމަލާއެއް ނުދެން. އަޅުގަނޑު މައާފަށް އެދެން ޖެހޭނީ ކީއްވެތޯ؟ އަޅުގަނޑުގެ ހިޔާލު ފާޅުކުރީ އަރަބިން އުފުލަމުންދާ ތަކުލީފާ މެދު ވިސްނާ އިންސާނެއްގެ ގޮތުގައި،"
ޔަމަނު ހަނގުރާމައިގައި ސައުދީ އަސްކަރީ ކޯލިޝަނުން ބޮން އަޅަމުން ދާއިރު ގިނަ އަދަދެއްގެ އާއްމުން މަރުވާ މައްސަލާގައި އިންސާނީ ހައްގުތަކަށް މަސައްކަތް ކުރާ ގްރޫޕުތަކުން ކަންބޮޑުވުން ފާޅުކޮށްފައި ވެ އެވެ.
ޔަމަނުގެ ދާހިލީ ހަނގުރާމަ 2014 ވަނަ އަހަރު ފެށުނީ ހޫތީ ހަނގުރާމަވެރިން ވެރިރަށް ސަނާ ހިފުމުންނެވެ. އެއާއެކު ޔަމަނު ސަރުކާރުގެ ފައުޖަށް އެހީވުމުގެ ގޮތުން ސައުދީ އަސްކަރީ ކޯލިޝަނުން ހޫތީންނަށް ހަމަލާދޭން ފެށީ 2015 ވަނަ އަހަރު އެވެ.
