ގައުމީ ފަތާ ޓީމުގައި ހިމެނޭ ހުނަރުވެރި ފެތުންތެރިޔާ އަލީ އިމްއާން ގައުމީ ރެކޯޑެއް އާ ކޮށްފި އެވެ.
އިމްއާން އާ ކުރި ގައުމީ ރެކޯޑަކީ ފިރިހެނުންގެ ޝޯޓް ކޯސް 100 މީޓަރު އިންޑިވިޖުއަލް މެޑްލޭ އިވެންޓުގެ ޤައުމީ ރެކޯޑެވެ.
ފަހަކަށް އައިސް ފެތުމުގައި ބޮޑު ކުރިއެރުމެއް ހޯދަމުން އަންނަ އިމްއާން މި ރެކޯޑް އާ ކުރީ ރަޝިއާގެ ކަޒާންގައި މިހާރު ކުރިއަށްދާ ފީނާ ސްވިމިންގް ވޯލްޑް ކަޕް 2021 (ލެގް 4) ގައި ވާދަކޮށެވެ. އިމްއާން، ރެކޯޑް އާ ކުރިއިރު، އިވެންޓްގެ ޓައިމިން އަކީ 01.04.93 އެވެ.
މި އިވެންޓުގެ ގައުމީ ރެކޯޑް އެންމެ ފަހުން އޮތީ ގައުމީ ފަތާ ޓީމުގެ އެހެން ފެތުންތެރިއެއް ކަމަށްވާ މުބާލް އައްޒާމް އިބްރާހިމް އަތުގަ އެވެ. މުބާލް ރެކޯޑް ހެދީ 2017 ވަނަ އަހަރު ބޭއްވި 5 ވަނަ އޭޝިއަން އިންޑޯ އެންޑް މާޝަލް އާޓްސް ގޭމްސްގައި 01.10.13 އިން އިވެންޓް ނިންމައިގެންނެވެ.
މި ވަގުތު ފީނާ ސްކޮލަޝިޕެއްގެ ދަށުން ރަޝިއާގައި ޓްރެއިނިން ފުރިހަމަ ކުރަމުން އަންނަ އިމްއާން އަކީ ފަހަކަށް އައިސް ގައުމީ އަދި އިންޓަނޭޝަނަލް ލެވަލްގައި އެންމެ ރަނގަޅު ކުރިއެރުން ހޯދަމުން އަންނަ ފެތުންތެރިއެކެވެ.
އިމްއާން ވަނީ އަންނަ ޑިސެމްބަރު މަހު ޔޫއޭއީގައި ކުރިއަށްދާ ވޯލްޑް ކަޕް ޗެމްޕިއަންޝިޕްގައި ވާދަކުރާ ރާއްޖޭގެ ހަތަރު ފެތުންތެރިންގެ ތެރެއިން ފުރުސަތު ހޯދައިފަ އެވެ.
ދުނިޔޭގެ މުބާރާތުގައި އިމްއާންގެ އިތުރުން ދެން ވާދަކުރާނީ އައިޝަތު ސައުސަން، ހަމްނާ އަޙުމަދު އަދި މުހައްމަދު އާން ހުސައިން އެވެ.
މީގެ ތެރެއިން ހަމްނާ އާއި އާން ވަނީ ދާދި ފަހުން ބޭއްވި ސްވިމިންގެ ޗެމްޕިއަން އޮފް ޗެމްޕިއަންސް މުބާރާތުގައި ރަނގަޅު ކާމިޔާބެއް ހޯދައިފަ އެވެ. މިއީ ސްވިމިން އެސޯސިއޭޝަނުން އެންމެ މޮޅު ފެތުންތެރިންނަށް ހާއްސަކޮށް ފެށި މުބާރާތެކެވެ. އެ މުބާރާތުގައި ސައުޝަން އަށްް ވާދަނުކުރެވުނީ ކޮވިޑަށް ޕޮޒިޓިވްވުމުންނެވެ.
