ޖެނީވާ، ސްވިޓްޒަލޭންޑް (އޮކްޓޯބަރު 28) - ކޮވިޑުން އަރައިގަތުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހަދާފައިވާ ޕްލޭން ތަންފީޒު ކުރަން ކުރިއަށް އޮތް 12 މަހުގެ ތެރޭގައި 23.4 ބިލިއަން ޑޮލަރު ބޭނުންވާ ކަމަށް ބުނެފި އެވެ.
ދުނިޔޭގެ ބޮޑެތި ގައުމުތައް ހިމެނޭ ޖީ20 ސަމިޓު އިޓަލީގައި މިހާރު ކުރިއަށް ދާއިރު، ޑަބްލިއުއެޗްއޯގެ ޗީފް ޓެޑްރޯސް އަދަނޮމް ވިދާޅުވީ ބަލިމަޑުކަމުގައި ފަގީރު ގައުމުތަކަށް ވާނެ ގޮތެއް ވާން ދޫކޮށްލައިގެން އިތުރަށް ތިބެވެން ނެތް ކަމަށެވެ.
ޓެޑްރޯސް ވިދާޅުވީ ފައިސާ ބޭނުން ވަނީ ކޮވިޑް ވެކްސިން ހޯދުމަށާއި، ޓެސްޓުތަކާއި ފަރުވާތަކަށް ހޭދަކޮށް، މި ބަލިމަޑުކަމުގައި އިތުރު ފަސް މިލިއަން މީހުން މަރުން ސަލާމަތް ކުރުމަށް ކަމަށެވެ.
"މި ބަލިމަޑުކަން ނިންމަން ބޭނުންވާ ސިޔާސީ އަދި މާލީ ކަންކަން ހާސިލްކުރެވޭނެ ގާބިލްކަން ޖީ20 ގެ އެބަހުރި،" ޓެޑްރޯސް ޕްރެސް ކޮންފެރެންސެއްގައި ވިދާޅުވި އެވެ.
"އަޅުގަނޑުމެން މި ތިބީ މުހިއްމު ހިސާބަކަށް އައިސްފައި. މި ވަގުތު މުހިއްމީ ދުނިޔެ ރައްކާތެރި ތަނަކަށް ހަދަން ރަނގަޅު ލީޑާޝިޕެއް."
ޑަބްލިއުއެޗްއޯ އިން ފަށައިގެން އުޅޭ "އެކްސެސް ޓު ކޮވިޑް ޓޫލްސް އެކްސެލެރޭޓާ" އަކީ ބަލިމަޑުކަމާ ދެކޮޅަށް ބޭނުންވާ ކަންކަން ތަރައްގީކޮށް، އުފައްދާ، އެއްކޮށް، ބެހުމަށް ހާއްސަ ޕްރޮގްރާމެކެވެ.
އެ ޕްރޮގްރާމަށް ފަންޑު ކުރަން ބޭނުންވާ 23.4 ބިލިއަން ޑޮލަރަކީ ބަލިމަޑުކަމުގައި އިގްތިސާދުތަކަށް ލިބުނު އެތައް ޓްރިލިއަން ޑޮލަރާ އަޅާ ބަލާއިރު ކުޑަ އެއްޗެއް ކަމަށް ޑަބްލިއުއެޗްއޯ އިން ބުންޏެވެ.
