އައްޑޫ އިންޓަނޭޝަނަލް އެއާޕޯޓުގައި ގާއިމުކޮށްފައިވާ ފްލައިން ސްކޫލުގެ ތަމްރީނު ފެސިލިޓީތައް ލީސް އެގްރިމެންޓެއްގެ ދަށުން އައިލެންޑް އޭވިއޭޝަނުން ބޭނުންކުރުމަށް އެއްބަސްވުމެއްގައި ސޮއިކޮށްފި އެވެ.
އައިލެންޑް އޭވިއޭޝަނުން އެ އެއްބަސްވުމާ ގުޅިގެން ނެރުނު ބަޔާނެއްގައި ބުނެފައި ވަނީ ރާއްޖޭގެ ގައުމީ ޔުނިވަސިޓީއާ އައިލެންޑް އޭވިއޭޝަނުން ގުޅިގެން ފަށަން ނިންމާފައިވާ ފްލައިން ސްކޫލު ހިންގުމަށް އައްޑޫ އިންޓަނޭޝަނަލް އެއާޕޯޓުން ތަންދިނުމަށް ދެ ފަރާތުގެ މެދުގައި އެއްބަސްވުމެއްގައި މިއަދު ސޮއިކޮށްފައިވާ ކަމަށެވެ.
އައިލެންޑް އޭވިއޭޝަނުގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު މުހައްމަދު މިހާދެވެ. އައްޑޫ އެއާޕޯޓުގެ ފަރާތުން ސޮއިކުރެއްވީ މެނޭޖިން ޑިރެކްޓަރު ގައިސް ނަސީރެވެ.
އެއްބަސްވުމުގައި ސޮއިކުރުމަށް އައްޑޫގައި މިއަދު އޮތް ހާއްސަ ރަސްމިއްޔާތުގައި ނައިބު ރައީސް ފައިސަލް ނަސީމް ވެސް ބައިވެރިވެވަޑައިގަތެވެ.
ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަނުން އައްޑޫގައި ފްލައިން ސްކޫލެއް ހިންގަން ފަށަނީ، ޗެކް ރިޕަބްލިކްގެ ފްލައިން ސްކޫލަކާއެކު ޖޮއިންޓް ވެންޗާ އެއްގެ ދަށުންނެވެ.
އައިލެންޑް އޭވިއޭޝަނުން ފަށަން ނިންމާފައިވާ ފްލައިން ސްކޫލުގައި އޭޝިއަން އެކަޑަމީ އޮފް އެރޮނޯޓިކްސް (އޭއޭއޭ) އިން އައްޑޫގައި ހިންގި ފްލައިން ސްކޫލުގައި ކިޔަވަން ފަށާފައި ތިބި އަދި މިހާރު ކިޔެވުން ހުއްޓިފައި ތިބި ދަރިވަރުންނަށް އިސްކަން ދޭ ގޮތަށް ސަރުކާރުން ވަނީ ހަމަޖައްސާފަ އެވެ.
