ޖެނީވާ، ސްވިޓްޒަލޭންޑް (އޮކްޓޯބަރު 28) - ކޮވިޑް ފަތުރާ ވައިރަހުގެ ޑެލްޓާ ވޭރިއެންޓުން އުފެދިގެން އުޅޭ ސަބްވޭރިއެންޓެއް މޮނީޓާކުރަމުންދާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
އެ ސަބްވޭރިއެންޓް މޮނީޓާކުރަނީ އޭގެ އޮރިނިޖަލް ވޭރިއެންޓަށް ވުރެ ހަލުވިކޮށް ބަލި ފެތުރޭތޯ އާއި ސަބްވޭރިއެންޓު ޖެހުމުން އިންސާނުންގެ ދިފާއީ ނިޒާމު މަސައްކަތް ކުރާ ގޮތް ދެނެގަތުމަށެވެ.
އޭވައި 2.4 ގެ ނަން ދީފައިވާ ސަބްވޭރިއެންޓު މިހާތަނަށް 42 ގައުމަކުން ފެނިފައި ވެ އެވެ. ޑަބްލިއުއެޗްއޯ އިން ބުނީ އެ ސަބްވޭރިއެންޓު ފެތުރެން ފެށީ މިދިޔަ ޖުލައި މަހުން ފެށިގެން ކަމަށެވެ.
ސަބްވޭރިއެންޓު އުފެދިފައި ވަނީ ކޮވިޑް ބަލި ފަތުރާ އޮރިޖިނަލް ވައިރަހަށް ތަފާތު ތިން ބަދަލެއް ނުވަތަ މިއުޓޭޝަނެއް އައިސްގެންނެވެ. އެއާ ގުޅޭ 93 ޕަސެންޓު ކޭސް ފެނިފައި ވަނީ އިނގިރޭސިވި ލާތުންނެވެ.
އިނގިރޭސި ވިލާތުގައި އޮކްޓޯބަރު ތިން ވަނަ ދުވަހުން ފެށިގެން ހަތް ދުވަސް ވަންދެން ފެނުނު ހުރި ކޮވިޑްގެ ކޭސްތަކުގެ ތެރެއިން 5.9 ޕަސެންޓު ހިއްސާކުރަނީ އެ ސަބްވޭރިއެންޓާ ގުޅިފައިވާ ކޭސްތަކެވެ.
ޑަބްލިއުއެޗްއޯ އިން ބުނީ މިދިޔަ ޖުލައި މަހުން ފެށިގެން ޔޫރަޕާއި ހުޅަނގު ޕެސިފިކް ސަރަހައްދުގައި އުމުރުން 25 އަހަރުން ދަށުގެ މީހުންގެ މެދުގައި ބަލި ފެތުރުން އިތުރުކަން ފާހަގަކުރެވޭ ކަމަށެވެ.
އެގޮތަށް މެދުވެރިވަނީ އުމުރުން ދުވަސްވީ މީހުން ވެކްސިން ފުރިހަމަކޮށްފައިވުމާއި ޒުވާން އުމުރުގެ މީހުން ގިނައިން ބޭރަށް ނުކުމެ އުޅޭތީކަމަށް ލަފާކޮށްފައި ވެ އެވެ.
އޭގެ އިތުރުން އަލުން ސްކޫލުތައް ހުޅުވައި، ޒުވާނުންނާއި ކުދިން އެއް ތަނަކުން ބައްދަލުވާން ފެށުމަކީ ވެސް އެ އުމުރުގެ މީހުންގެ މެދުގައި ކޭސްތައް އިތުރުވާން ދިމާވާ ސަބަބެކެވެ.
ޑަބްލިއުއެޗްއޯ އިން ބުނީ މިހާތަނަށް ރިކޯޑުކޮށްފައިވާ ކޮވިޑްގެ 123 މިލިއަން ކޭސްގެ ތެރެއިން 51 ޕަސެންޓުގައި ހިމެނެނީ އަންހެނުން ކަމަށެވެ. ނަމަވެސް މަރުވާ ކޭސްތަކުގެ 58 ޕަސެންޓަކީ ފިރިހެނުންނެވެ.
ސެޕްޓެމްބަރު 2020 ވަނަ އަހަރުން ފެށިގެން އުމުރުން 65 އަހަރުން މަތީގެ މީހުންނަށް ކޮވިޑް ޖެހި މަރުވާ ނިސްބަތް ދަށްވާން ފަށާފައިވާ ކަމަށް ޑަބްލިއުއެޗްއޯ އިން ބުންޏެވެ.
އޭގެ ސަބަބެއް ކަމަށް ބެލެވެނީ އު އުމުރުގެ މީހުން ވެކްސިން ފުރިހަމަ ކުރުމާއި ބަލިވުމުން ހާއްސަ ފަރުވާ ލިބިގަތުމަށް އަވަސްވެގަންނާތީ އެވެ.
ޑަބްލިއުއެޗްއޯ އިން އިތުރަށް ބުނީ ދުނިޔޭގެ އާބާދީގެ 47 ޕަސެންޓަށް މިހާރު ކޮވިޑް ވެކްސިން އެއް ޑޯޒް ދެވިފައިވާ ކަމަށެވެ.
